Ölkə futbolu
“Qələbə üçün oynayacağıq”
“Qarabağ”ın hücumçusu İnnosent Emeqara Prem…
“Qarabağ”ın hücumçusu İnnosent Emeqara Premyer Liqanın son matçında dubl etdi. Məhz onun sonuncu qolu “Zirə” ilə təxirə salınan oyunun qalibi olmaq üçün kifayət etdi.
Legioner forvard futbolinfo.az-a müsahibəsində son oyunlardan, eləcə də “Arsenal”la qarşıdakı matçdan danışdı.
– “Qəbələ” ilə oyunda qazandığınız asan qələbədən sonra hər kəs düşünür ki, artıq “qırmızı-qaralar”ı sizə rəqib görmək olmaz…
– Sadəcə, həmin günü “Qəbələ” yaxşı oynamadı. Bizə isə istədiyimiz kimi çıxış etdik. Düşünürəm ki, belə qələbələr olur.
– “Zirə” ilə matçda isə 2:0 üstün olduqdan sonra hesab bərabərləşdi. Bu vaxt komanda arxayınlaşdı, yoxsa sıx qrafikdə oynamağın nəticəsi idi?
– Bizim qısa müddətdə xeyli oyunumuz var. Avropa Liqasında fərqli çıxış edirik. Səyahətlərimiz olur. Amma bizim yaxşı komandamız var. Buna görə də daim qələbə qazanmaq istəyirik. Həmin matçda 2:0-dan sonra bizim üçün sürpriz oldu ki, rəqib hesabı 2:2 etdi. Amma sona qədər oynayıb evdə 3 xalımızı qazana bildik.
– “Sportinq”lə matçda isə 0:2 hesabı ilə uduzdunuz. Avropa Liqasına məğlubiyyətlə başladınız…
– Həmin matçın ilk hissəsində yaxşı çıxış etmişdik. İkinci hissədə bir az da olsa, konsentrasiyanı itirdik. Oyunu əldən verdik. Düşünürəm ki, Lissabon klubuna qarşı evdə daha yaxşı çıxış edəcəyik.
– Əlinə düşən fürsətlərdən yararlana bilmədin. Bu, sənə təsir etdi?
– Rəqib qapıçı çox yaxşı oynadı. O, vaxtında düzgün qərar verib irəli çıxdı və qol vurmağıma mane oldu.
– “Arsenal”la qarşılaşmada heç kim qələbə gözləmir…
– Futbolda hər şey mümkündür. Biz qələbə üçün oynayacağıq.
– Qrupunuzu Çempionlar Liqası qrupu adlandıranlar çoxdur, bununla razısan?
– Əlbəttə. Normalda bu komandalar Çempionlar Liqasının qrup mərhələsində oynayır. Bizim üçün çox çətin qrupdur.
FƏRİD