Bəhlul Mustafazadə: “Komandanın əsl gücü həmin oyunda göründü”

“Qəbələ”nin müdafiəçisi Bəhlul Mustafazadənin futbolinfo.az saytına müsahibəsi:

– “Sumqayıt”la matçda komandanın 2:2-lik heç-heçəsi sizin üçün gözlənilməz oldumu? Çünki “Neftçi” üzərində inamlı qələbədən sonra daha yaxşı nəticə gözlənilirdi…
– Oyundan öncə məqsədimiz qələbə qazanmaq idi. Amma oyuna yaxşı başlamadıq. Ard-arda qollar buraxdıq. Düzdü, matçdan əvvəl qələbə fikirləşsək də, oyunun gedişatına uyğun olaraq heç-heçəni uğursuz saymaq olmaz. 

– “Sumqayıt”ın heyətində çıxış etmisən. Həmin oyunda xüsusi motivasiya və ya hər hansı xüsusi hiss var idimi?
– Xeyr, xüsusi nəsə olmadı. Futboldu və bir mövsüm ərzində 4, bəzən 6 dəfə onlarla qarşılaşa bilərəm. Sadəcə, tanış insanları yenidən görmək həqiqətən xoş idi. “Sumqayıt” azarkeşlərinə də təşəkkür edirəm ki, məni xoş, isti qarşıladılar. 

– Həmin oyunda baş verənlər çox müzakirə olundu. Matçdan sonra Orxan Məmmədova yaxınlaşıb dedinmi mənə niyə qırmızı vərəqə verdin?
– Hətta meydanda olarkən düşünürdüm ki, hakim qırmızı vərəqəmi ləğv edəcək. Buna əmin idim. Ona görə də özümü daha çox sakit aparmağa çalışırdım. Hakimdi də, ola bilsin ki, epizodu səhv görüb. Sadəcə, mənim rəqibə zərbə vurduğumu düşünüb. Halbuki videoda da heç bir şey olmadığı açıq-aşkar görünürdü.

– Oyundan sonra klub rəsmiləriniz Orxan Məmmədovun bunu qərəzli şəkildə etdiyini bildirdilər. Ümumiyyətlə, sən hakimdən niyə belə etdiyini soruşdunmu?
– Mən hakimə yaxınlaşmadım. Çünki onunla danışmağım nəyisə dəyişməyəcəkdi. Bilirdim ki, mənim rəqib vurduğumu düşünərək qırmızı vərəqə verib. Klubdan lazımi etirazları bildirdilər və məsələ həll olundu. Söz-söhbətlər məni maraqlandırmır. Çünki belə şeylər mənə aid olan məsələlər deyil. 

– Mövsümün əvvəlində daha çox meydana çıxırdın. Amma uğursuz matçlardan sonra ehtiyatda oturdun. Bunun səbəbini nədə görürsən?
– Əlbəttə ki, hər zaman daha çox meydanda olmaq istəyirəm. Baş məşqçi belə məsləhət gördü. Hər gün əvvəlkindən daha yaxşı olmağa çalışıram. Meydana çıxanda hazır olmaq istəyirəm. Komanda olaraq biz layiqli yerdə deyilik. 

– Son iki oyunda komanda bir qələbə qazanıb, bir oyunda geridönüş edərək heç-heçəyə nail olub. Düşünürsən ki, “qara zolaq”dan çıxmısız?
– “Neftçi” üzərində inamlı qələbə psixoloji cəhətdən biz çox kömək oldu. Komandanın əsl gücü həmin oyunda göründü. Bundan sonra sadəcə, üzərimizdəki təzyiqi atıb növbəti oyunlara köklənməliyik. Nəticələrin gələcəyinə əminəm.

AĞA