Dünya futbolu
RƏSMİ: “Qalatasaray” yeni transferlərini təqdim etdi
Türkiyə çempionu “Qalatasaray” Mbaye Diane v?…
Türkiyə çempionu “Qalatasaray” Mbaye Diane və Konstantin Mitroqlu transferini tam rəsmiləşdirib.
Futbolinfo.az xəbər verir ki, İstanbul klubu hər iki hücumçu ilə rəsmi müqavilə imzalandığını rəsmi saytı vasitəsilə bəyan edib.
Super Liqanın digər təmsilçisi “Kasımpaşa”dan transfer edilən Diane ilə 4,5 illik müqavilə imzalanıb. “Qalatasaray” 27 yaşlı forvardın transferinə görə, onun sabiq klubuna 10 milyon avro təzminat ödəyəcək.
Diane bu mövsüm “Kasımpaşa”nın heyətində 17 oyuna çıxıb, 20 qola imza atıb, 2 məhsuldar ötürmə ilə yadda qalıb. Seneqallı forvard bu göstərici ilə Super Liqanın bombardiridi. O, 2018-ci ilin yanvar ayından “Kasımpaşa”da forma geyinirdi.
Mitroqlu isə Marsel “Olimpik”indən (Fransa) ilyarımlıq icarəyə götürülüb. “Qalatasaray” Fransa təmsilçisinə heç bir icarə haqqı ödəməyəcək. Yunanıstanlı futbolçu özü isə bu mövsüm 1,5 milyon avro, növbəti mövsüm isə 2,6 milyon avro gəlir əldə edəcək.
Karyerası ərzində “Olimpiakos”, “Fulhem”, “Benfika” kimi klubların şərəfini qoruyan Mitroqlu, 2017-ci ildən Marsel təmsilçisində çıxış edir. 30 yaşlı forvard cari mövsümdə 13 matçda iştirak edərək, 3 qol vurub. O, Yunanıstan millisində də 64 oyuna çıxıb.