Ölkə futbolu
Toparlanmaq zamanı: “Neftçi”nin səhv limiti qalmadı
Bəzən belə zərbələr də lazımdı. Ayılmaq, silkələnmək, &ou…
Bəzən belə zərbələr də lazımdı. Ayılmaq, silkələnmək, özünə gəlmək üçün. Rəqibin büdrəyibsə, arxayınlaşmaq yox, bu aqibətin səni də gözlədiyini anlayaraq sayıq olmaq lazımdı.
Əla şansdı. “Neftçi” uzun illərdən sonra ilk dəfə çempionluğa bu qədər yaxındı. “Qarabağ”la əyani mübarizələri uduzmayan, əksinə, üstün olan bakılılar digər rəqiblərlə oyunlardakı xal itkilərinə görə ağdamlıları özünə şərik edib. Halbuki belə üstünlüklə birnəfəsə irəliləmək, zirvədə möhkəmlənmək lazım idi.
“Neftçi” 2019-a çox pis başlayıb. 4 tura 1 qələbə və cəmi 5 xal çempionluğa oynayan komanda üçün bağışlanmaz səhvdi. “Qarabağ”dan bu qədər irəlidə olduğu halda şansı qaçırmağı baş məşqçi Roberto Bordinə bağışlamaq olmaz. Çünki komandanın büdrəmələrində birbaşa onun rolu var. Heyətdə yersiz dəyişikliklər, oturuşmuş “11-liy”in laxladılması sonrakı uğursuzluqların birbaşa səbəbidi.
“Neftçi”nin rahat oynaması üçün hər imkanı, hətta büdrəmə limiti də var idi. Bunu çox tez – 17-ci turda istifadə etdi, “Zirə”ylə heç-heçə vəziyyəti qəlişləşdirdi. Amma növbəti turda eyni səhvi “Qarabağ” da təkrarladı, çempion, əsas izləyici “Sabah”la matçda 1 xalla kifayətləndi. “Neftçi” bir gün sonra meydana çıxdığından, yenidən qış fasiləsinə yollanarkən əldə etdiyi fərqi yarada bilərdi. Lakin “Səbail”lə oyunda faciəvi nəticə yaşandı.
Həm futbolçuların 2 dəfə yendikləri rəqiblə görüşə arxayın çıxması, həm də Bordinin heyət yanlışlıqları məğlubiyyəti şərtləndirdi. Əsas rəqiblə xallar bərabərləşdi. Sanki mübarizə yenidən başlayır.
Hətta indiki vəziyyətdə də hər şey “Neftçi”nin öz əlindədi. Qalan matçlarda ağdamlılardan çox xal itirmə, şəxsi göstəricilərdə üstün olduğun bu rəqiblə son oyunda uduzma və çempion ol.
Vəziyyət çox qəlizləşib, lakin ümidsiz deyil. Sadəcə, toparlanmaq, oyunlara daha ciddi yanaşmaq lazımdı. “Neftçi” fanatları üçün 1-ci pillədən başqa yer yoxdu, onlar haqlıdı. Lakin azarkeşlər həm də ona görə lazımdı ki, ən pis vaxtda dəstək olsunlar. Reallıqları, əsas rəqibin gücünü, imkanlarını da nəzərə almaq gərəkdi. Oturuşmuş heyətə malik “Qarabağ” qarşısında “Neftçi” həm mübarizə aparır, geri qalmır, həm də yeni komanda quruculuğu işi aparılır.
Ağdamlıların əvəzedici heyətə göndərdiyi legioneri “Neftçi”nin ən ödənişli futbolçusundan bahadırsa, mənzərə aydındır. Bəli, paytaxt klubunda da son illər çox səhvlər edilib, büdcə dağıdılıb, lakin sabiqlərin nöqsanını indiki rəhbərliyin üstünə də yıxmamalıyıq. Klubun cari xərcləri öz yerində, baza tikintisi davam etdirilir, üstəlik, keçmiş rəhbərliyin günahı üzündən kredit ödənilir. Bütün bunlarla yanaşı, “Neftçi”nin indiyədək zirvədə qalması da böyük uğurdu.
Amma başqa reallıqlar da var. “Qarabağ”ın başı Avropa Liqasına qarışarkən yaradılan xal fərqini qorumaq mümkün idi. “Neftçi” büdcə və heyətcə daha zəif olan komandalara xalla bağışlamaqla səhv edir. Bu isə artıq futbolçu və məşqçi heyətinin günahıdı. Onlar 3 oyunda “Qarabağ”a uduzmayıb, əvəzində autsayderlərə xallar bağışlayıb. Belə qeyri-sabitliyin cəzası ağır olur. İndi toparlanmaq, azarkeşlərlə bütünləşmək, səhv etmək limitinin tükəndiyini anlamaq lazımdı.
AĞA