Ölkə futbolu
Vəzifə yerinə yetirilməyib, arxayınlaşmaq olmaz
2:1 yaxşı hesabdı, amma 2:0-dan pisdi. Son dəqiqə qolu olmasaydı…
2:1 yaxşı hesabdı, amma 2:0-dan pisdi. Son dəqiqə qolu olmasaydı, indi daha rahat dayanmaq, həvəslə “Ayaks”ı gözləmək mümkün olardı.
“Qarabağ” Çempionlar Liqasının 3-cü təsnifat mərhələsində vacib səfər qələbəsi qazandı. Ölkə futbolu adına gözəl qələbədi. Lakin rəqibi nəzərə alsaq, arxayınlaşmaq üçün heç bir əsas yoxdu. APOEL güclüdü və hər an vəziyyət dəyişə bilər. Kiprdə matçın startında etdikləri təzyiqi Bakıda təkrarlasalar, ağdamlıların qol buraxmaq şansı realdı və erkən qol vəziyyəti dəyişə bilər. Ona görə də maksimum konsentrasiya, maksimum diqqət vacibdi. Ev matçına ilk oyun heç-heçəymiş kimi çıxmalıyıq.
Etiraf edək ki, indiki APOEL 7 il öncə “Neftçi”nin yenib, qrupa düşdüyü komanda qədər güclü deyil. Lakin rəqibin heyətində matçın taleyini həll edə biləcək təhlükəli futbolçular çoxdu. Dünən nələrsə alınmadı, Bakıda fərqli oyunla üzləşə bilərik. Yaxşı ki, baş məşqçi Qurban Qurbanov, eləcə də futbolçular bunun fərqindədi.
“Qarabağ” bu mövsüm evdə ancaq qələbə qazanıb, APOEL isə heç vaxt ölkəmizdə yenilməyib. Ağdamlılar da dünənədək səfərdən ancaq heç-heçəylə qayıtmışdı. Bu səbəbdən statistikaları kənara qoyub, oyun haqda düşünməliyik. 90 dəqiqə yüksək səviyyədə mübarizə aparmaq və ən azı Avropa Liqasının qrupuna vəsiqəni təmin etməliyik.
“Qarabağ” oyundan oyuna artırır. Dünən əvvəlki matçlarla müqayisədə daha yaxşı komanda gördük. Amma komanda hələ də vahid mexanizmə bənzəmir, çatımazlıqlar var. Ağdam klubu təkqanad təyyarəyə bənzəyir. Ayltonla Zubirin oynadığı sol cinah əladı, bir-birini tamamlayır, sağda isə Maksimlə Xayme axsayır. Meydanın mərkəzində qərarlaşanlar ağır yük daşısa da, yaradıcılığın yüksək səviyyədə olduğunu deyə bilmərik. Almeydada geriləmə var, Miçel ancaq döyüşür, Slavçev isə zədəli Ozobiçin yerini doldura bilmir.
Mahir Emreli dünən mövsümdəki ən yaxşı oyununu keçirdi. Vurduğu qol kritik dəqiqələrə təsadüf etdi, təzyiq yaradan APOEL üçün soyuq duş oldu. O, bir neçə digər epizodda da əla oynadı, rəqibin hücumunu elə müdafiələrində pozmaq üçün əmək sərf etdi. Onu əvəzləyən Maqaye Qeyenin hələ formada olmadığı aşkar görünürdü, lakin topa ilk toxunuşundaca hesabı artırdı. Düzdü, hər şeyi müdafiəçiləri gicəlləndirən Zubir həll etdi, bununla belə, ötürmənin veriləcəyi yerdə olmağı yüksək səviyyəli hücumçular bacarardı – Qeye də orada idi.
“Qarabağ” yaxşı bir müdafiəçiyə, orta sahə oyunçusuna ehtiyac duyur. Qrup mərhələsi təmin olunan kimi transferləri yekunlaşdırmaq lazımdı. Ehtiyat qüvvə yetərli deyil, Kintana da əvvəlki səviyyədə oynamır. Vaqner da Silva hələlik pis təsir bağışlamır, amma ağdamlıların daha səviyyəli yeni qolkiperə ehtiyacı var. Komanda yaxşıdı, gəl ki, qrup üçün əlavələrə ehtiyac hiss edilir.
Qələbəyə sevinmək üçün tezdi. Hələ pley-offa vəsiqə rəsmiləşməyib. Düzdü, Bakıda 0:1 uduzmaq da sərfəlidi, amma müdafiədə oturub nəticəni qorumaq faciəylə bitər. Əla formada olan Zubir, eləcə də digər cinah oyunçuları əks-hücumlarda çox iş görməli olacaq. Bu şansı əldən vermək olmaz.
Bu nəticə sabah meydana çıxacaq “Neftçi”dən də eyni motivasiyanı gözləyirik. Avrokuboklarda qızıl yayın davam etməsi, 2 komandamızın qruplara düşməsi üçün əla şans var. Davamı gəlsin.
AĞA