Premyer-liqa
Axundovun bəraət üçün seçdiyi növbəti “qurban”
“Şamaxı”nın yeni mövsümü də boşa verəcəyi indidən bəllidi. Klubun ilk addımlarından anlaşılır ki, bölgə təmsilçisinin hər hansı iddiası yoxdu, çempionatı yola verib AFFA-nın ayıracağı büdcəni havaya sovurmaqla məşğul olacaqlar.
“Şamaxı” yeni baş məşqçisini məcburiyyətdən təyin edib. Özünə hörmət edən bacarıqlı yerli çalışdırıcıların heç biri Zaur Axundovun rəhbərlik etdiyi klubda işləmək istəmədiyindən, klub belə qərar verib. Məşqçi və futbolçularla təhqirlə danışan, hamının işinə qarışan, davranışı ikrah doğuran bu şəxs elə ad çıxarıb ki, məşqçilər işsiz qalmağı onunla çalışmaqdan üstün tutur.
Başda Ayxan Abbasov olmaqla, bir neçə məşqçiylə danışıqlar baş tutmadığından, “Keşlə” illərdi klub akademiyasında çalışan Rüstəm Əliyevlə yola davam etmək qərarı verib. Ötən mövsümün son 5 turunda komandaya rəhbərlik edən gənc çalışdırıcı təklifə “yox” deməyib. O, bunu özü üçün yeni şans, karyerasında tramplin saya bilər. Lakin 2-3 aydan sonra Əliyevin peşman olacağını siz də görəcəksiz.
5 matçda komandaya cəmi 2 xal qazandıran, yetirmələri cəmi 1 qol vuran (1:8) məşqçidən ciddi nəticələr gözləyənlər yanılır. Ola bilər ki, Rüstəm bəyin həqiqətən yaxşı potensialı var, amma Axundovla çalışmaq intihara bərabərdi. Məşqçi klub akademiyasında, əvəzedici komandada əldə etdiyi nailiyyətlərə aldanmasın, Premyer Liqa tam fərqli səviyyədi və əgər başının üstündə hər işə qarışan prezident varsa, uğurlu karyera qurmaq istəyi yalnız xəyaldı.
Əliyev Axundovun transfer əməliyyatlarına “baş üstə” demək üçün müvəqqəti seçilmiş formal fiqurdu. O, oyunçu seçməyəcək, gətirilən hər legionerə “hə” deyəcək. Beləcə Axundov istədiyi alış-verişi edəcək və mövsümün əvvəlində işlər yolunda getməyən kimi məşqçi qurban seçilərək qovulacaq. Ardınca hər hansı sıradan əcnəbi məşqçi tapılacaq, növbəti büdcədağıtma əməliyyatı reallaşacaq.
İllərdi bu ssenarini izləyirik. Budəfəki qismən fərqli taktikayla oynanılan eyni oyundu. Amma “Şamaxı” yenə turnir cədvəlinin son pillərində sürünməyə davam edəcək. Fərq ondadı ki, bu dəfə Axundovun biznes obyekti kimi baxdığı klub “Keşlə” deyil, Şamaxı azarkeşlərinin qarşısına çıxacaq bölgə təmsilçisidi. Onların özfəaliyyətə nə qədər səbr edəcəyini zaman göstərəcək.
FƏRİD
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 17:10
Klublar çətin vəziyyətdə: AFFA yardımları dondurub
- Ölkə futbolu2024-04-26 08:00
Juninyo – Avropanın ən yaxşı braziliyalısı