Ölkə futbolu
BATE-ylə oyun üçün qazanılan Mahir
BATE-ylə oyunlar bu qədər asan olmayacaq. Qorxmaq olmaz, amma ehtiy…
BATE-ylə oyunlar bu qədər asan olmayacaq. Qorxmaq olmaz, amma ehtiyatı əldən verməyib, hazırlaşmaq lazımdı. Daha diqqətlə, daha məsuliyyətlə.
Dünən “Kukesi”ylə oyunda “Qarabağ” ötənmövsümkü komandaya daha çox oxşayırdı. Heyətin güclənməsi ilə ağdamlıların oyununa da rəng gəlib. Səviyyəli futolçular çoxaldıqca oyunun keyfiyyəti artır, komanda daha inamlı təsir bağışlayır.
“Qarabağ” bu mövsüm Çempionlar Liqasında top buraxmayıbsa, buna görə rəqiblərinin zəifliyinə, bəzən bəxtə də minnətdar olmalıdı. Çünki başlanğıcda komanda o qədər də inamlı deyildi. Zaman keçdikcə forma toplamağa başlayan komanda zövq verir. “Kukesi” hətta ilk mərhələdəki “Olimpiya”dan da aşkar zəif idi və yaxşı ki, bu oyunları qəzasız bitirmək oldu.
Qəribə hissdi. Respublika stadionunun sehrli aurası var. Arenaya yaxınlaşarkən asta addımlarla irəliləyən istənilən adam hasarlara çatan kimi tələsməyə başlayır. Oyunun başlamasına yarım saatdan çox qalsa da, tribuna divarlarının həndəvərinə çatan kimi bir andaca içəri çatmaq üçün səbirsizlənirsən. Oyunun startına xeyli vaxt qaldığını bilə-bilə tələsirsən. Sanki tamaşanı qaçırmaq qorxusu, yazılacaq tarixin bir hissəsi olmaq arzusu bir-birinə qarışır. Sənan Şəfizadənin azarkeşləri coşdurmaq üçün etdiyi fəallıq da adrenalini qaldırır.
“Qarabağ”ı bu oyuna rəqib də motivasiya etmişdi. Albaniya klubunun üzvləri açıqlamaları ilə futbolçularımızı arxayınlaşmağa qoymurdu. Belədə ilk dəqiqələrdən rəqibin qapısına doğru sıxışdırılması qaçılmaz oldu. Çoxsaylı hücumlar fasiləyə kimi hesabın açılmasını şərtləndirdi.
Matç ərzində 3 penalti qazanan, rəqibi azlıqda qoyan İnnosent Emeqara günün qəhrəmanı idi. Fərdi bacarığıyla buna nail olan futbolçu onlardan birini boşa verdi, digər ikisini Dani Kintana dəqiq reallaşdırdı. Amma Emeqaranın qaçırdığı penaltidən 4 dəqiqə sonra rəqibi eyni səhvə məcbur etməsi peşəkarlığının, ruhdan düşməməsinin göstəricisi idi. O, oyun epizodlarında da peşəkarlığını göstərir, komanda üçün oynayırdı.
Con Delarjın qolu daha çox komanda yoldaşlarının xidməti idi. Lakin “Qarabağ”ın bütün transferləri kimi onun da faydalı olacağını deyə bilərik. BATE-ylə oyuna kimi tam formaya düşsələr, bu oyunçularla yol uzun olacaq. Abdulla Zubir və Vaqner da Silva da inamlıdı, Donald Gerrye bu mövsüm çox artırıb. Simeon Slavçev səviyyəli oyunçudu, amma Riçard Almeydanı unutdura bilmir – səviyyəsinə söz yoxdu, sadəcə, oyun manerası başqadı və qərar tutduğu mövqenin tələbləri üzündən “Qarabağ”ın oyun tərzini dəyişməsinə səbəbkardı.
Ağdamlılarda xəttlərarası əlaqə zəifləyib, yeni oyun modelinin formalaşması üçün zamana ehtiyac var. Oyundan-oyuna bu üslub təkmilləşir, amma ideal deyil. BATE keçilsə, ən azı Avropa Liqasının qrupu rəsmiləşəcək, belədə yarımmüdafiəyə əlavə transfer lazım gələcək. O zaman “Qarabağ” daha möhkəm komanda təsiri bağışlayacaq. İndiki zamanda isə böyük xərc çəkib, futbolçu almaq risklidi. Qəza ehtimalı qalır, qruplardan kənar qalan klub üçün 8 komandalı Premyer Liqa üçün çox bahalı heyət israfçılıq olardı.
“Qarabağ” bu matçda həm də komanda kimi vahid ailə olduğunu göstərdi. Əvvəlki oyunlarda qol vura bilməyib ehtiyata düşən Mahir Mədətovun oyuna girişindən sonra bunu gördük. Emeqaranın matçın taleyini həll etməsindən sonra meydana çıxan futbolçu bir neçə şans qazandı, 2 real imkanı əldən verdi. Onun ruhdan düşdüyü aşkar görünürdü. Amma bu vaxt məşqçilər, komanda yoldaşları onu ruhlandırırdı. Hər epizoddan sonra Mahirə inanılmaz dəstək, alqış var idi. İstedadlı oyunçunu ruhlandırır, bədbinliyə qapılmamasına çalışırdılar, o da özü qol epizodları yaratmaqla bacarıqsız olmadığını isbatlayırdı.
Yenə qol vura bilmədi, amma komanda Mahiri bu matçda bir daha qazandı. Əvvəlki görüşlərdə narazı qalan azarkeşlərin bir ağızdan adını çəkib ona dəstək verməsi gözəl mənzərə idi. Mədətovun psixoloji problemi var, özünü komandadan daha çox düşünür. Dünənki dəstəkdən sonra özü özünə hesabat verməli, yanlışlarını düzəltməlidi.
Matç bitəndən sonra azarkeşlər bir daha Mədətovu yanına çağırdı, onu ruhlandırdı. Mahir də onlara təşəkkür, daha sonra amiqoluq etdi, bir yerdə tribuna rəqsinə başladılar. Bu motivasiya ilə o, BATE-yə hər iki oyunda qol vurmalıdı. Həmin BATE-yə ki, bu mövsüm qarşılaşacağımız ən ciddi rəqibdi.
FƏRİD