Daha iddialı “Keşlə”: Əhmədov avrokubok üçün heyəti komplektləşdirir

“Keşlə” Avropa Liqasına ciddi hazırlaşır. Baş məşqçi Tərlan Əhmədov debüt edəcəyi yarışda uğurlu olmaq üçün qollarını çırmayıb.

Qitə yarışlarına hələ ayyarım var, lakin paytaxt klubu transfer çalışmalarında hamını geridə qoyub. Premyer Liqanın dayandırılması haqda qərar rəsmiləşən kimi heyətin komplektləşdirilməsi işi başlayıb. İlk olaraq, lazımsız bilinən və ya anlaşmaq mümkün olmayan futbolçular yola salınıb, indi isə boşluqlar doldurulur.

Ruslan Qurbanov, Slavik Alxasov və Cabir Əmirli ilə yeni müqavilə bağlamayan “Keşlə”nin ən böyük uğuru aparıcı futbolçularını qorumasıdı. Miyuşko Boyoviç, Vüsal İsgəndərli və Con Kamaranın heyətdə saxlanılması dəqiqləşib, Sezar Meza Kolli ilə Stanislav Namaşko da tezliklə yeni müqavilə imzalayacaq. Lorenzo Frutos, Aleksandr Kristavao və Franko Floresin məsələsi açıq qalır, daha yaxşı namizədlər tapılsa, bu oyunçuların bəzisi ilə vidalaşmaq mümkündü.

Tərlan Əhmədov hazırda əsasən yerli oyunçu keçidlərini yekunlaşdırmaqla məşğuldu. Tərlan Quliyevlə Ruslan Əmircanov yeni müqavilə imzalayıb – düzdü, onlar əsas heyət üzvləri deyil, lakin ehtiyat qüvvə kimi lazımlı kadrlardı. Əvəzində Tural Axundovla Şəhriyar Əliyevin keçidi müdafiə xəttinin gücləndirilməsi baxımından önəmlidi. “Neftçi”dən gələn Tural Slaviki unutdurmağa çalışacaqsa, “Sumqayıt”ı paytaxt klubuna dəyişən Şəhriyar Tərlan bəyin limit baxımından əl-qolunu açacaq. Stopperlərdən birinin yerli olması heyətdə rotasiyalara imkan verəcək. “Zirə”ni “Keşlə”yə dəyişəcəyi deyilən Tellur Mütəllimovun transferi baş tutsa, Əhmədov arxa xəttdən arxayın ola bilər.

Yarımmüdafiədə işlər qaydasındadı. Şahrux Qadoyevin anlaşmasının davam etdiyini nəzərə alsaq, Sezarın qalması dəqiqləşdikdən sonra “Keşlə” daha da rahatlaşacaq. Daha bir əcnəbi transferi edilsə, Avropa Liqası üçün optimal heyətdən danışa bilərik. “Sabah”dan ayrılacağı gözlənilən Cavid İmamverdiyevin transferi də gündəmdədi. Heyətə düşmədiyi üçün Jelko Şopiçlə yola getməyən yarımmüdafiəçi kapitan sarğısını itirməsinə görə də narahatdı və yeni klub axtarır. Əhmədov “Neftçi”də birgə işlədiyi bu oyunçunu yanına gətirə bilsə, yalnız daha yaxşı hücumçu tapmaq qayğısını düşünəcək.

“Keşlə”nin heyəti erkən komplektləşdirmək istəyi yaxşı məqamdı. Tərlan bəy məhz bunun arzusundadı. O, tam heyətlə hazırlaşmaq, həm qitə yarışına, həm də yeni çempionata əskiksiz start verməyi düşünür. Müqaviləsi bitən bəzi oyunçularla yeni anlaşmalarda problem çıxmasa, yeni mövsümdə daha iddialı “Keşlə” görəcəyik.

FƏRİD