Arif Əsədov: “Düzgün oyunla Avstriyadan xal götürə bilərik”

Futbol üzrə Azərbaycan millisinin məşqçisi Arif Əsədovun Futbolinfo.az saytına müsahibəsi

• Yığmamız Avropa çempionatının seçmə mərhələsi çərçivəsində oktyabrın 13-də Estoniyanın qonağı olacaq, bundan 3 gün sonra isə Avstriya millisini qəbul edəcək. Bu görüşlərdə hansı nəticəyə ümid etmək olar?
• Qrupumuzda favorit komandalar Belçika və Avstriyadır. İsveçi də bu siyahıya qatmaq olar. Bizim Estoniya ilə reytinqimiz, səviyyəmiz eyni olduğu üçün daha çox 4-cü yer uğrunda mübarizə aparmağımız realdır. Hazırda qrupda estonlarla xallarımız da bərabərdir. Bu səbəbdən Estoniya ilə səfər matçına çox ciddi hazırlaşacağıq. Baxımlı oyun göstərərək, ölkəmizə yaxşı nəticə ilə qayıtmağı düşünürük. Avstriya ilə matça gəlincə, dediyim kimi, bu rəqib qrupun favoritlərindəndir. Əsas fikrimizi ilk növbədə Estoniya ilə oyuna yönəltmişik. Bu görüşdən sonra Avstriya ilə matç haqda düşünəcəyik. Estoniyada qeydə alınacaq nəticədən də çox şey asılıdır. Səfərdən yaxşı ab-hava ilə qayıda bilsək, Bakıda Avstriyadan xal almaq da mümkün ola bilər. Yığmamız buna qadirdir. Futbolçularımız Belçika ilə görüşdə də göstərdilər ki, yaxşı oynamaq olar. Təbii ki, bizimlə müqayisədə avstriyalı futbolçuların ustalıq səviyyəsi daha yuxarıdır. Bu baxımdan onlardan geri qalsaq da, istəkli, mübariz və taktiki cəhətdən düzgün oynayıb Avstriyadan xal götürə bilərik.
• “Qarabağ” Avropa Liqasının qrup mərhələsi çərçivəsində oktyabrın 5-də İsveçin “Hekken” klubunun qonağı olacaq. Son vaxtlar qələbələri sıralayan “köhlən atlar”ın bu görüşdən hansı nəticə ilə ayrılacağını gözləyirsiniz?
• “Qarabağ”ın son matçlardakı performansı hamımızı sevindirir. Getdikcə oyun formasına düşürlər. Komandanın bir çox futbolçusu ondan gözləntini artıq verməyə başlayıb. Yassin Benzia və Olavio Juninyonun uyğunlaşması “Qarabağ”ın gücünə güc qatır. Bu səbəbdən komandamızdan “Hekken”lə matçda müsbət nəticə gözləyirik. İnanırıq ki, “Qarabağ” İsveçdən istədiyi nəticə ilə qayıda biləcək.
• “Qarabağ”ın Avropa Liqasında qrupdan çıxmaq şanslarını necə dəyərləndirirsiniz?
• “Hekken”lə oyundan çox şey asılıdır. Qrupun əsas favoriti “Bayer”dir. “Qarabağ” digər 2 komanda ilə ikinci yer uğrunda mübarizə aparacaq. Evdə “Molde”ni məğlub etdikdən sonra səfərdə “Hekken”dən alınacaq 3, hətta 1 xal “Qarabağ”ın qrupdan çıxmaq şansını daha da artıracaq.
• “Qarabağ”ın yeni transferlərindən ən çox kimin oyununu bəyənirsiniz?
• “Qarabağ” oturuşmuş sistemə malik komandadır. Hər il mövsümün sonunda hansısa futbolçular komandadan gedir və onların yerinə yeniləri gəlir. Gələnlərin adaptasiyası üçün vaxt lazım olur və bu müddət keçəndən sonra yeni transferlər “Qarabağ”ın oyun üslubuna alışırlar, getdikcə də artırırlar. Hazırda “Qarabağ”ın heyətində Marko Yankoviçi xüsusi qeyd edərdim. Düzdür, o, keçən il transfer edilib. Yankoviç son vaxtlar “Qarabağ”ın orxa xəttində ən aparıcı futbolçulardandır. Bayaq dediyim kimi, Juninyo və Benzia da oyundan-oyuna artırırlar, komandaya uyğunlaşırlar. Sırf bu yay edilən transferlərdən daha çox Juninyonu vurğulayardım.
• “Qarabağ” “Hekken”lə matçdan cəmi 3 gün sonra ölkə çempionatında “Neftçi” ilə qarşılaşacaq. Sıx qrafik Ağdam klubuna əzəli rəqibi ilə görüşdə əlavə çətinlik yaratmayacaq?
• Təbii ki, indi “Qarabağ”ın bütün fikri “Hekken”lə səfər matçına yönəlib. Bu görüşdən sonra “Neftçi” ilə matç haqda düşünməyə başlayacaqlar. “Qarabağ”ın “Neftçi” ilə oyunu hər zaman derbi sayılır. “Hekken”lə görüşdən sonra əsas heyət üzvlərinin durumunun necə olacağını bilmirik. Qurban Qurbanov vəziyyətdən asılı olaraq, “Neftçi” ilə matçda heyətdə rotasiyalar edə bilər. İstənilən halda, prinsipial oyundur. “Qarabağ”ın iki güclü heyəti var, “Neftçi” önünə hansı heyətlə çıxsa da, qələbə üçün oynayacaq. Şansları bərabər sayıram.
• Əksəriyyət “Qarabağ”ın bu mövsüm çempionluq mübarizəsində böyük çətinlik yaşayacağını proqnozlaşdırırdı. Ağdam klubunun çempionluq titulunu qorumaq şansı nə qədərdir? Bu mübarizədə hansı komandalar onlara ciddi maneə yarada bilərlər?
• Bu çempionat yaxşı məcrada keçir. Bir çox komandalar bərabər səviyyədədirlər və ilk “5-lik” uğrunda mübarizə aparırlar. Mövsümöncəsi favorit sayılan bəzi komandalar hazırda turnir cədvəlində aşağı pillələrdədir, əvəzində “Zirə”, “Səbail” və “Araz-Naxçıvan” gözlənilmədən yuxarı yerlərdə qərarlaşıblar. İlk turlar “Qarabağ”ın yeni transferlərinin adaptasiya dövrünə təsadüf etdiyi üçün onlar xal itkiləri ilə üzləşdilər. Bununla belə, yenə də çempionluğa ən real namizəd “Qarabağ”dır. “Neftçi”, “Zirə” və “Səbail” bu mübarizədə “Qarabağ”a müqavimət göstərə bilərlər.

FƏRİD