Ölkə futbolu
“Keşlə”də yeni münaqişə ocağı: Maksimovun qalması mümkün deyil!
“Keşlə” yeni baş məşqçisinə qovuşdu. 2018-ci…
“Keşlə” yeni baş məşqçisinə qovuşdu. 2018-ci ilin ilk 6 ayında bütün nəticələrə görə Yuri Maksimov cavab verəcək. Və yalnız ilk 6 aydakı…
Davamı mümkün deyil. Klub rəhbərliyi hər nə qədər bu anlaşmanın uzadıla biləcəyinə inamını ifadə etsə də, yayda (bəlkə də yaya kimi) paytaxt klubu mütləq yeni çalışdırıcı axtarmalı olacaq. Maksimovun daha uzun müddətə işləmək şansı yoxdu.
“Keşlə”nin Müşahidə Şurasının dünənki iclasında əsas məsələ Maksimovun təyinatı olsa da, tədbirdə digər məsələlər də aydınlaşıb. Məlum olub ki, yayda komandaya əvəzedici heyətin koordinatoru kimi gələn, daha sonra baş məşqçi postuna keçən Ramiz Məmmədov bundan sonra idman direktoru olaraq fəaliyyət göstərəcək.
Maksimov şuranın sədri Zaur Axundovdan böyük büdcə istəsə də, buna nail olmayıb. Klub rəhbəri transferlər üçün təqribən 300-350 min manat ayırıb. Bu məbləğ qışdan sonra gələcək legionerlərin yayaqədərki məvacibini təşkil edəcək.
Maksimovu Zaur bəyə Ukraynada biznes fəaliyyəti göstərən şəriki təklif edib. Qazaxıstan “Tobol”undan ayrılandan sonra işsiz olan ukraynalı üçün də bu variant sərfəli olub – o, yaya kimi işsiz qalmayacaq, üstəlik, hədəfə çatsa, yeni, daha sərfəli müqavilə imzalayacaq. Lakin sonuncu variantı indidən hesabdan silək.
Yuxarıda əbəs yerə Maksimovun tezliklə qovulacağını yazmamışıq.
1. Dəlisov Maksimovla köntöy idarəçi kimi tanınan Axunovun birgə işləməsi mümkünsüzdü. Məşqçilərin işinə qarışmağı sevən, tez-tez paltardəyişmə otağına girib, futbolçuları təhqir etməkdən də çəkinməyən Zaur bəyin iş metodu tam fərqlidi. Və iki qoçun başının bir qazanda qaynamayacağını indidən deyə bilərik.
2. Müəyyən edilən məhdud büdcə ilə avrokuboklara yüksəlməyə imkan verən komanda qurmaq olmaz. “Keşlə” çempionatda hədəfinə çatmaq üçün çox gecikib. 4-cü pillə 12 xal uzaqdadı və bu yerə daha 2 iddialı namizəd var. Maksimovun hədəfə kubokdan çatması daha realdı. Lakin “Sumqayıt” bu gün daha mobil komandadı, üstəlik, digər yarımfinal cütündəki “Neftçi”ylə “Qəbələ” də “Keşlə”dən bir baş üstündü. Bu səbəbdən Maksimovun kuboku qazanması da mümkünsüzdü.
3. Ukraynalı məşqçinin Azərbaycana, ölkə futboluna öyrəşməsi üçün vaxta ehtiyacı var. 6 ay onun adaptasiyasına bəs edəcək. İşləmək, komanda qurmaq, nəticə göstərmək üçün yarım il az müddətdi. Amma Axundov o qədər səbr edəcək adam deyil. O, möcüzə gözləyir, bunun baş verməyəcəyini isə ondan başqa hamı anlayır.
4. Bəlkə də ən vacib amil Ramiz Məmmədovla bağlıdı. Təcrübə göstərir ki, klubda baş məşqçi potensialına sahib 2 nəfər olmamalıdı. Böyükağa Hacıyevin “Bakı” və “Neftçi”də, Bəhmən Həsənovun “Rəvan”da, həmin Məmmədovun “Qəbələ”də rəhbər postda əyləşərkən, sələflərinin yerinə göz dikib, vəzifəyə gəldiyini özümüz görmüşük. Başqa nümunələr də var və bu, instinktiv vəziyyətdi. Ramiz bəyi Zaur Svanadzeylə bağlı başverənlərdən də tanıyırıq. Hər nə qədər xoşniyyətli olsa da, bunu komandanın uğuruna naminə edəcəksə də, Məmmədovun müdaxilələri Maksimovun sonunu gətirəcək. Münaqişələr yaranacaq, istefa tezləşəcək.
Sadaladıqlarımızı nəzərə alsaq, Maksimovun “Keşlə”də uğur qazanmaq, yeni müqavilə imzalamaq perspektivi yoxdu. Klub rəhbərliyi indidən yeni mövsümün planlarını cızsa, büdcəni yay transferləri üçün qorusa, daha yaxşı olar. Tapşırıqla, tanışlıqla gələn Maksimov sadəcə, “Keşlə” tarixində epizodik mərhələ olacaq.
Ümid edirik, klubun alacağı oyunçularda seçim hüququ yalnız baş məşqçidə olmaz. Klub rəhbərliyi transferlərdə diqqətli olmalıdı. Yeni oyunçular təkcə məşqçinin deyil, komandanın oyun tərzinə uyğun alınmalıdı ki, sonradan heyəti növbəti dəfə dağıtmaq lazım gəlməsin. Ukraynalının şəxsən gətirdikləri ilə isə yarımillik anlaşma imzalanmalıdı ki, məşqçi gedərkən onlar heyətə yük olmasınlar, əlavə təzminat ödəməyə ehtiyac qalmasın.
Bakı təmsilçisinin Çexiyanın “Zlin” komandasından ayrılan Pablo Podionun keçidini həll etməsi haqda xəbərlər gəzir. Cari mövsümdə 3-ü ölkə çempionatı, 2-si kubokda olmaqla, cəmi 5 oyunda şans qazanan argentinalının yaxşı seçim olduğunu düşünmürük. Lakin həm bu yarımmüdafiəçini, həm də transferi gözlənilən bir neçə yerli oyunçunu rəhbərlik seçib. Maksimovun kimləri dəvət edəcəyini qarşıdakı günlərdə biləcəyik.
CAVAD
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-25 17:10
Klublar çətin vəziyyətdə: AFFA yardımları dondurub