Dünya futbolu
“Qarabağ”, izləyiciləri və qalanları
Bir aydan çoxdu qələbə üzü görməyən “…
Bir aydan çoxdu qələbə üzü görməyən “Qarabağ” tilsimi qırdı. Dünən 13-turun bağlanış matçında üstün olan ağdamlılar yenə zirvədədi və ən yaxın izləyicisini 8 xal qabaqlayır.
Doğrusu, bəzən adama elə gəlir ki, ağdamlılar qalib gəlməməklə də çempion ola bilər. Çünki rəqiblər o qədər qeyri-sabit oynayır ki, ciddi narahatçılıq üçün əsas olmur. Əsas rəqiblər 13 oyunun yarıdan çoxunda – 7-də xal itirib ki, bu da çempionluq arzusunda olan kimandalar üçün çox pis göstəricidi. Ötən tur “Keşlə uduzmuşdusa, bu dəfə “Neftçi” qələbəyə həsrət qaldı.
Ümumiyyətlə, turnir cədvəlində qütbləşmə dərinləşir. Ağdamlılar izləyicilərindən nə qədər üstün görünürsə, “Keşlə” ilə “Neftçi” də digərləri üçün əlşatmazdı. Sanki heç kim ilk “üçlüy”ə deşmək istəmir. Və 4-cü yerlə sonuncu pilləni bir-birindən 5 xal ayırır. Kubokda sürpriz qalib olmasa, avrokuboklara 4-cü vəsiqə uğrunda mübarizəni 5 komandanın hamısı sonadək aparacaq.
Bu tur “Sumqayıt” vəziyyəti dəyişə bilərdi. Lakin “Keşlə” ev oyununda “kimyaçılar”ın boyundan hündürə tullanmasına imkan vermədi. Bakılılar erkən qollarla üstünlük qazandı, qalan dəqiqələrdə isə hesabı qorumaqla məşğul oldu. Tərlan Əhmədovun yetirmələri “Zirə” şokundan sonra düşərli Bayılda özünə gəldi.
Elə bu qəsəbədəki digər oyunda isə “Neftçi” əla şansı qaşırdı. Ertəsi gün oynanılan matçda paytaxt təmsilçisi çox ciddi heyət sıxıntısı çəkən “Səbail”i yenə bilmədi. “Dənizçilər” bir çox aparıcı oyunçusunun xidmətindən məhrum olsa da, start heyətini çətinliklə formalaşdırsa da, hətta qələbə qazanmaq imkanı var idi. Ağabala Ramazanov özü qazandığı penalti zamanı topu tora tuşlamasaydı, indi Roberto Bordinin komandası 2-ci pilləyə şərik deyildi. İtaliyalı mütəxəssis əlindəki zəngin heyətdən faydalana bilmədi və matç qolsuz bitdi.
Ötən tur “Qarabağ”a mövsümdəki ilk məğlubiyyətini yaşadan, bu dəfə isə “Keşlə”yə təslim olan “Sumqayıt” kimi “Zirə” də qeyri-sabitdi. Tərlan Əhmədovun yetirmələrini asanlıqla məğlub etmiş “qartallar” bu tur Qəbələ darmadağın oldu. Zaur Həşimov keçmiş komandası ilə oyunda yetirmələrinin bəlkə də mövsümdəki ən zəif çıxışına şahidlik etdi. Əvəzində “qırmızı-qaralar” parlaq oyunla son pillədən xilas oldu. Bu yeri 9 turdu qələbə görməyən “Səbail”ə bağışlayan əyalət klubu qışa xoş əhval-ruhiyyəylə yollanmaq üçün Sumqayıtda eyni uğuru təkrarlamalıdı. Bu, həm də dağılması haqda şaiyələr bitməyən klubun rəhbərliyini də həvəsləndirə bilər.
“Sabah”ın yeni baş məşqçisinin debütü uğursuz olsa da, komandanın liderə qarşı oynadığını unutmamalıyıq. Jelko Sopiç yeni taktiki sxem tətbiq etməklə daha çox müdafiəyə diqqət yetirsə də, “Qarabağ”dan xal almağı bacarmadı. Bu məşqçiyə qiymət vermək üçün hələ vaxtımız olacaq. Lakin daha şən oynamağı bacaran “Sabah”ın kompakt futbola üstünlük verməsi xoşagəlməz yenilik idi. Nəticə olacaqsa, buna göz yummağa dəyər.
Kubok oyunlarından sonra komandalar qışa kimi son tura çıxacaq. Yalnız ilk pillənin sahibi dəyişməyəcək, digər mövqelər isə nəticələrdən asılı olacaq. 3-cü dövrəyə hansı əhvalda başlanacağı məhz bu həftəsonu müəyyənləşəcək.
CAVAD
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- I Liqa2024-04-30 14:45
“Araz Saatlı”nın məşqçisinə 2 oyunluq cəza
- I Liqa2024-05-01 11:25
I Liqada 24-cü turun təyinatları müəyyənləşdi
- Milli komanda2024-05-01 18:44
Milli komandamızın baş məşqçi postuna əsas namizəd bəlli oldu