Ölkə futbolu
Xarabalıqda zövqsüz sınaq
Cari mövsüm başlayandan “Qəbələ”nin qələb?…
Cari mövsüm başlayandan “Qəbələ”nin qələbəsini təkcə “Səbail” görüb. Paytaxt klubu Premyer Liqanın yeganə bölgə səfərindən 0:3 hesablı məğlubiyyətlə dönmüşdü.
Sənan Qurbanovun yetirmələri üçün bu, həm də son qələbədi. 7 oyuna 5 xal toplayan “qırmızı-qaralar” darmadağın etdikləri komandanın xalının yarısına sahibdilər.
Sözügedən komandalar bu gün növbəti dəfə üz-üzə gəldi. Milli komandalara göndərilən futbolçuların yoxluğunda heyətə düşməyənlərin də sınandığı matçda yenə “Səbail” uduzdu. “Qəbələ” yeganə qol sayəsində əhval-ruhiyyəsini qismən düzəltdi.
Matçı izləyən “Neftçi”nin məşqçisi Füzuli Məmmədovun hansı qeydlər götürdüyünü bilmirik. Amma çətin ki, onun gördükləri növbəti turda Qəbələ səfərində Roberto Bordinin quracağı oyun sistemi üçün faydalı olsun. Çünki yetirmələrinin nə etdiyi hətta Sənan Qurbanov üçün də sirr idi. Darıxdırıcı futbol, məzmunsuz hücumlar, vaxtöldürmə matçı. Legioner bolluğundan “əziyyət çəkən” “Səbail” də matça rəng qata bilmədi.
Bəlkə də oyunu zövqsüz edən komandaların oynadıqları meydan idi. “Bakı”nın əlindən alınan bazasının indi kimin əlində olduğu bilinmir. Yeni sahiblər kimliyini gizli saxlayır, amma Hafiz Məmmədovun hər şeyi itirdiyi dəqiqdi. Baxımsız qazonu oyuna hazır etmək üçün heç bir iş görülməmişdi, adicə xəttləri çəkmək üçün işçilər də yox idi. “Qəbələ”ylə “Səbail” yalnız əvvəlki dövrlərdən qalan izlərlə hüdudları müəyynləşdirirdi.
“Bakı”nın sahiblərinin, sponsorlarının şirkətlərinin adı yazılan nimdaş lövhələr də xarabazara çevrilməkdə olan bazanın miskinliyinə çarə qılmırdı. Tərk edilmiş milyonçu evinə bənzəyən qurğuda sanki həyat donub. Paytaxtda komandaların məşq etməyə meydança tapmadığı, uşaq liqalarının oyunlarının standartlara cavab verməyən, betonabənzər qazonlarda keçirildiyi bir zamanda külli miqdarda dövlət vəsaiti xərclənən bazanın göz görə-görə dağılması xoş deyil.
Əmlak davası, mülk qovğası öz yerində, kimin haqqıdısa onun olsun, lakin belə idman qurğusunun dağılmasına imkan vermək insafsızlıqdı. Buradakı meydançalar uşaq liqaları üçün çox əlverişlidi, hətta milli komandalar üçün də əla baza ola bilər.
“Qəbələ” Bakı hazırlığını bitirib oktyabrın 16-da doğma şəhərə dönəcək. “Neftçi” ilə oyunun hazırlıqları da orada tamamlanacaq. Bir-birindən ideal vəziyyətdə olan 7 meydanı qoyub, Bakıda hazırlıq keçməyin səbəbini bilmirik, lakin gələn il Qəbələdəki stadionlar da “Bakı”nın bazasının gününə düşsə, təəccüblənməyəcəm. Əlimizdə olanın qədrini bilək…
FƏRİD
- Ölkə futbolu2024-04-16 13:19
AFFA-da fırtınaqabağı sakitlik: maliyyə yoxlaması davam edir
- Ölkə futbolu2024-04-17 10:49
12 komandalı çempionat: necə etməli?
- Ölkə futbolu2024-04-16 09:10
Lunyov “Qarabağ”dan ayrıla bilər
- Müsahibə2024-04-16 08:00
Atanqana döyülməsini təkzib edir: “Komanda yoldaşlarımla aramızda heç bir problem yaşanmayıb”