“Bu cür hallarda daha çox enerji sərf edirik” – Patrik Andrade

“Qarabağ”ın yarımmüdafiəçisi Partik Andradenin futbolinfo.az-a müsahibəsi

• “Kayrat”la matçda əzmkar qələbə qazandınız…
• Matçda hesabda geri düşsək də, sona qədər öz oyun dəsti-xəttimizə sadiq qaldıq və mübarizə aparmağı dayandırmadıq. Hər şey əldən getdi deyə düşünmədik. Oyunun ritmini qoruyub saxladıq. Sonda çətin də olsa, gec də olsa, istəyimizə nail olduq. Tablodakı rəqmləri xeyrimizə dəyişməyi bacardıq.
• Matçın ən yaxşılarından biri olaraq səni qeyd etmək olar. Öz çıxışın barədə şəxsi fikirlərin necədir?
• Bunu komandanın qələbəsi kimi qeyd edərdim. Çünki hər bir futbolçumuz əlindən gələni etdi və bu əzmkar qalibiyyətdə hamısı pay sahibidir. Komanda yoldaşlarım meydanın hər qarışı uğrunda mübarizə apardılar. Ümumi komandanın adına yazmaq lazımdır bu 3 xalı.
• “Kayrat”ın bu qədər qapalı oynayacağını gözləyirdiniz?
• Əvvəlcədən bunu bilirdik və bizə məlumat verilmişdi ki, rəqib qapalı oynayacaq. Onların belə oyun üslubuna üstünlük verəcəyi bəlli idi. 5 müdafiəçi ilə meydana çıxıb şanslarını əks-hücumlarda yoxlayacaqdılar. Buna hazır idik. Baxmayaraq ki, çətin oldu, amma biz səbrlə, öz oyunumuzla, zamanımızı gözləyərək, boşluqları taparaq qalib gəldik.
• İki matçdır ki, komanda hesabda geri düşüb sonra qalib gəlir…
• Bu vəziyyət kiməsə asan gələ bilər, amma hesabda geri düşərək, qalib gəlmək ağırdır. Belə vəziyyətlərdə komanda daha çox güc sərf edir, daha çox qaçır. Hücuma daha çox meyillənirsən və bununla bərabər müdafiəni də unutmamalısan. Belə olanda komanda çoxlu enerji itirir. Amma əsas odur ki, biz bu cür durumlarda oyunun kontrolunu itirmirik. Həm də sonda qalib gəlirik.
• Qrupda artıq 7 xala sahibsiz. Demək olarmı ki, pley-offun qapısını aralamısız?
• Vəziyyəti qabaqlamaq olmaz. Əsas odur ki, dğru yoldayıq və bu cür də davam etməliyik. Qarşıda ağır oyunlarımız var və bu matçlara da geridəki 3 matç kimi yanaşıb, eyni cür oynamalıyıq. Növbəti mərhələ reallaşmayıbsa, heç nə demək olmaz.
• Qarşıda çempionat daha sonra “Kayrat” səfəri var…
• Onsuz da heç bir turnirdə asan yoxdur, rəqiblər də səni analiz edirlər. Hər oyun tərzinə qarşı nəsə düşünürlər. “Kayrat” bizi necə analiz etmişdisə, necə müdafiə olunurdu? Amma eyni tempdə 90 dəqiqə müdafiə olunmaq mümkün deyil. Çox çətin prosesdir. Biz bütün oyunlara eyni məqsədlə çıxacağıq.

FƏRİD