AFFA üçün təbliğat imkanı – top Elxan Məmmədovdadı

Şanlı ordumuz işğal altındakı torpaqlarımızı azad etməyə davam edir. Hər gün hansısa kəndin, şəhərin, yüksəkliyin və digər strateji məntəqələrin düşməndən təmizlənməsi haqda xəbər alırıq.

Siqyasi meydanda da uğurlarımız sıralanır. Dövlət rəhbərliyi haqqımızı beynəlxalq arenada arayır və hətta qərəzli tərəfləri susdurmağı bacarır, onları bizimlə hesablaşmağa məcbur edir. Düşünülmüş, davamlı siyasi gedişlərlə bizi təzyiq altında saxlamağa çalışan bütün tərəflər neytrallaşdırılıb. Hamı haqq davasında olduğumuzu qəbul etməyə başlayıb, dəstək verənlər bir yana, indiyədək bizə qarşı olanların da ən azı neytral mövqe tutmasını mümkünləşdirmişik.

Hamı gücü çatdığı qədər iş görməyə, addımlar atmağa çalışır. Xalqla dövlətin birliyinin nəticəsi bütün sahələrdə hiss olunur, təxribat meyllərinin qarşısı alınır, hamının diqqətinin orduya yönəlməsinə nail olunur. Əsgərlərimizə hərtərəfli dəstək var və onlar da inamı doğruldur, canları, qanları ilə müqəddəs missiyanı qələbəylə yekunlaşdırmaq üzrədilər.

Futbol ictimaiyyəti proseslərdən geri qalmamağa çalışır. Ön cəbhədə döyüşən “Qəbələ” nin prezidenti Fariz Nəcəfov, müxtəlif yardım aksiyalarına qoşulan digər klub rəsmiləri, mühüm açıqlamaları ilə diqqət çəkən xeyli futbolçu var. Hətta bəzi klubların indiki və sabiq legionerləri də haqq işimizə dəstək nümayiş etdirir, açıqlamalarında həqiqətləri söyləyir, sosial şəbəkə hesablarında müxtəlif paylaşımlarla töhfə verirlər.

Təəssüf ki, bu baxımdan daha çox iş görməli olan AFFA sakit dayanmağı lazım bilir. Bir-iki yalançı “yazışma xəbərləri” istisna olmaqla, onların fəaliyyətləri barədə ciddi fakt görmürük. Hətta milyonlar hesabına yığma komandalarımıza cəlb olunmuş milliləşdirilmiş futbolçuları çıxış etdikləri ölkələrdə açıqlama vermir, Qarabağ həqiqətlərini dünyaya çatdırmır, təbliğata qatılmırlar. Onların diaspor təşkilatlarımızın təşkil etdiyi yürüşlərə, aksiyalara qoşulmaması, yalnız öz qazanclarını, karyeralarını düşünmələri də təəssüf doğurur. Halbuki erməni futbolçular Henrix Mxitaryanın timsalında fərqli fəaliyyətlə məşğuldu, çıxış etdiyi klubun yardımına belə nail olub.

Başqa vaxt Rusiya ilə əlaqələrini gözə soxan Kazbek Tuayev, Gürcüstanda biznes layihələrinə rəhbərlik edən Mahir Məmmədov və başqa İcraiyyə Komitəsi üzvləri gizlənib. İK üzvü olan sabiq xarici işlər naziri Elmar Məmmədyarov isə hətta siyasi şərhlərini də əsirgəyir, görünür, problemin bu qədər uzanmasında öz günahını bildiyi üçün üzə çıxmamağı lazım bilir.

Anlayırıq, AFFA rəhbərliyinin bəhanəsi var, FIFA və UEFA-nın siyasətə qarışmamaq tələbinə uyğun olaraq bəyanatlardan çəkindiklərini deyəcəklər. Lakin illərdi heç bir iş görmədən kreslo isidib, milyonlar qazananlar ən azı vətəndaş mövqeyi sərgiləyə, proseslərə Azərbaycan vətəndaşı kimi münasibət bildirə bilərlər. Etmirlər!

