Ölkə futbolu
İlin ən yaxşıları: alman hakimlər hamını qabaqladı
2017-cı ilin ən güclü futbol hakimlərinin adları mü…
2017-cı ilin ən güclü futbol hakimlərinin adları müəyyənləşib. Beynəlxalq Futbol Tarixi və Statistikaları Federasiyası (İFFHS) tərəfindən keçirilən sorğunun qalibləri Feliks Brix və Bibiana Steinhaus olub.
Qurumun internet saytında aparılan, jurnalist və idman mütəxəssislərinin iştirak etdiyi sorğuda əksəriyyət kişi hakimlər arasında Brixə üstünlük verib. Almaniyalı referi 178 səs toplayıb. O, ən yaxın izləyicisi olan ingiltərəli Martin Atkinsonu 105 səs qabaqlayıb. Üçüncü yerə isə italiyalı Nikola Ritsoli layiq görülüb.
Maraqlıdı ki, Canluka Rokki (İtaliya), Yonas Eriksson (İsveç), Şimon Marçinyak (Polşa) və 2011-ci ilin qalibi Viktor Kaşşai (Macarıstan) ilk “10-luğ”a düşməyiblər.
İlin ən güclü qadın futbol hakimi də bilinib. Almaniyalı Bibiana Steinhaus 232 səslə birinci olub. O, 2013 və 2014-cü illərdə də ən güclü hakim seçilmişdi. İsveçrəli Ester Staubli 2-ci, fransalı Stefan Frappart isə 3-cü yeri tutub.
Sorğuda Azərbaycanı təmsil edən apasport.az saytının əməkdaşı, İFFHS-in üzvü Vüqar Xeyrullayev həm kişi, həm də qadın hakimlər arasında ilk iki pillənin sahibini doğru proqnozlaşdırıb. Onun 3-cü yerə layiq bildiyi Cüneyt Çakır 8-ci, Katalin Kulçar isə 5-ci yerlə kifayətlənib.
Kişilər:
1. Feliks Brix (Almaniya) – 178 səs
2. Martin Atkinson (İngiltərə) – 73
3. Nikola Ritsoli (İtaliya) – 59
4. Mark Klattenburq (İngiltərə) – 50
5. Nestor Pitana (Argentina) – 46
6. Byorn Kuypers (Hollandiya) – 44
7. Damir Skomina (Sloveniya) – 40
8. Cüneyt Çakır (Türkiyə) – 39
9. Milorad Maziç (Serbiya) – 38
10. Antonio Mateu Lahoz (İspaniya) – 32
Qadınlar:
1. Bibiana Steinhaus (Almaniya) – 232 səs
2. Ester Staubli (İsveçrə) – 137
3. Stefan Frappart (Fransa) – 50
4. Katerina Monzul (Ukrayna) – 38
5. Katalin Kulçar (Macarıstan) – 35
6. Riem Hussein (Almaniya) – 26
7. Pernilya Larsson (İsveç) – 18
8. Anastasiya Pustovoytova (Rusiya) – 17
9. Karina Vitulano (İtaliya) – 15
10. Olqa Miranda (Paraqvay) – 14