Müsahibə
“Rəqib 10 nəfərlə müdafiə olunurdu” – Jezniçak “Neftçi”yə məğlubiyyətdən danışdı
“Qarabağ”ın müdafiəçisi Yakub Jezniç…
“Qarabağ”ın müdafiəçisi Yakub Jezniçakın futbolinfo.az saytına müsahibəsi:
– “Qarabağ”ın “Neftçi”yə məğlubiyyəti səs-küy yaratdı. Komandanın çıxışı heç də yaxşı qəbul olunmadı…
– Düşünürəm ki, biz bu oyunda pis çıxış etmədik. Ilk hissədə “Neftçi” mənim səhvimdən istifadə etdi. İlk qolu belə vurdular. Bundan sonra onlar dərin müdafiə olunmağa başladılar. Sonuncu oyunumuz kimi topu daha çox özümüzdə saxladıq və daha çox şans yaratdıq. Fiziki olaraq çox yaxşı durumdayıq və bunu oyundan sonra statistikada da gördük. Daha çox meydanda hərəkət edən tərəf idik. Düşünürəm ki, bütün komandaların mövsüm ərzində nəticələri zəif dönəmi ola bilər.
– Bilirsən ki, “Qarabağ” son qələbəsini 1 ay öncə qazanıb. Düzdü, “Səbail”i meydanda udsanız da, texniki məğlubiyyətə görə xalsız qaldınız…
– Bunu mən bilirəm və komandadakı hər kəsin də xəbəri var. Biz hər gün daha çox çalışmağa davam edirik. Mümkün olan ən tez zamanda bu situasiyanı dəyişməyə çalışacağıq. Mən və komanda məğlubiyyətlərə nifrət edirik.
– “Neftçi” ilə oyunda bir hissə meydanda ola bildin. Əvəzlənməyinə səbəb nə idi?
– Fikrimcə, ilk hissədən sonra məşqçi müəyyən dəyişikliklər etmək istədi. Çünki ilk hissədə göstərdiyimiz oyun kifayət qədər yaxşı deyildi. Məşqçi rəhbərdir və biz onun qərarlarına hörmət edirik. Mənim üçün önəmli olan “Qarabağ”ın qələbəsidir. 45 və ya 90 dəqiqə meydanda olmağım problem deyil.
– Biz bir az geriyə gedərək “Vorskla” ilə matçdan danışaq. Komanda qrupda “dişinə” uyğun tək rəqibinə də uduzdu. Amma qarşılaşamdan öncə hamı sizdən qələbə gözləyirdi. Bununla da “Qarabağ”ın növbəti mərhələ şanslarını itirdiyini söyləmək olar?
– Futbolda hər şey mümkündür. Amma biz növbəti mərhələyə adlamaq istəyiriksə, qarşıdakı hər 3 oyunda qalib gəlməliyik. Bunun çox çətin olacağını indidən söyləyə bilərik. Düşünürəm ki, hazırda biz qarşıdakı hər oyuna ayrı-ayrılıqda konsentrasiya olmalıyıq. Ən yaxşı oyunumuzu meydançada göstərməliyik.
– “Qarabağ” uduzması bir yana son zamanlar daha çox qol vəziyyəti yaratmaqda da əziyyət çəkir. Bunu ötənilki heyətin 30-40 faizinin dəyişməsi və yenilərin hələ tam adaptasiya ola bilməməsi ilə əlaqələndirmək mümkündür?
– Düşünürəm ki, əvvəlki oyunlarda biz daha çox qol şansı yarada bilirdik və qollar vururduq. Bizim yaxşı komandamız var və bütün futbolçular burda özünü evdəki kimi hiss edir. “Vorskla”ya qarşı oyun ona görə çətin oldu ki, onlar meydanın özlərinə aid hissəsində 10 futbolçu ilə müdafiə olunurdular. Əgər biz “Vorskla” – “Sportinq” oyununa baxsaq, görərik Lissabon klubu da ukraynalıların qapısı qarşısında elə də çox qol şansı yaratmayıb və bunun üçün də çox əziyyət çəkdi.
– Sabah “Keşlə” ilə oyununuz var və rəqibinizin başı problemlərə qatışıb, yeni məşqçi gəlib…
– Qələbə qazanmaq istəyirik. Biz rəqibimizə hörmət edirik. Amma bizim üçün çox vacib olacaq və necə lazım olsa, elə də oynamalıyıq.
– Qurban Qurbanov “Neftçi” ilə matçdan sonra bildirmişdi ki, futbolçularla fərdi söhbətim olacaq. Sizinlə nələri danışdı?
– Bu klubun daxili məsələsidir və mən sizə bundan danışa bilmərəm.
CAVAD
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?