AFFA-nın yeni nağılı: qonşudan gələn aşla qarın doymaz

Yığma komandalarda növbəti milliləşmə dalğasına hazırlaşan AFFA problemlə üzləşib. Ölkə xaricində çıxış edən həmyerlilərimizi milli komandaya qatmağa çalışan qurum, arzusuna çata bilmir. İnşallah, çatmaz da. Çünki onlardan xeyir gəlməyəcəyinə əminəm, pulumuza, zamanımıza və ümidlərimizə heyifdi.

Uşaq futbolundakı sistemsizlik, səriştəsiz idarəçilik üzündən yeni nəsil yetişmir. AFFA, klublar yalnız say düzəltməklə məşğuldu, illər boşa verilib, indi isə milli komandada oynamağa layiqli namizədlər tapılmır. Assosiasiya günahlarını pərdələmək üçün ölkə xaricinə üz tutub.

Vaxtilə dağıstanlıları, türkiyəliləri, ukraynalıları, rusları, iranlıları, hətta braziliyalıları, nigeriyalıları müxtəlif yollarla millimizə calaq edən AFFA onlardan xeyir görmədi. Daha sonra Azərbaycana qondarma tellərlə bağlılığı olan anqolalı Eddi İsrafilov, qazaxıstanlı Dmitri Nazarov və başqaları böyük pullar qarşılığında yığmamızda oynadıldı.

Artıq bu oyunçuların vaxtı bitib, faydasız olduqları isbatlanıb. Və AFFA “gəncləşmə” bəhanəsi ilə zaman udmağa cəhd edir, yeni adlarla fikir yayındırır. Halbuki adı sıyahıda olan, danışıqlar aparıldığı bəh-bəhlə qeyd edilənlər hətta Premyer Liqa klublarımızı gücləndirmək iqtidarında deyil.

AFFA illər ərzində özünü elə təqdim edib ki, hamı bu quruma pul dağarcağı gözü ilə baxır. Əksəriyyət millimizin durumunu görüb, onun formasını geymək istəmir, gələnlər isə sərvət tələb edir.

Məsələn, Kamran Əliyevlə danışıqlar dalana dirənib. “Ximki”nin oyunçusu AFFA-dan 200 min dollar tələb edir (sportinfo.az). Hazırkı klubunda heyətə düşə bilməyən, bununla belə, Rusiyadakı perspektivini nəzərə alan gənc millimizdə forma geymək müqabilində varlanmaq niyyətindədi. O, yığmamızda oynadıqdan sonra yaşadığı ölkədə legioner sayılacağını, heyətə düşməsinin bir qədər də çətinləşəcəyini anlayır, bu üzdən karyerasını “sığortalayır”.

Maraqlıdı ki, Kamran Rusiyadan kənara çıxmaq da istəmir. AFFA digər bir ölkədə karyerasını davam etdirməsinə yardımçı olacağını vəd edir, o isə bununla da razılaşmır. Yəqin Emin Mahmudov, Ramil Şeydayev kimi futbolçuların acı təcrübəsindən xəbərdardı və Riad Rəfiyevin tapacağı klubların yalnız vasitəçilərin işinə yarayacağını, özünün isə futbolçu kimi məhv olacağının fərqindədi.

Kamran və onun kimi digər gənclərə böyük pullar xərcləmək lazım deyil. Rüfət və Renat Dadaşov qardaşları həqiqətən istedad sahibi olsaydı, kiçik yaşlarında Almaniya millisinə düşdükdən sonra Azərbaycanı seçməzdilər, buna almanlar da imkan verməzdi. Müəyyən yaş həddinə çatdıqdan sonra onların hansı səviyyəyə sahib olduqları aydınlaşdı, karyeralarındakı yüksəliş bitdi. Belədə AFFA rəsmilərinin səriştəsizliyi üzündən perspektiv vəd etməyən qardaşlara 1,5 milyon avro ödəndi. Və onlar illərdi millimizdədi, nə düz-əməlli Avropa klubunda oynayırlar, nə də yığmaya xeyir verirlər.

AFFA acı təcrübəsini xatırlayıb, xaricdə yaşayan həmyerlilərimizə pul ödəməməlidi. Öz qazancları, faizləri naminə buna şirnikləşsələr də, assosiasiyanın əsas sponsoru SOCAR, bu qurumun yeni yaradılan Müşahidə Şurası izafi xərclərə imkan yaratmamalıdı. Adı millimizlə yanaşı çəkilən digər oyunçuları – Anatoli Niruyev və Rüstəm Əhmədzadəni araşdırmışıq, heç biri yüksək istedad sahibi deyil, ani qığılcımdı, hansısa sıradan xarici klubda – adı əksəriyyətə tanış olmayan “Minay”da oynamaları yığmamıza gətirilmələri üçün əsas ola bilməz. 6 yaşlı “Minay” həvəskar klub olub, hansısa biznesmenin bahalı oyuncağıdı və tezliklə tarixin yaddaşına köçəcək. Belə klublara, onların üzvlərinə ümid olmamalıyıq.

Hansısa sıradan futbolçu üçün yüzminlər xərcləməkdənsə, həmin vəsaiti uşaq futboluna yönəltmək, yeni akademiyalar tikmək, məşqçi-müəllimlərin hazırlığına, təhsillərinə diqqət etmək lazımdı. Uşaq komandalarını xarici toplanışlara, məşqçiləri kurslara, seminarlara göndərmək, təbii inkişafa nail olmaq vacibdi. 14 ildi süni inkişaf nağıllarıyla aldadılmışıq və bu gün milli komandada oynatmağa hətta yetərli sayda futbolçu tapılmır.

Yeri gəlmişkən, Kamranı və başqalarını AFFA-dan pul istəməsinə görə qınamıram. Kiminsə vətənpərvərlik damarı tutmasın, milli komanda Elxan Məmmədov və dəstəsinin sayəsində elə səviyyəyə endirilib ki, indi orada oynamağı kimsə özünə şərəf bilmir. Pula gəlincə, niyə anqolalı Eddi İsrafilov üçün büdcədən 1 milyon avro çıxarılır, Kamrana çatanda mümkün olmur? Dmitri Nazarov, Usim Nduka, Ernani Pereyra, Andre Ladaqa və başqaları pul qazana bilər, əsl azərbaycanlı balası yox? Millini supermarket modelinə Elxan Məmmədov çevirib, fəsadlarına qatlaşmalıdı.

Ən doğrusu, belə oyunçuları ümumiyyətlə, axtarmamaqdı. Ölkədə sistemli işlər görmək, istedadları üzə çıxarmaq, yetişdirmək lazımdı. Qonşudan gələn aşla qarın doymaz.

AĞA