“Bu nəticələr bizə dərs olmalıdır”

“Sabah”ın müdafiəçisi Bəxtiyar Həsənalızadənin futbolinfo.az saytına müsahibəsi

– İki oyundur ki, komanda məğlub olur. Bunun səbəbi nədir?

– Son iki oyun bizim üçün çox çətin keçdi. Rəqiblər artıq komandamıza qarşı başqa motivasiya ilə oynayırlar. Bu da işimizi bir az çətinləşdirir. Rəqib komandalar daha çox qapalı oynayır. Belə vəziyyətdə ələ düşən ilk fürsətdə qol vurmaq lazımdır. Bu olmayanda da qapında qol görürsən və istədiyin nəticəni əldə etmək olmur.

– Düzdür, futbolda çətin qrafikdə komandalar ara-sıra xal itirir. Amma iki oyun ardıcıl uduzmaq sizcə, ciddi siqnal deyil?

– Bəli, futbolda hər komanda üçün xal itkiləri qaçılmazdır. Heç kim istəməzdi ki, iki oyun ardıcıl uduzsun. Bu nəticələr bizə dərs olmalıdır.

– Hər kəs sizi “Qarabağ”la rəqabətdə görürdü. Amma razısan ki, bu iki oyunla komanda mübarizədən çıxdı?

– Adımızın “Qarabağ”la yanaşı hallanması çox yaxşı haldır. Amma bizim əsas hədəfimiz çempion olmaq yox, mümkün qədər yuxarı pillələrdə qərarlaşmaqdır.

– Bundan sonra əsas hədəf yəqin ki, ikincilik olacaq. Motivasiyanız azalmayacaq?

– Hədəfimiz avrokuboklarda mübarizə aparmaqdır. Nə qədər yüksək pillədə olsaq, bir o qədər yaxşıdır. Heç kim həvəsdən düşməməlidir. Əksinə, sona qədər vuruşmalıyıq.

– Qarşıda “Kəpəz”lə matç var. Sizcə, qalib gəlib hər şeyi yenidən yaxşıya doğru dəyişə biləcəksiz?

– “Kəpəz”in yüksəlişi göz önündədir. Hər iki komanda qalib gəlmək istəyəcək. Maraqlı oyun alınacağını düşünürəm. Qalib gəlmək üçün komanda şəklində çalışacağıq.

AĞA