Ölkə futbolu
Kostyumla futbol
Kabinet futbolunu yəqin ki, kostyumla oynayırlar. Xahişə gələn d…
Kabinet futbolunu yəqin ki, kostyumla oynayırlar. Xahişə gələn də, xahiş edən də, ssenarini cızan da rəsmi geyimdə olurlar. Ciddi görünmək üçün…
Tərlan Əhmədov da dünən kostyum geyinmişdi.
Heç kimi ittiham etmək olmur. Coşqun Diniyev o ötürməni qapıçıya edirdi, rəqib futbolçuya yox. Hətta ürəyindən rəqibə kömək etmək keçsə də, bu qədər axmaq səhv etməzdi. Təsadüfən alındı və həmin qolun matçda yeganə qol olması onu birbaşa hədəfə gətirdi. “Qarabağ” bu qədər uğursuz tamaşaya imza atacaq komanda deyil.
Rəşad Sadıqov heç vaxt belə tamaşanı ehtiyat oyunçular skamyasından izləməzdi.
Avrokuboklara vəsiqə uğrunda mübarizə ən kəskin zamanındadı. Çempionata rəqabət gəlib. 3 komanda 3-cü yer uğrunda ölüm-dirim savaşındadı. O qədər qarışıq dönəmdi ki, “Neftçi”də az qala hər səlahiyyətli şəxs ayrı-ayrılıqda komanda ilə toplantı keçirir. Hamı hansı yollasa qələbənin yollarını axtarır. “Zirə” də ayılmış kimi görünür.
Sumqayıtda isə hamı Bakıya zəng vurub təlimat alır.
Avropa Liqasına vəsiqələrin necə bölüşdürüləcəyi şəxsən mənə maraqlı deyil. Onsuz da ilahi ədalət bu gün futbola xəyanət edənlərin cəzasını elə yaşıl meydanda verəcək. Natəmizlər öz çirkablarında boğulmağa məhkumdu. Yayda hamı qrup mərhələsindən kənar qalsa, buna təəccüblənməyəcəm.
Təəssüf ki, dəyər verdiyimiz, ideallaşdırdığımız insanlar da məcbur qalıb, bu çirkin oyunda alətə çevrilir.
Bütün şübhələrimiz elə yalnız şübhədi. Amma 3 iddiaçı komandanın rəqibləri onlar arasında seçim edirsə, nəticələrdə fərq qoyursa, adamın vicdanı sızıldayır. Bir oyunda şirə dönən, digərində hasardakı quşları ovlayacaq qədər “sərrast” olanlar elə Azərbaycan çempionatında alverçi olacaq səviyyədə futbolçulardı.
Belə futboldan sonra azarkeşləri oyunlara gəlməməkdə qınamaq nə dərəcədə doğrudu?
Hansısa bir komanda, hansısa məşqçi və ya futbolçunu qınamaq olmur. Hamı udur-uduzur, hamı səhv edir – həyatın qanunudu, mükəmməl, ideal kimsə yoxdu. Sözə baxmayan klub rəhbərlərini, məşqçiləri vədlərlə aldadılan futbolçuların, hakimlərin əli ilə təslim edirlər.
Elə məşqçilər, futbolçular var ki, sabah olacağı yeri gülüstan etmək üçün indiki məkanının ekologiyasını pozur.
Kimlərisə təbrik, nələrə görə isə təəssüf edirəm. Futbol oynayanlar, futbolla oynayanlar; şərəf ilə oynayanlar, şərəfi ilə oynayanlar. Nə yazıq ki, 90-cı illərə qayıtmışıq…
Kabinetlərdə 2018-ci ildi, təfəkkür o illərdə qalıb.
Nə yazıq ki, kabinet oyunlarından canlı reportaja baxa bilmirik. Kimin bombardir, kimin əla pleymeyker, kimin oyun qurucusu olduğunu bilərdik. Gözəl seyvlərə, qaçırılan penaltilərə də tamaşa edə bilmirik.
Lakin nəvaxtsa bu matçların videoyazısına, ən azı maraqlı epizodlarına baxacağımız ümidi ilə…
FƏRİD
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?