Premyer-liqa
"Simurq" mətbuatdan qaçır
Son turda "Bakı"ya 2:3 hesabı ilə məğlub olan "Sim…
Son turda "Bakı"ya 2:3 hesabı ilə məğlub olan "Simurq"un müdafiəçilərinin buraxılan qollardakı müəmmalı səhvləri barədə dünən futbolinfo.az saytında məlumat vermişdik. Hətta həmin qolların videoyazısı da paylaşılmışdı.
Bəs görəsən doğrudanmı, komanda daxilində satqın peyda olub və əgər peyda olubsa, bununla bağlı komanda rəhbərliyi hansı ölçü götürəcək? Bu və digər suallara aydınlıq gətirmək üçün "Simurq"un baş məşqçisi Georgi Çixradze ilə gün ərzində əlaqə yaratmağa çalışsaq da, gürcü mütəxəssis telefon zənglərimizə cavab vermədi.
Belə olan halda klubun icraçı direktoru Vaqif Əliyevə zəng etdik. Əvvəlcə verəcəyimiz sualı dinləyən Əliyev sonradan cavab verməkdən boyun qaçıraraq məsuliyyəti klubun mətbuat xidmətinin rəhbəri Rüstəm Allahverdiyevin üstünə atdı. Amma o, klubun rəsmi mövqeyini öyrənib, açıqlama vermək istəmədi. Allahverdiyev məşqçi və futbolçuların açıqlamalarını almaq üçün əvvəlcə onunla əlaqə yaratmalı olduğumuzu başa salmağa çalışdı. Beləcə, biz "Simurq"un sözügedən məsələ ilə bağlı rəsmi mövqeyini öyrənə bilmədik.
Amma Zaqatala klubunun rəsmiləri başa düşməlidi ki, hazırda bütün futbol ictimaiyyəti "Simurq"un bu oyundakı məğlubiyyətinin əsl səbəbini bilmək istəyir. Bu oyunun bir neçə futbolçu tərəfindən satılıb-satılmadığı barədə xəbərlər həqiqəti əks etdirmirsə, klub olaraq buna rəsmi münasibətinizi bildirib, ictimaiyyəti məlumatlandırmağınız lazımdı. Yox, belə bir şey yoxdusa, yenə də təkzib etmək, bunun bir şayiə olduğunu bəyan etmək çox çətin bir məsələ deyil. Əksinə, sizin bu cür mətbuatdan qaçmağınız, danışmaq istəməməyiniz həm idman mətbuatında, həm də futbol ictimaiyyətində əlavə şübhələrə yol açır. Odu ki, ən qısa zamanda bu xəbərlərlə bağlı mövqeyinizi ortaya qoymağınız yaxşı olardı. Futbolinfo.az olaraq sizə tribuna verməyə də hazırıq.
Sonda isə Rüstəm Allahverdiyev haqda bir neçə kəlmə demək istərdim. Bizə mətbuat xidmətinin səlahiyyətlərinin nədən ibarət olduğunu xatırlatmağa ehtiyac yoxdu. Öz işimizin peşəkarı olaraq, dəfələrlə müxtəlif klub prezidentləri, digər rəsmilər, məşqçilər və futbolçularla ünsiyyətdə olmuşuq. Əgər bu gün hansısa klub rəsmisi və ya məşqçi məsuliyyəti öz üzərindən atırsa və mətbuata açıqlama vermək üçün kimisə qabağa itələyirsə, bu, sizin klubdaxili probleminizdi. Universitetin jurnalistika fakultəsini bitirməklə öyünmək bəs etmir. Adamın gərək dilinə görə, dilçəyi də olsun. Sən daha çox klubun rəsmi internet səhifəsinə diqqət yetir və "azərkeş" sözünün əslində necə yazıldığını öyrən.
KƏMALƏ İSMAYILOVA
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- Ölkə futbolu2024-04-29 20:00
“Baku Sportinq”dən növbəti darmadağın
- Ölkə futbolu2024-04-29 14:17
II Liqada 23-cü turun təyinatları müəyyənləşdi