Müsahibə
Azər Məmmədov səhvlərindən öyrənir: “Kəpəz” üçün ən yaxşısını etmişik”
“Kəpəz” klubunun sabiq baş məşqçisi Azər Məmmədovun futbolinfo.az saytına müsahibəsi
– “Kəpəz”in baş məşqçisi postundan ayrılsanız da, yəqin ki, doğma komandanızın matçlarını izləyirsiniz. “Kəpəz”in oyununda müsbətə doğru dəyişiklik varmı?
– Mən ayrılandan sonra “Kəpəz”də müsbət və ya mənfi dəyişikliyin olduğunu demək üçün hələ tezdir. Adil Şükürovun öz oyun fəlsəfəsini oturtması üçün vaxta ehtiyacı var. Necə dəyişikliyin olacağını zaman göstərəcək. Mən istərdim ki, “Kəpəz”də müsbətə doğru dəyişikliklər olsun və komanda Premyer Liqada qalsın. Çünki “Kəpəz”in Premyer Liqada varlığı çempionatımız üçün müsbət məqamdır.
– Bir müddət istirahət etdikdən sonra, soyuq başla düşünəndə heç özünüzə deyirsiniz ki, kaş “Kəpəz”də hansısa məqamda o cür davranmayaydım, bunu belə etsəydim, komandaya daha faydalı olardı?
– Sözsüz. “Kəpəz”də işləmək mənim üçün böyük təcrübə oldu. Baş məşqçi kimi ilk işim idi. Biz məşqçilər təcrübəni nədən toplayırıq? Əlbəttə ki, səhvlərimizdən. Etiraf edim ki, mənim də səhvlərim olub. Amma hazırda kənardan izləyən biri kimi də deyə bilərəm ki, klubun maliyyə dayağına, mövcud vəziyyətinə, infrastrukturuna, heyətdəki futbolçularına görə mən və heyətim “Kəpəz” üçün ən yaxşısını etmişik. İşimizi vicdanla görmüşük. Orada olduğum müddətdə istər məşq prosesi, istər oyun prosesi, istərsə də futbolçuların yeməyi, qalmağı, yəni şərait baxımından maksimumu etməyə çalışmışıq. Güman edirəm ki, Adil müəllim də daha artığını etməyə, komandanı sonuncu pillədən qurtarmağa səy göstərəcək.
– “Kəpəz”dən ayrıldıqdan sonra sizə hər hansı bir təklif olub?
– “Kəpəz”dən ayrılandan sonra İdarə Heyətinin sədri İlqar Nadiri mənə klubun idman direktoru vəzifəsində çalışmağı təklif etdi. Bu təklifə görə İlqar müəllimə təşəkkür etdim, ancaq dincəlmək istədiyimi bildirdim. Mən özümü futbol sahəsində hələlik ancaq məşqçi kimi görürəm, funksioner kimi görmürəm. Buna görə də “Kəpəz”də idman direktoru işləmək istəmədim.
– Klublarımızın baş məşqçiləri çempionatın cari mövsümündə rəqabətin artdığını deyirlər. Hazırda kənardan izləyən biri kimi necə düşünürsünüz, liqanın səviyyəsində artım var?
– Bilirsiniz ki, keçən mövsüm “Səbail”də Şahin Diniyevin köməkçisi olaraq fəaliyyət göstərirdim. Ötən mövsümlə cari mövsüm arasında böyük fərq var. Fakt budur ki, bütün komandalar gücləniblər, büdcələrində artım var. Maliyyə dəstəyində artım olursa, futbolçu keyfiyyəti də artır. Bu da çempionata müsbət təsir göstərir. Təəssüflər olsun, təkcə “Kəpəz”dir ki, keçən mövsümdə də, cari mövsümdə də eyni büdcə ilə çempionatda iştirak edir. Amma liqada rəqabətin artması danılmazdır. Keçən illə müqayisədə çempionatımızda sürət də artıb. Hazırda Premyer Liqamızda ağır rəqabət gedir. Hər komanda digərindən xal ala bilər. Hətta “Qarabağ” üçün də bu mövsüm asan keçmir.
– “Qarabağ”dan söhbət düşmüşkən, sabiq komandanızın Avropa Liqasında pley-off mərhələsinə adlayaraq tarix yazacağına inanırsınız? “Hekken”lə Bakıdakı görüşdən hansı nəticəni gözləyirsiniz?
– “Qarabağ”ın “Hakken” üzərində qələbə qazanacağını düşünürəm. Bu, “Qarabağ” və Azərbaycan futbolu adına tarixi oyundur. “Qarabağ” qrupdan çıxsa, Avropa Liqasında bunu bacaran ilk klubumuz olacaq. “Qarabağ”ın göstərdiyi oyun, komandadakı futbolçuların potensialı və əlbəttə ki, başda Qurban Qurbanov olmaqla, məşqçilər korpusu, ümumiyyətlə “Qarabağ” camiəsi gördükləri işlərin müqabilində qrupdan çıxmağa və bu sevinci Azərbaycan futbolsevərlərinə bəxş etməyə layiqdirlər.
– Millinin baş məşqçi postu hazırda boşdur. Sabiq yığma üzvü olaraq, komandanın “sükanı arxasına” kimin keçməsini istərdiniz?
– Mən həmişə tərəfdarı olmuşam ki, millidə azərbaycanlı məşqçi işləsin. Fikrimcə, bizim yığma kimi komandaları yerli mütəxəssislər çalışdırmalıdırlar. Çünki bu vaxtadək nə qədər xarici məşqçi gəlibsə, aşağı-yuxarı eyni nəticəni verib. Hədəf seçmə mərhələdə qrupdan çıxmaqdırsa və bunu heç bir əcnəbi edə bilmirsə, lap 10 xal yığsa da, qrupda qalırıqsa, xarici məşqçilərin millimiz üçün nə faydası var? Bu qədər xalı azərbaycanlı məşqçilər də toplayar. Bir də onu deyim ki, o posta yerli çalışdırıcı gətirilərsə, onu cəmi 1 seçmə mərhələlik təyin etmək doğru deyil. Yerli məşqçilərə də vaxt verilməlidir ki, özlərinin uzunmüddətli strategiyaları, planları olsun və ona uyğun işləsinlər. Mən milliyə azərbaycanlı mütəxəssisin rəhbərlik etməsinin tərəfdarıyam.
ABBAS
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?