Digər idman növləri
75-ci çempionat başlayır
Formula 1 həvəskarlarının həsrətlə gözlədiyi an yetişir. 3 aylıq fasilədən sonra yeni çempionat start götürür. Dünyanın ən bahalı idman növü 75-ci mövsümünə başlayır.
1950-ci ildə ilk dəfə keçirilən sürət yarışı bu il 24 mərhələdən ibarət olacaq. Bu vaxta qədər heç bir çempionatda bu qədər qran-pri olmayıb. Mövsüm bir ərəb ölkəsi Bəhreyndə başlayıb, digərində – Birləşmiş Ərəb Əmirliklərində yekunlaşacaq.
Bu ilin ötən illərdən fərqi çempionatın cümə axşamı başlamasıdır. İlk iki mərhələnin təqvimində dəyişiklik edilib. Sərbəst yürüşlər ənənəvi olaraq cümə günü deyil, cümə axşamından başlanacaq. Yarış isə bazar günü yox, şənbə günü olmalıdır. Bunun səbəbi ilk iki yarışın müsəlman ölkəsində olması və martın 11-də Ramazan ayının başlamasıdır. Beləliklə , həm Bəhreyndə, həm də növbəti qran-prinin məkanı Səudiyyə Ərəbistanında əsas yarış şənbə günü keçiriləcək.
Təqvimdə belə bir qrafik Las-Veqasda da olmalıdır. Sözsüz ki, oradakı dəyişikliyin dinlə əlaqəsi yoxdur. Las-Veqasdakı yarış gecə olduğunudan, bu, dünyanın əksər yerləri üçün bazar ertəsi deməkdir. Məhz bu səbəbdən də orada da start cümə axşamı veriləcək.
Keçən il təbii fəlakət nəticəsində təxirə salınan Emiliya-Romanya qran-prisi bu il baş tutmalıdır. Pandemiya başladıqdan Formula 1-ə həsrət qalan Çində nəhayət ki, mərhələ keçiriləcək (Əlbəttə ki, əgər çinlilər, nəsə yeni bir şey uydurmasalar).
Keçən illə müqayisədə komandaların heyətində dəyişiklik yoxdur. Mövsümü başa çatdıran bütün pilotlar yeni çempionata start verəcəklər. Qışda ən vacib hadisə Lyuis Həmiltonun gələn il “Ferrari”yə keçmə xəbəri olub. Belə olduğuna görə, sürücü bazarında əsas hadisə və yerdəyişmələr yayın sonunda reallaşmalıdır.
Komandaların hansı vəziyyətdə olduğunu cümə günü baş tutacaq təsnifat mərhələsi göstərməlidir. Lakin keçən həftə baş tutan testlər bir çox sualı cavablandıra bilib.
Gözlənildiyi kimi , keçən ilin çempionu “Red Bull”un üstünlüyü yenə də yetərincədir. RB20-nin testlərdəki performansı Avstriya komandasının çempionluğuna olan kiçik şübhələri də aradan qaldırıb. “Red Bull”un digər komandalardan nə qədər üstün olduğunu ən yaxşı Fernando Alonso ifadə edib. “Pelotonda olan 19 nəfər bilir ki, çempion olmayacaq”, – deyə bu sözlərlə ispan pilot Maks Ferstappenin 4-cü dəfə çempion olacağına əminliyini əvvəlcədən bildirib.
Komandada çıxış edən pilotların hər ikisi bolidin idarə edilməsindən razıdır. Həm Ferstappen, həm də Peres maşında inkişaf olduğunu qeyd edir. Yeganə problem yarada biləcək məqam, komandanın icraçı direktoru Kristian Hornerlə bağlı məlum hadisələrdir.
Bir çox ekspertin fikrincə “Red Bull”a ən yaxın komanda “Ferrari”dir. Maranellodan olan mühəndislərin əsas məqsədi bolidin idarə edilməsini təkmilləşdirmək idi. Çox güman ki, onlar buna nail ola biliblər. Ən azından piltolar artıq bundan şikayət etmir. “Cordan” komandasının keçmiş texniki direktoru, Formula 1-in ən nüfuzlu ekspertlərindən biri Qari Anderson, “Red Bull” ilə “Ferrari” arasındakı mübarizənin gərgin olacağını qeyd edib. Onun fikrincə, testlərdə İtaliya komandası tam potensialını göstərməyib. Bu isə daha çox azarkeşləri sevindirir. Keçən ilin darıxdırıcı çempionatından sonra fanatlar daha bir il cansıxıcı yarışlar izləmək istəmirlər.
Ekspertlərin əksəriyyəti 3-cü yerə “Mersedes”i qoyur. Almanlar köhnə şassidən birdəfəlik qurtulublar. Bu mövsüm üçün tam yeni şassi hazırlanıb. Ön antiqanadın qollarının qeyri-adi forması digər komandaların etirazına səbəb olub. Lakin FİA hər şeyin qaydalar çərçivəsində olduğunu bildirib. Maşın həqiqətən də yaxşı görünür. Lakin sürətinin necə olduğunu hələ bilmək mümkün deyil. Ardıcıl dövrələr zamanı “Mersedes” “Ferrari”yə yarım saniyəyə yaxın uduzur. Bu isə yaxşı göstərici demək deyil. Məhz bu səbəbdən də, hələlik “Mersedes” müəmma olaraq qalır.
