Ölkə futbolu
AFFA-da “islahat” planı: ssenari hazırdı
Elxan Məmmədov AFFA-ya Rövnəq Abdullayevdən bir il öncə gəlib. Hadisələrin gedişi göstərir ki, o, Ramiz Mirzəyev kimi, növbəti prezidenti də yola salacaq. Xəyanət planı hazırlanıb, “yuxarıların məsləhətidi” kod adıyla reallaşması üçün son dekorasiyalar qurulur.
Məmmədovun yalnız öz karyerasını düşündüyü heç kimə sirr deyil. Abdullayev kimi məmurların kölgəsində təcrübə yığan, lazım gələndə onların nüfuzundan istifadə edərək düşmənlərini sıradan çıxaran baş katib yeni mərhələyə qədəm qoyur. O, indiyədək Azərbaycan futbolunun de-fakto rəhbəri olsa da, artıq postu de-yure ələ keçirmək üçün fəaliyyətə başlayıb.
Himayədarı, AFFA-da və SOCAR-da vitse-prezident olan Elşad Nəsirovun sayəsində pillələri bir-bir qalxan Elxan bəy hələ ötən il prezident postuna doğru inamlı addım atmışdı. Onun AFFA-nın Konfransında özü üçün təsis etdirdiyi vitse-prezident postuna təyinatı təsadüfi deyildi. Buna kimi Nizamnamədə dəyişikliyə nail olmuş və icraçı vitse-prezident postunun səlahiyyətlərini prezidentin səlahiyyətləri ilə bərabərləşdirmişdi. Maraqlıdı ki, idarəetmədə baş katib də eyni dərəcədə pay aldı və Məmmədov bu postu da kimsəyə güzəştə getmədi, 2 vəzifədə eyni vaxtda çalışmağa davam edir.
Əslində, bunun özü anormallığdı. Çünki baş katibi postuna İcraiyyə Komitəsi təsdiq edir, katiblik İK qarşısında hesabat verir. Məmmədov isə hər iki qurumda əsas şəxsdi. Deməli, Məmmədov Məmmədovu təyin edir və Məmmədov Məmmədova hesabat verir. Bu fakta gülmək, yoxsa ağlamaq lazımdı? Məsləhət özünüzündü…
Beləcə futbolda hakimiyyəti tamamilə ələ keçirən Məmmədov istəyinə hiyləgərliklə və hamilərinin dəstəyi ilə çatdı. Abdullayev Nəsirovdan ciddi şəkildə ehtiyatlanır, qorxur, ona görə də “boz kardinal”ın liderlik etdiyi klanla pis olmaqdansa, bütün məsləhətlərə “baş üstə” deyir. Onun işi pul ayırmaq, amma idarəçiliyə qarışmamaqdı. Rövnəq bəyə indiyədək müəyyən rol biçilib, o da boynunu bükərək razılaşıb.
Məmmədov şəxsi karyerasını inkişaf etdirmək, eyni zamanda Nəsirova xidmət etmək üçün dəfələrlə Abdullayevə xəyanət edib. Amma indiyədək bunu gizli şəkildə edirdisə, indi artıq açıq döyüşdən də çəkinmir. SOCAR-da edilən dəyişikliklərdən sonra Abdullayevin mövqeləri zəifləyib və Elxan bəy əməli fəaliyyətə başlayıb.
Məmmədovun xəyanətkar planına görə yayda – AVRO-2020-nin Bakıdakı oyunları yekunlaşan kimi çevriliş baş tutacaq. Sözügedən tədbirlərdə yüksək rəhbərlik qarşısına qəhrəman kimi çıxarılacaq Elxan bəy, hamisi Nəsirovun təqdimatıyla özünə tacqoyma mərasimi təşkil etmək üçün icazəni alacaq. Təbii ki, Məmmədovun təqdimatını futbol ictimaiyyəti, mətbuat etsəydi, onun 14 il ərzindəki günahları ön plana çıxar, baş katibin hətta barmaqlıqlar arxasına kimi yolu uzanardı. Nə yazıq ki, futbolun Nəcməddin Sadıkovunun hamilərinin əli hər yerə çatır, bu səbəbdən karyerasının yüksəlişi planlaşdırılır.
Düzdü, haqqında illərlə tənqidlər yazılan və yalnız indi həbs edilən, vəzifədən çıxarılan məmurlar kimi Elxan bəy də bir gün ifşa olunacaq. Lakin hələlik onun dövranıdı. Yüksək vəzifə sahibi olan qohum-qardaşının və hamilərinin kölgəsində eyibləri gizlədilən, mələk kimi təqdim olunan bu şəxs artıq AFFA prezidenti postuna əsas namizəddi.
Doğrudu, Məmmədovun bir qulağı Gənclər və İdman Nazirliyindədi. Çoxdan gözünü nazir postuna dikən Elxan bəy Azad Rəhimovun səhhətiylə bağlı arzu etdiyi xəbəri həvəslə gözləyir, eyni zamanda futbol təsərrüfatını əldən buraxmır. SOCAR-ın Müşahidə Şurası tam gücüylə işlədikdən, maliyyəyə nəzarət etdikdən sonra daha Abdullayevə ehtiyac qalmayacaq. Belədə SOCAR yenə sponsorluq edəcək, lakin prezident Elxan Məmmədov olacaq.
Plan bundan ibarətdi. Rəhbərinə xəyanət edən Məmmədov xeyli böyüyüb, əli lazım olan yerlərə çatır. Bu səbəbdən Rövnəq bəyi tərifləyə-tərifləyə devirmək üçün ssenari yazılıb, qalır tamaşanı ekranlaşdırmaq.
Elxan bəy prezidentliyə müsbət ab-havada başlamaq niyyətindədi. Bu səbəbdən “Kəpəz”lə “Turan-Tovuz” rəhbərliyinə gizlicə Premyer Liqaya hazırlaşmaları barədə tapşırıq verilib. Bölgə klublarını illərdi güclülər dəstəsinə həsrət qoyan Məmmədov məhz AFFA prezidenti olduqdan sonra Premyer Liqa iştirakçılarının sayını 10-a yüksəldəcək ki, bununla indiyə qədər buna Abdullayevin mane olduğunu, özü gəldikdən sonra problemləri həll etdiyini deyə bilsin.
FƏRİD
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-22 08:34
Musa “Yurqorden” dəftərini bağladı?
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”