Dünya futbolu
Dəqiqəsi 1396 avroya başa gələn Essyen
“Səbail” Maykl Essyendən yaxasını qurtara bilmir. Mali…
“Səbail” Maykl Essyendən yaxasını qurtara bilmir. Maliyyə çətinliyi üzündən yüksəködənişli futbolçularını yola salmağa hazırlaşan, bu üzdən hamıya getməsi üçün müraciət edən klub qanalının əlində qalıb.
İş ondadı ki, “Səbail” rəhbərliyi özünə klub tapan bütün oyunçularıyla müqaviləni qarşılıqlı razılıq əsasında pozmağa hazırdı. Artıq Ağabala Ramazanov “Zirə”yə yollanıb və ona heç bir əngəl yaradılmayıb. Rahid Əmirquliyev “Keşlə”yə keçməyə hazırlaşır, Aleksandr Rıbka və Yevgeni Koçuk klub axtarışındadı. Elə digər futbolçular da müxtəlif klublarla danışıq aparır.
Yalnız Essyenə yiyə duran yoxdu. 37 yaşlı yarımmüdafiəçinin karyerasını başa vurub, İngiltərəyə yollanmaq variantı var. "Çelsi"nin baş məşqçisi Frenk Lempard sabiq komanda yoldaşını yanına dəvət edib. 41 yaşlı mütəxəssis akademiyadakı işlərin təşkilində Essyenin təcrübəsindən yararlanmaq istəyir.
Amma Qana millisinin sabiq üzvü daha çox qazandığı Azərbaycandan ayrılmaq niyyətində deyil. 2020-ci ilin yayına kimi müqaviləsi qalan yarımmüdafiəçi 300 min avroluq anlaşmanı pozmaq istəmir. O, son günə kimi klubda qalmaq, pulunu qəpiyinə kimi almaq fikrindədi. “Səbail” müqaviləni birtərəfli pozarsa da, bu pulu ödəmək məcburiyyətində qalacaq.
İş ondadı ki, Essyen həm də “Səbail”in U-19 komandasının məşqçisidi. Onunla müqavilə bağlayarkən guya gələcəyi fikirləşirdilər. Qanalı həm təbliğat kampaniyasının tərkib hissəsi olmalı, həm də gələcəkdə təcrübəsini komandanın gənclərinə ötürməliydi. Lakin zaman göstərdi ki, o, yalnız pul qazanmaq üçün buradadı. Tez-tez zədələnən, şou tipli tədbirlərdə iştirak etmək üçün səfərlərə çıxan Maykl komandaya heç bir fayda vermədi.
Təsadüfi deyil, Essyen bu mövsüm 14 tur ərzində cəmi 5 dəfə meydana çıxıb. Son matçlarda ümumiyyətlə, adı iştirak ərizəsinə salınmayan qanalı, bu müddətdə üst-üstə 86 dəqiqə meydanda olub. 4 ay ərzində 120 min avronu cibinə qoyan yarımmüdafiəçinin meydanda olduğu hər dəqiqə “Səbail”ə 1396 avroya başa gəlib. Nəinki qolu, hətta məhsuldar ötürməsi də olmayan afrikalı əksər vaxtlarda məğlubiyyət görüb.
İndi bu bahalı oyuncağı atmaq da problemə çevrilib. Essyen daha heç kimə lazım olmayacağını bilir və müqavilədə nəzərdə tutulan pulu qəpiyinə kimi almaqda israrlıdı. “Səbail” isə “uğursuz layihə”dən canını qurtarmağın yollarını arayır. Səriştəsiz idarəçilərin ağılsızlığı üzündən klubun inkişafına, gənclərin yetişməsinə sərf edilməli olan maliyyə beləcə sönmüş ulduza sərf olunur.
FƏRİD
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”
- Ölkə futbolu2024-04-23 08:00
“Səbail” “Sabah”a uduzsa…