Əsas məsələlərdən biri, il ərzində Lyuis Həmiltona əvəz tapmaqdır. Yeddiqat dünya çempionunun gedişindən sonra boşalacaq yerə namizədlər çoxdur. Lakin onlar arasında iki nəfər əsas favorit olaraq göstərilir. Birincisi , ikiqat dünya çempionu Fernando Alonsodur. Yaşının çox olmasına baxmayaraq, ispan pilot tibbi testlərdə hamıdan yaxşı göstəricilərə malik olub. Digər namizəd isə Andrea Antonellidir. Ekspertlər onu Maks Ferstappendən sonra peyda olan ən istedadlı pilot hesab edirlər.
Ötən ilin ikinci yarısında böyük sıçrayış edən “Maklaren”dən çox şey gözlənilirdi. Lakin komandada inkişaf əhəmiyyətli dərəcədə deyil. Buna görə də “Maklaren”i ilk 3 komanda sırasına qatmaq olmur. Təqdimat mərasimində komandanın rəhbəri Andrea Stella da planlaşdırdıqlarının hamısını realllaşdıra bilmədiyini qeyd edib.
Keçən ilin startının əsas sürprizi “Aston Martin” olmuşdu. Lourens Strollun komandası ortabab komandadan “Red Bull”un əsas təqibçisinə çevrilmişdi. Mövsümün ortalarına yaxın komandada tənəzzül olsa da, “Aston Martin” ilk 5 yerdən birini tuta bildi. Bəhreyndəki testlərdə maşın fövqəl sürət göstərməyib. Lakin etibarlılıq və dözümlülk yüksək səviyyədə olub. Bəzilərinin fikrincə, komanda əsl sürətini gizlədib. Həmçinin bu şassinin yeniliklər üçün daha açıq olduğu dilə gətirilib.
Pelotonun ikinci hissəsində ən böyük inkişafa RB komandası nail olub. “Alfa Tauri” adını dəyişən komanda autsayderlər zonasının ən güclüsdür. Komanda güclülərlə də mübarizə aparma qabiliyyətinə malikdir. Heyətdə Rikkardo kimi bir sürücünün olması şansları bir qədər də artırır.
Deyilənlərə görə, RB-nin güclənməsində “Red Bull”un da rolu var. Əsas komanda öz filialına müəyyən aspektlərdə yardım edib.
Testlərdə özünü yaxşı tərəfdən göstərən digər komanda “Kik-Zauber”dir. Komandanın texniki direktoru Ceyms Kinin sözlərinə görə, keçən ilin maşından əsər-əlamət qalmayıb. Yeni bolid testlərdə daha sabit olub.
“Haas” komandasının keçən il əsas problemlərindən biri təkərlərin tez yeyilməsi idi. Təsnifatda Hülkenberq və Maqnussen yaxşı nəticələr göstərərək final sessiyasına da keçirdilər. Lakin yarış zamanı təkərlər yüksək yer tutmağa imkan vermirdi. Qış fasiləsi zamanı ən xoş xəbərlərdən biri, məhz bu problemin aradan qalxması olub. Bolid artıq əvvəlki kimi təkərləri tez yemir. Bu isə irəliləyiş deməkdir.
Testlərdə ən az məsafə qət edən komanda “Vilyams” olub. 300 dövrə qət etməyən yeganə komanda kimi “Vilyams”da inkişaf görünmür. Çox güman ki, potensial keçən ilin səviyyəsindədir. Komandanın əsas məqsədi sonuncu olmamaqdır.
“Vilyams”ın aqibəti son illər bəlli olduğu halda, komandadan gözləntilər də çox olmur. “Alpin” də isə vəziyyət fərqlidir. İddiası çox olan Fransa komandası irəliyə deyil, geriyə getməklə məşğuldur. Çempionluq ambisiyasına malik komanda sondan birinci olmağa çox yaxındır. Almaniyanın “Auto Motor und Sport” nəşrinin yazdığına görə, yeni maşın komandada çalışanların özlərini də məyus edib. Zəif aerodinamika və artıq çəki yeni bolidin əsas qüsurlarından hesab edilir. Məlumata görə, ilk yarışlarda problemlər ciddi olaraq qalsa, yeni istefalar baş verəcək. Bu isə “Alpin”in son illərdə bacardığı ən yaxşı işdir.
2024-cü ilin təqvimi
2 Mart. Bəhreyn
9 mart. Səudiyyə Ərəbistanı
24 mart. Avstraliya
7 aprel. Yaponiya
21 aprel. Çin
5 may. Amerika Birləşmiş Ştatları, Mayami
19 may. İtaliya, Emilia-Romagna
26 may. Monako
9 iyun. Kanada
23 iyun. İspaniya
30 iyun. Avstriya
7 iyul. Böyük Britaniya
21 iyul. Macarıstan
28 iyul. Belçika
25 avqust. Niderland
1 sentyabr. İtaliya, Monza
15 sentyabr. Azərbaycan
22 sentyabr. Sinqapur
20 oktyabr. Amerika Birləşmiş Ştatları, Ostin
27 oktyabr. Meksika
3 Noyabr. Braziliya
23 noyabr. Amerika Birləşmiş Ştatları, Las-Veqas
1 dekabr. Qətər
8 dekabr. Birləşmiş Ərəb Əmirlikləri
İLQAR AĞAYEV