Ölkə futbolu
Oyunçuları dalaşan “Səbail”i rəqibi sevindirdi
“Keşlə” evdə daha bir məğlubiyyət almaqla autsayderl…
“Keşlə” evdə daha bir məğlubiyyət almaqla autsayderlər qrupunda möhkəmləndi. Yalnız bir oyun az keçirən “Zirə”ni top fərqinə görə qabaqlayan paytaxt klubunun durumu arzuolunan deyil.
Heyətin səhlənkarcasına yığılması, ümumi strategiyanın olmaması aşkar görünür. Sanki komandada say düzəldilib, futbolçuların keyfiyyəti nəzərə alınmayıb. Bu isə komandanın oyununda özünü göstərir. Oyunçuların ustalıq səviyyəsi qənaətbəxş deyil, məşqçinin bacarığına da buna görə qiymət vermək olmur.
Düzdü, Mladen Milinkoviç son anda baş məşqçi postuna təyin olunub, o gələnə kimi heyət formalaşmışdı. Lakin serb çalışdırıcının gətirdikləri də bir işə yaramır. “Keşlə” komanda olaraq aciz görünür, qol epizodu yarada bilmir, müdafəsində aşkar açıqlar verir.
“Səbail”lə dünənki oyunda qələbə rəqib tərəfindən hədiyyə olundu. İlk qol məhz Milinkoviçin gətirdiyi Nikola Mitroviçin kobud səhvindən sonra vuruldu, daha sonra oyunu bərbad keçirən Sərtan Taşkın inamsız oynadı. Hesab arasındakı fərqin azaldığı epizodda isə meydan sahiblərinin azsaylı əzmkar futbolçularından olan Slavik Alxazov heç nədən penalti qazandı. Sərtan səhvini düzəldə bilərdi, gəl ki, onun qapıya zərbəsinin qarşısını işi qol vurmaq olan Andre Klennon “dəf etdi”.
“Səbail” ilk xallarını qazandı. Aftandil Hacıyevin siftəsini təmin edən öz oyunçularından daha çox rəqib oldu. Yuxarıda səbələri sadalamışıq. Çox aşağı səviyyəli oyunda bəsit səhvlər həlledici əhəmiyyət daşıdı.
Ümumiyyətlə, “Səbail”də xaosdu, məşqçinin zəhmi, rəhbərliyin idarəçiliyi hiss edilmir. Heyət bütünlüklə yenidən qurulub, 8 əcnəbi alınıb, amma onlar vahid ailədə birləşdirilməyib. Təkcə ilk hissədə 2 dəfə qonaq futbolçular bir-biri ilə dalaşdı. Öncə Yevgeni Kuçukla Edqar Paçeko, ardınca Maudo Jarjue ilə Tome Kitanovski az qala əlbəyaxa olacaqdı. Bütün bunlar komandadaxili ab-havanın durumundan xəbər verir.
Yazı tənqid notları üzərində qurulub. Çünki oyunda xoş məqamlar gözə dəymirdi, ancaq səhvlər, qalmaqallar, antifutbol izləyirdik. “Keşlə” Bosançiç, Çami, Klennon, Mitroviç, Sohnanın timsalında səviyyəsiz əcnəbilərlə doldurulub və onların hər birinə 5-8 min dollar aralığında maaş verilir. Halbuki bu pulları havaya sovurmaqdansa, klub akademiyasının üzvlərinin sayəsində daha yaxşı nəticə göstərmək mümkün idi. Elə “Səbail”də də belələri az deyil, sadəcə, qələbə qazanıldığından onların mühakiməsini növbəti matçlara saxlayırıq.
AĞA
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”
- Ölkə futbolu2024-04-23 08:00
“Səbail” “Sabah”a uduzsa…