Premyer-liqa
Azərbaycan futbolunun lazımsızları
Hər bir futbolçunun parladığı kimi, söndüyün…
Hər bir futbolçunun parladığı kimi, söndüyünün də şahidi oluruq. Futbolinfo.az xəbər verir ki, bəzi futbolçular komandalarını dəyişdikdən sonra yeni komandalarına çox rahatlıqla uyğunlaşaraq karyerasını normal şəkildə davam etdirir. Bəziləri isə yeni komandalarında ya heyətə düşə bilmir, ya da düşdüyü heyətdə əvvəlki oyununu göstərə bilmir. Bu siyahıya bir çox futbolçuları daxil etmək olar.
Hazırda Topaz Premyer Liqasında turnir cədvəlinin ikinci pilləsində qərarlaşan "Neftçi"də bu cür topçulardan lazımı qədərdi. Bu ilin yayında Bakı klubunun heyətinə cəlb edilən Pavel Doroşev ümidləri doğrulda bilmir. Latviya "Metallurq"undan Bakıya böyük ümidlərlə gətirilən Pavel mövsüm başlayandan bir dəfə də olsun komandasının qapısını qorumayıb. Sadıq Sadıqovun rəhbərlik etdiyi komandanın uğursuz transerlər siyahısına Melvin Platyenin də adını daxil etmək olar. Hollandiyalı forvard bəzi oyunlarda meydana çıxsa da, yalnız bir dəfə penaltidən rəqib qapısına yol tapa bilib. Hətta, yayılan son məlumatlara görə "Neftçi"nin baş məşqçisi Nazim Süleymanov Platyeni komandadan göndərmək istəyir.
Digər bir Bakı təmsilçisi "İnter"də də bu siyahıya aid olunası futbolçu var. Buna Flavio Beki misal göstərmək olar. Yay transfer pəncərəsində "bankirlər"in heyətinə qatılan Bek istənilən oyunu sərgiləyə bilmir. Görünür, məhz bunun məntiqi nəticəsidi ki, komandanın baş məşqçisi Kaxabar Sxadadze 26 yaşlı braziliyalını əvəzedici heyətə göndərib.
Bu ilin yayına qədər "Qəbələ"nin şərəfini qoruyan Rövşən Əmiraslanov da geriləyən futbolçular qrupuna daxildi. Qəbələ təmsilçisində heç də pis təsir bağışlamayan Əmiraslanov hazırda "Simurq"da sönmə mərhələsindədi. 12 turda cəmi 15 dəqiqə Çixradzenin etibarını qazanan Rövşən digər oyunlarda ehtiyat oyunçular siyahısına da daxil edilməyib.
"Simurq"dan "Qəbələ"yə keçən David Petrkeviç də bu tip futbolçulardandı. Zaqatala klubunda əsas heyətin dəyişməz ismlərindən olan legioner qapıçı yayda "Qəbələ"yə keçməklə bir növ karyerasını pula satmış oldu. Nəticədə o, 12 turun ilk 3 oyununda forma geyməklə kifayətlənib. Ardıcıl 9 oyunda isə yalnız komandasının necə oynamasını izləyib.
Bir vaxtlar "Rəvan"ın uğurları üçün tər tökən Taqim Novruzov bu komandada liderlərdən idi. Ancaq o, hazırda "Simurq"da ehtiyatda "çürüyür". Bayıl təmsilçisinin heyətində demək olar ki, hər oyunda meydana çıxan Novruzov Georgi Çixradzenin başçılığı altında cari mövsümdə cəmi 4 dəfə meydana çıxıb.
Ötən mövsüm "Qarabağ"ın formasını geyinən Zaur Həşimov cari mövsüm "Sumqayıt"a kömək edə bilmir. Belə ki, Həşimov "Gənclik şəhəri" təmsilçisinin heyətində yalnız bir oyunda 90 dəqiqə meydanda olub. Aqil Məmmədovun komandasında müdafiəçinin debütü cəmi 15 dəqiqə olub. Bir neçə dəfə komandasına ehtiyat oyunçular skamyasından dəstək olsa da, əksər oyunlarda yalnız tribuna tamaşaçısı rolunu oynayıb.
"Rəvan" bir müddət əvvəl Holster Fredriki heyətinə cəlb etmişdi. İsveçli futbolçu komandaya heç cürə xeyir verə bilmir. 25 yaşlı yarımmüdafiəçi cari mövsümdə iki dəfə meydanda mübarizə aparıb ki, hər iki ounda əvəzetmədən oyuna daxil olub. Bu oyunların birində isə Fredrik matçın 94-cü (!) dəqiqəsində meydana daxil olub.
Əslində bu siyahını uzatmaq da olardı. Amma çempionatımızdakı ümumi mənzərəni ortaya çıxarmaq üçün yuxarıda sadaladıqlarımızın da kifayət etdiyini düşünürük. Həm yerli, həm də əcnəbi futbolçuların daha çox forma şansı qazandığı, əsas heyət üzvü, lideri olduğu komandanı pula görə daha imkanlı kluba dəyişib, ehtiyatda qalmasını qətiyyən başa düşmək olmur.
Legionerlərlə bağlı vəziyyət isə ümumiyyətlə anlaşılmazdı. Çünki burda həmin futbolçularla yanaşı, onları transfer edən klublar da günahkardı. Tutaq ki, onları ancaq pul qazanmaq düşündürür. Bəs bizim klub başbilənləri hara baxırlar? Nəinki transfer olunduqları klublara, ümumiyyətlə Azərbaycan futboluna heç bir xeyri olmayan bu legionerləri bir ucdan futbolumuza sırımaqdansa, öz gənc futbolçularımıza şans vermək daha yaxşı olmazdımı? Hər halda, fikirləşməyə dəyər. Ən azı bu cür səhvləri bundan sonra təkrarlamamaq haqda…
RÖVŞƏN ƏHLİMANOĞLU
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?