Ölkə futbolu
“Sumqayıt” paradoksu
“Sumqayıt”ın çempionatın ilk yarısını 4-c&uum…
“Sumqayıt”ın çempionatın ilk yarısını 4-cü pillədə başa vurması ehtimaledilən deyildi. Komandanın xüsusilə də “Zirə” və “Sabah” kimi iddialıları qabaqlaması gözlənilməz oldu. Üstəlik, “Gənclik şəhəri” təmsilçisi çempionatda “Qarabağ”ı məğlub edən yeganə komandadı. Kubokun ¼ finalında isə “Neftçi” ilə səfər matçında qələbə qazanaraq, yarımfinala xeyli yaxınlaşdılar.
Komandanın ilk yarıdakı yaxşı çıxışı, Ayxan Abbasovun xeyli yenilənən heyətlə gördüyü düzgün iş barədə çox danışmaq olar. Ancaq indi diqqət çəkmək istədiyimiz məsələ başqadı.
“Sumqayıt”ın ilk yarıdakı statistikasına baxanda maraqlı məqamla üzləşdik. “Kimyaçılar”la bağlı sözün əsl mənasında paradoks mövcuddu. Necə? İzah edək.
Bilirsiz, bu klubun varoluş məqsədi, yaşama qayəsi milli komandalar üçün baza rolunu oynamaq, yığmalara futbolçu hazırlamaqdı. Bu səbəbdən “Sumqayıt” yaradılandan haqqında belə bir mif formalaşdırılıb: burda legioner oynamır. Əvvəlki məşqçi Samir Abasovun hər dəfə yalnız yerlilərlə işləməyin çətinliyindən danışması elə də uzaq keçmiş deyil. Ayxan Abbasov da eyni sbəbdən tez-tez getmək fikrinə düşür(dü). İndi isə vəziyyət tamam dəyişib. Düzdü, adda yenə “Sumqayıt” ancaq yerlilərdən təşkil olunub, reallıq isə başqadı.
Bu abzasda bir qədər xəyal gücümüzdən istifadə edək, qeyri-standart düşünək. Təsəvvür edin ki, mövsümün ilk yarısında yalnız yerli futbolçuların vurduğu qollar qeydə alınıb. Belə çempionatda legionersiz “Sumqayıt” indikindən 4 xal az toplayar və 6-cı ola bilərdi. Əksinə, ancaq gəlmələrin vurduğu qollar hesaba alınsaydı, legionersiz “Sumqayıt” bir xal çox yığar, 4-cü sırada daha möhkəm yerləşərdi.
İndi bu paradoksal qarışıqlığı bir az açaq. “Sumqayıt” yerli futbolçuları ən az qol vuran komandadı. Onlar cəmi 2 dəfə fərqlənə bilib. Həmin futbolçular da “Sumqayıt”ın öz yetirməsi deyil. Söhbət “Keşlə”dən gələn Sərtan Taşkın və “Qarabağ”dan cəlb edilən Elvin Cəfərquliyevdən gedir.
Əvəzində, “Sumqayıt” gəlmələri ən çox fərqlənən komandadı. Baxmayaraq ki, bu klub legionersizdi, ancaq legionerləri 15 qol vurub, komanda bu göstəricidə “Neftçi”ni də, “Qarabağ”ı da üstələyir.
Özü də təkcə çempionatda belə deyil. Komanda kubokda “Zaqatala”nı da legioner futbolçuların qolları hesabına keçməyi bacarıb. Heç “Neftçi” də yerlilərin xidmətləri hesabına udulmadı.
Elə başa düşülməsin ki, futbolu yalnız qol vuranlarla məhdudlaşdırmaq fikrindəyik. Qətiyyən. Əslində, bu multikultural komandada sistem belə qurulub ki, topu oyuna dağıstanlı daxil edir, türkmən hücumu başlayır, ukraynalı, rusiyalı, başqa bir rusiyalı oyun qurur, israilli ötürür, iranlılar bitiricilik edir və s. Və bilirsiz də, “Sumqayıt”a legioner gətirməyə icazə verilmir axı. (Futbolpress)