Bir oyunun tablosu: 5 limit oyunçusu, 8 milliləşən

Premyer Liqada vəziyyə hər tur dəyişir. Ötən həftə “Sabah”ın avrokuboklara yollanmaq şansının xeyli azaldığından bəhs edirdiksə, indi komandanı 4-cü pilləyə yiyələnməyə ən real namizədlərdən sayırıq.

Sumqayıtda qazanılan vacib qələbə Jelko Sopiçin rahat nəfəs almasına kömək edəcək. Xorvat məşqçi ikinci hissənin startında etdiyi bir dəyişikliklə faktiki, matçın gedişini dəyişdi. Yekunda “Qəbələ” ilə oyundakı kimi, qısa zamanda vurulan ardıcıl qollar yekun hesabın müəyyənləşməsində rol oynadı. 3 dəqiqə ərzində “Sumqayıt” müdafiəsi xaosdan çıxa bilmədi və qalib müəyyənləşdi.

Çempionatın ən baxımlı matçlarından birinin ilk yarısı bərabər səviyyədə keçdi. Lakin Ayxan Abbasovun məcburi əvəzləməyə əl atması ilə sistem pozuldu. Süleyman Əhmədovu əvəzləyən Elvin Bədəlov, eləcə də sağ cinaha çəkilənn Sərtan Taşkın ansambldan gei qalmağa başladı. Fasilədən sonra daha aqressiv oynayan “Sabah”da isə Məhəmməd Mirzəbəyovu əvəzləyən Amadu Diallo sol cinaha fəallıq gətirdi. Məhz onun reydlərindən, ötürmələrindən sonra oyunun nəticəsi müəyyənləşdi.

“Sabah” yavaş-yavaş komplektləşməkdə, daha yaxşı oynamaqdadı. Məşqçi əlindəki çox keyfiyyətli futbolçuları vahid komandaya çevirmək yolunda ciddi işlər görür. Heyət o qədər zəngindi ki, Bəhlul Mustafazadə və Təmkin Xəlilzadə kimi aparıcı oyunçuların cəzalı olması da Sopiçə mane olmamışdı.

“Sumqayıt”da isə yalnız əsas heyət var, ehtiyatdakılar meydana daxil olunca komandanın nizamı pozulur, axsamalar başlayır. Və dünən meydan sahiblərinin əvvəlki matçlardan zəif təsir bağışlamasının bir səbəbi də rəqibin kompakt oynaması idi. Son dəqiqələrdə itirəsi heç nəyi qalmayan “Sumqayıt”ın təzyiqi gözlənilən idi. Lakin bu, yalnız təsəlli qolunu vurmağa yetdi.

3 xalı layiq olan qazandı və 4-cü yer uğrunda mübarizə bir az da kəskinləşdi. “Sumqayıt” hələ də yerindədi, lakin “Zirə”nin də büdrəməsiylə “Sabah” xeyli ümidlənib. Ayxan Abbasovun yetirmələrinin parlaq startdan sonra düşüşə keçməsi gözlənilir, “qartallar” böhran içindədi. Məhz bu amillər Sopiçin işinə yarayır. Növbəti oyunlar daha maraqlı olacaq.

Turun bu oyunu başqa məqamlarına görə də diqqət çəkdi. Mövsümdə ilk dəfə hansısa oyunda 5 limit oyunçusu start heyətində göründü. “Sumqayıt”da Süleyman Əhmədovla Elvin Cəfərquliyev, “Sabah”da Ozan Can Kökcü, Şakir Seyidov və debüt edən Arsen Ağcabəyov meydanda idi. Bu, çox önəmli faktdı və məşqçilərin gənclərin inkişafını düşündüyünü göstərən detaldı. Xüsusilə xeyli əcnəbisi olan qonaqların startda 3 limit oyunçusuna şans verməklə rekorda imza atdığı qeyd edilməlidi.

Amma mənfi cəhəti də qeyd etməliyik. “Sumqayıt”ın Mehdi Cənnətov, Aleksey İsayev, Rəhim Sadıxov, Əmir Ağayev, Mehdi Şərifi və Camaladdin Xocaniyazovun simasında 6, “Sabah”ın isə Məhəmməd Mirzəbəyov və Ozan Can Kökcünün simasında 2 milliləşən futbolçuya güvənməsi təəssüf doğurur. Bir oyun üçün Azərbaycan futbolunun yetirməsi olmayan 8 nəfərin meydanda olması yaxşı deyil. Bura legioner kimi oynayanları da əlavə etsək, mənzərə aydınlaşar.

FƏRİD