Ölkə futbolu
Qələbədən daha artıq
Hətta mərhələni keçməmək də bu qələbənin önəmin…
Hətta mərhələni keçməmək də bu qələbənin önəmini azalda bilməz. Rus komandasını səfərdə yenmək sıradan uğur deyil və “Neftçi” Azərbaycana yuxarıdan aşağı baxanların cavabını parlaq oyunla verdi.
Avropa Liqasında “Arsenal”la matç ən nikbin azarkeşlərin istədiyi hesabla bitdi. Və “Neftçi” Tulada cansıxıcı oyunla, təsadüfi qolla qələbə qazanmadı. Komandamız oyuna diqtə etdi, rəqibi hər mənada susdurdu və düşünülmüş kombinasiyadan sonra fərqlənərək vacib qələbə qazandı. Kapitan Emin Mahmudov ruslara özünü sübut etmək istəyini bütün futbolçulara aşıladı, onlara dirijorluq etdi və Rusiya çempionatında oynamaq səviyyəsində olduğunu göstərdi.
“Arsenal” formada olan əla komandadı və onları səfərdə yenmək üçün cüzi şans var idi. Rəqibin arxayınlığından yararlanmaq, zəif nöqtələrini tapıb ən doğru taktikanı seçmək lazım gəlirdi. Roberto Bordin “Neftçi”də işlədiyi müddətdə bəlkə də ən mükəmməl seçimini etmişdi. Rəqibi xırdalığına qədər incələmiş, ən doğru heyəti və taktikanı seçmişdi. Öndə pressinq etmək üçün komandanın fiziki gücünü də hesablamış, futbolçuları buna hazırlaya bilmişdi.
Fasiləyə kimi mükəmməl “Neftçi” gördük. Avropa kubokları fərqli səviyyədi və “Arsenal”ın debüt həyəcanından düzgün faydalandıq. Müdafiədə etibarlı oyun, gənc cinah müdafiəçilərinin taktiki cəhətdən ağıllı çıxışı, dayaq bölgəsinin fədakar oyunu və hücumda oyunçuların fərdi bacarığının da işə yaradığı oyun modeli… Fasilə ərəfəsində vurulan qol isə ideal əks-hücumun nəticəsi idi.
Rəqib məşqçi taktika savaşında Bordinə aşkar şəkildə uduzdu. İtaliyalı eyni heyətin B planını da doğru hazırlamışdı və fasilədən sonra məhz bunu gördük. “Neftçi” bu dəfə daha müdafiəyəmeylli oynadı, eyni zamanda rəqibin təşəbbüsü ələ almasına imkan vermədi. Əvəzetmələr, oyuna müdaxilələr yerində idi – Bordin İtaliya məşqçi məktəbinin gücünü nəhayət, öz simasında da göstərdi. Bir il ərzində xeyli tənqid olunan Roberto bir matçdaca özünə əziyyət verərkən yaxşı işlər görə bildiyini göstərdi.
Birinci pərdə qapandı. İndi “Neftçi”ni Bakıda daha çətin matç gözləyir. Artıq təmsilçimiz ciddi şəkildə incələnəcək, daha hörmətlə yanaşılacaq. Bu səbədən evdəki görüş Rusiyadakından da çətin keçəcək. Bu dəfə azarkeş amili bizim tərəfdədi, lakin ev oyunu eyni zamanda psixoloji təzyiq gətirəcək. Bordin məşqçi bacarığını bir daha sübut etməli, futbolçular maksimuma köklənməlidi.
Qarşıda bir həftə var. Hazırlaşmaq, səhvləri incələmək, zirvədə qalmaq üçün yollar axtarmaq lazımdı. Amma hətta cavab oyunu “Arsenal”ın üstünlüyü ilə bitsə də, “Neftçi” çox böyük iş gördü. Rusiyadakı uğur yalnız futbol qələbəsi deyil, komanda sübut etdi ki, azərbaycanlılar da futbol oynaya bilir. Əsas olan işə düzgün yanaşmadı və tulalılarla büdcə fərqini meydanda unutdurmaq mümkündü.
“Neftçi”nin SSRİ vaxtından qalan nüfuzu bir daha təsdiqləndi. Bütün postsovet məkanı nəticədən xəbərdardı və Azərbaycan futboluna diqqət bir az da artacaq. Bu ölkədə futbol sevilir, doğru işlər görüləndə istənilən rəqibi keçmək olur.
Eyforiya olmaz, hələ ən çətin sınaq Bakıda olacaq. Ruslar yaralı ayı kimi gələcək, onları qəfəsə salmaq üçün tələ də lazımdı. Onu da Bordin düşünsün.
CAVAD
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?