Layihə
İK-nın qərarları: Qurbanov təşəbbüskar, başqaları qazanclı çıxandı
(əvvəli bu linkdə)
Hamının aradan çıxdığı…
Hamının aradan çıxdığı, heç bir suala cavab vermədiyi tədbirlə bağlı 2 adam danışdı. Biri AFFA-nın baş katibi Elxan Məmmədov idisə, digəri futbol təsərrüfatımızın fəxri baş katibi Qurban Qurbanov oldu.
Həm də milli komandamızın baş məşqçisi olan Qurbanov, jurnalistlərdən qaçmadı, onların çağırışına cavab verib, olanları şərh etdi. O, qərarların rəsmi sənədlərə və mövcud situasiyaya görə qəbul edildiyini, onlara təqdim edilən hesabatlara inandığını bildirdi.
Qurban bəyin daha bir bölgə komandasının sıradan çıxmasına, onu Bakı klubunun əvəz etməsinə görə narahatlığı duyulurdu. Komanda sayının artırılmaması da ürəyincə deyildi. Lakin onun əlindən gələn bir şey yoxdu: “Xəzər”in "bank təminatı" yoxdu. Bu, yoxdusa, artıq nəsə demək olmur. Lisenziyalaşdırma tələblərinə əməl etmək lazımdı. Kim əməl edirsə, Premyer Liqada yerini almalıdı".
Qurbanovla fikir mübadiləmiz oldu. O da jurnalistlərin narahatlığını gördü, futbolun monopoliyaya alınması haqda fikirlərimizi eşitdi. Qurban bəyə İK-nın sənədlərin əsiri olmamasının gərəkliyini anlatmağa çalışdıq. Çünki 4 ildi divizionun qalibinin kənarda qalmasının, vaxtilə “Səbail”in, “Araz Naxçıvan”ın, “Rəvan”ın da tələbləri yerinə yetirmədən elitaya buraxıldığını xatırlatdıq. Eyni zamanda AFFA-nın bir çox kluba ayırdığı maliyyənin havaya sovrulduğunu, həmin pulların lisenziya tələbini yerinə yetirməkdə çətinlik çəkən müstəqil klublara, bölgə təmsilçilərinə yönəldilməsinin daha effektli olacağını izah etməyə çalışdıq.
Qurban bəy bizi səbrlə dinlədi, imkanı daxilində İK üzvlərini müdafiə etməyə çalışdı. AFFA-nın klublar arasında fərq qoyduğunu, diviziondan yüksəlmək istəyənlərə öz adamını yerləşdirmək istədiyini dedikdə isə susdu. Məşqçi “Kəpəz”də baş verən məlum yeyinti olaylarını xatırlatdıqda da danışmadı, yalnız dinlədi.
Qurbanov danışığı ilə hiss etdirdi ki, komanda sayının artırılmasında, bölgə təmsilçilərinin Premyer Liqaya gəlməsində ən az bizim qədər maraqlıdı. Amma onun da əlindən gələn bir şey yoxdu. Bir çox məsələlər sənəd halına salınıb, kabinetlərdə həllini tapıb, İK üzvlərinin dəyişə bilməyəcəyi formatda təqdim olunub. Halbuki İK təşəbbüs qaldırıb katibliyin, lisenziyalaşdırma qrupunun fəaliyyətini araşdırmalı, lisenziya tələblərinin bizdə niyə hamıdan daha sərt olduğunu, bunun monopolist planlarına hesablandığını görməlidi.
Bununla belə, Qurbanov nüfuzundan istifadə edib, başqa məsələlərin həllinə nail oldu. Digər İK üzvlərindən fərqli olaraq, məhz onun təşəbbüsü ilə, “Sumqayıt” və “Zirə”nin stadionları, eləcə də hüquqi sənədləri həll olunduqdan sonra “İnter Arena”nın süni ot örtüyü təbii otla əvəzlənəcək. AFFA gələn ay Sumqayıtda və Zirədə təmir işlərinə başlayacaq.
Bu, milli komandanın baş məşqçisi vəzifəsinə gələrkən Qurbanovun qaldırdığı məsələ idi. Onun təşəbbüsünə prezident Rövnəq Abdullayev biganə qalmadı. Amma iş ondadı ki, Qurban bəyin futbol naminə etdiklərindən də başqaları, konkret Elxan Məmmədov faydalanacaq. Vaxtilə süni qazon monopoliyasına sahib olan, ölkədəki bütün arenaları süniləşdirən katib indi də yaşıl ota qayıdışda iş başındadı.
Təmir işlərini kimin aparacağı açıqlanmır, lakin indidən xəbəriniz olsun ki, bi işi də baş katibə pay çatdıran SİS və ya “AgroSport” yoluna qoyacaq. Gəncədə eyni prosesin şahidi olmuşduq, indi AFFA-nın xərclədiyi 800 min manat havaya sovrulacaq, klubsuz qalan şəhər stadionu otlağa çevriləcək. Əsas odur, pul xərclənib və ondan pay götürülüb…
(davamı olacaq)
FƏRİD
- Milli komanda2024-05-03 08:00
Vay(ss) bizim halımıza?
- Premyer-liqa2024-05-04 21:21
“Neftçi” “Qarabağ”a böyük hesabla uduzdu
- Ölkə futbolu2024-05-03 15:05
“Neftçi”nin transfer etmək istədiyi futbolçu Danimarkada həbsdə olub – cinsi təcavüzə görə
- Ölkə futbolu2024-05-03 14:00
“Neftçi”nin riskli seçimi: lazımsız legionerlə 4 illik müqavilə bağlayırlar