Alimi avtoqoldan məyus deyil: “Mövsümü kubokla başa vurmaq gözəl olardı”

“Qəbələ”nin şimali makedoniyalı yarımmüdafiəçisi İsnik Aliminin futbolinfo.az saytına müsahibəsi

– Premyer Liqanın 23-cü turunda “Sumqayıt” üzərində həm 2:1 hesablı qələbə qazandınız, həm də avtoqol müəllifi oldunuz…

– Oyun zehniyyəti çox çətin idi. Buna qədər Premyer Liqada 6 matç idi ki, qələbə qazana bilmirdik. Buna görə də qalibiyyət hər şeydən vacib idi. Aktivimizə 3 xal yazdırmağımız üçün avtoqol amilinə çox önəm vermirəm.

– Avtoqol epizodunda top sizə dəyərək qapıya daxil oldu. Qapıçı ilə aranızda anlaşılmazlıq yarandı?

– Bəli, bir-birimizi səhv başa düşdük və top tora düşdü. Həmin anda bəxtimiz də gətirmədi. Qələbə hər şeydən vacib idi ki, bunu da qazandıq.

– Bu qələbə sayəsində 4-cü pillədəki “Zirə” ilə aradakı xal fərqini 1-ə endirdiniz. Bu mənada “Sumqayıt”la matçı 6 xallıq oyun saymaq olar?

– Doğrudur, 6 xallıq oyun idi. Bunu görüşdən əvvəl bilirdik. Ona görə də yalnız qalibiyyətə köklənmişdik. Bunun nə dərəcədə əhəmiyyətli olduğunu dərk edirdik.

– Qış fasiləsində cəmi bir transfer etdiniz. Bu heyət 4-cü yer uğrunda sona qədər mübarizə aparmaq üçün kifayət edəcək?

– Düşünürəm ki, yeni transferimiz komandaya böyük kömək olacaq. Əyyub Allaşın yüksək bacarığı var. Komandaya uyğunlaşmasına vaxt lazımdır. İnanıram ki, biz bunu bacaracağıq.

– Növbəti turda “Səbail”, daha sonra isə “Qarabağ”la qarşılaşacaqsınız. Razısınız ki, “Qarabağ”la oyunöncəsi “Səbail”i məğlub etmək psixoloji baxımdan çox vacibdir?

– İndi yalnız “Səbail”lə qarşılaşmanı düşünürük. Çətin oyun olacaq. “Səbail” öz meydanında “Zirə”ni məğlub edən komandadır. Yalnız onlarla görüşdən sonra “Qarabağ” barədə fikirləşəcəyik. Addım-addım irəliləmək istəyirik.

– Konfrans Liqasına vəsiqə qazanmaq üçün seçim etməli olsanız, Premyer Liqada 4-cü yeri tutmağı, yoxsa Azərbaycan Kubokunu qazanmağı üstün tutardınız?

– Hər ikisini seçərdim. Çempionatı 4-cü pillədə bitir və Azərbaycan Kubokunu qazan. Lakin hesab edirəm ki, ən yaxşısı Azərbaycan Kubokunu qazanmaqdır. Mövsümü kubokla başa vurmaq gözəl olardı. İstənilən halda, hər iki cəbhədə maksimum gücümüzü ortaya qoymalıyıq.

– Karyeranızın böyük hissəsini İtaliyada keçirmisiniz. Azərbaycan millisinin italiyalı baş məşqçisi Canni de Byazinin rəhbərliyi altındakı çıxışını necə qiymətləndirərdiniz?

– De Byazi Azərbaycan yığmasında yaxşı iş görür. Hər kəsin zamana ehtiyacı var. Bu, normaldır. Azərbaycan millisinin son nəticələri də yaxşıdır. Komanda ardıcıl qələbələr qazanıb. Azərbaycan millisinə və onun baş məşqçisinə qarşıdakı matçlarda uğurlar arzulayıram.

ABBAS