Diniyevin imtina jesti

Məşqçilərin işsizlikdən dad etdiyi, hər kiçik imkana ümid işığı kimi baxdığı bir vaxtda real təklifdən imtina edəni də gördük. Deməli, heç də hamı istənilən dəvətə kor-koranə qaçmır, analiz qabiliyyəti yerində olanlar düşünüb doğru qərar verməyi bacarır.

Şahin Diniyevin “Kəpəz”dən imtinası çoxları üçün sürpriz oldu. Yaşar Vahabzadənin xələfi olaraq 3-cü dəfə Gəncə təmsilçisinin baş məşqçi postuna əyləşəcəyi deyilən təcrübəli mütəxəssis, dünən axşam saatlarında yekun qərarını verdi. Xeyli düşünən, götür-qoy edən, klubla bağlı aktual məsələləri dərindən öyrənən Diniyev “Kəpəz”də uğursuz olmaqdansa, işləməməyi lazım bildi.

Şahin bəy mətbuata danışaraq imtinasının səbəblərini açıqlayıb. Daha doğrusu, konkret səbəb göstərməyib, amma ipucu verib. Özünün maaşı, tələbləri ilə bağlı problem olmayıb, klubun hazırkı real durumu onu imtinaya sövq edib. Diniyev “Kəpəz”də nəticə verməyin mümkünsüzlüyünü gördükdən sonra özünü biabır etməkdənsə, imza atmamağı daha doğru sayıb.

Məhz bu məqamları bldiyimizdən, öncəki yazılarımızda “Kəpəz”in yeganə probleminin Yaşar Vahabzadə olmadığını yazırdıq. Klubun infrastrukturu ilə bağlı çatışmazlıqlar öz yerində, klubdaxili problemlər də kifayət qədərdi. Komandanın Premyer Liqa səviyyəsində işləyəcək həkimi belə yoxdur. Bu səbəbdən hər məşqdə bir futbolçu sıradan çıxır, hətta “Qarabağ”la növbəti oyuna buraxmağa sağlam müdafiəçi tapılmır.

Fiziki hazırlıq üzrə məşqçi yoxdur, komanda düzgün komplektləşdirilməyib, mövqelər üzrə ciddi çatışmazlıqlar var, gətirilən legionerlərin səviyyəsi qaneedici deyil. Ciddi təşkilati qüsurlar var, qaçqın kimi yaşayan komanda ən adi tələblərə cavab vermir. Yəqin ki, Diniyevin qərarında bu amillər rol oynayıb. Şahin bəy araşdırdıqdan sonra əmin olub ki, bu problemlərin həlli mümkün deyil, belədə yaxşı nəticədən danışmaq yersizdi.

Diniyev peşəkar məşqçinin necə olmasıyla bağlı nümunə göstərdi. Lakin bu jest yetərli deyil, yetərli olsaydı, “Kəpəz”ə baş məşqçi getmək üçün özünü tapşırtdıranlarla, xahiş edənlərlə bağlı xəbərlər eşitməzdik. Maraqlıdı ki, maaş almaq naminə vaxt qazanmağa, yalançı vədlərlə baş aldatmağa çalışanlar yetərincədir.

Bununla belə, tam pessimist olmağa da gərək yoxdur. Bəlkə həqiqətən elə məşqçi tapılacaq ki, “Kəpəz”i bu durumdan çıxaracaq. Ardıcıl 4 məğlubiyyətə baxmayaraq, xalsız komandaya bəhanə etmədən gələn, nəticələri yaxşılaşdırmağı boynuna götürən namizədi gözləyirik…

FƏRİD