AFFA-nın bəhanəsinə son qoymaq üçün quruma təklifimiz var. Yəqin ki, bunu etsələr, həm beynəlxalq təşkilatlardan qınaq eşitməzlər (əksinə, sülhə çağırış jesti kimi onların addımı alqışlanar), həm də Vətən savaşında dünya ictimaiyyətini bilgiləndirmək baxımından iş görmüş olarlar.

Ali Baş Komandan İlham Əliyev gələcəkdə Qarabağda ermənilərlə birgə yaşamağımızın mümkün olduğunu dilə gətirir, nümunə göstərir, siyasi təzyiqlərə, böhtan kampaniyasına, düşmənin qarayaxmalarına humanist addımlarla cavab verir. Cənab prezident tamamilə haqlıdı, bizim heç kimlə problemimiz yoxdur, torpaqlarımızı azad etmək istəyirik və hətta düşmənlə də bir yerdə yaşamağa hazırıq. Bir şərtlə ki, onlar ərazi bütövlüyümüzü qəbul etməli, bizimlə eyni şərtlər altında yaşamalı, çalışmalıdı.

Günlərdi mətbuat prezidentin dediklərinin həqiqiliyini göstərmək üçün ölkəmizdə yaşayan ermənilərdən açıqlamalar alır, müsahibələr yayımlayır. Bizimlə birgə yaşamasına şərait yaratdığımız 30 minlik Azərbaycan ermənisi də deyilənləri təsdiqləyir, hətta müharibəyə rəğmən, indiyədək hər hansı ayrıseçkiliklə üzləşmədiklərini etiraf edir. Bakıda, Gəncədə, Tovuzda bizlərdən biri kimi ömür sürən ermənilərin onlarca açıqlamasını oxumuşuq, izləmişik.

Erməniləri sülhəməcburetmə əməliyyatları davam edərkən həm də bu təbliğatla düşmənin bəhanələrini kəsməliyik. AFFA həqiqətləri dünya ictimaiyyətinə çatdırmaq, sülhsevər xalq olduğumuzu isbatlamaq üçün unikal şansa malikdi.

Əksəriyyətə bəllidi ki, ailəsində erməni olan, bu xalqla qohumluq bağları quran xeyli futbol adamımız var. Onlar arasında çox önəmli postlar tutanlar, illərdi heç bir problem yaşamadan bu təsərrüfatda çalışanlar, milli komandamızda işləmiş və oynamışlar da var. Bu gün həmin insanlar efirə çıxmalı, mətbuatda görünməli və sadəcə, həqiqətləri deməlidilər. Onların yalançı təbliğatı lazım deyil, reallığı dilə gətirmələri kifayətdi. Anası, nənəsi, özünün və qardaşının həyat yoldaşı erməni olmasına baxmayaraq, heç bir əngəllə rastlaşmadan hətta ən yüksək postlara layiq bilinmələrini, xoşbəxt, şad-xürrəm yaşamalarını, çalışdıqlarını bəyan etməlidilər. Qoy, dünya ictimaiyyəti, elə ermənilər də görsün ki, biz düşmənçilik aparmırıq, monoetnik ölkə olan Ermənistandan fərqli olaraq, milliyyət seçmi etmədən bacarıqlıları ən başda əyləşdiririk.

AFFA-nın icraçı vitse-prezidenti Elxan Məmmədov onların siyahısını dəqiq bilir, əksəriyyəti ilə hər gün oturub-durur. Zəhmət olmasa, öz eyiblərinizi örtmək üçün sizə lazım olanda danışdırtdığınız bu adamları yenə səhnəyə çıxarın. Qoy, bu dəfə Vətənimiz, ali məqsədlərimiz üçün həqiqətləri desinlər. Bunu siz etməsəz, müharibədən sonra biz edəcəyik. Amma o zaman onları satqın, vətən xaini kimi təqdim etməli olacağıq. Elxan bəy, ötürməni etdik, top sizdədi…

FƏRİD