Müsahibə
Elvin özündən şikayətçidir: “İndi bu barədə danışmamalı idik”
“Sumqayıt”ın müdafiəçisi Elvin Bədəlovun futbolinfo.az saytına müsahibəsi
– Son matçda “Səbail”ə 1:3 hesabı ilə uduzdunuz. Səbəb nədir? Udduğunuz oyunda niyə məğlub oldunuz?
– Onu deyim ki, çox məyusuq. İkinci dəfə idi evdə irəlidə olduğumuz matçda məğlubiyyətlə qarşılaşırıq. Bu, heç normal hal deyil. Səbəbkar özümüzük. “Qəbələ”yə 2:3 uduzduğumuz oyunda da, “Səbail”lə matçda da nəzarət bizdə idi. Amma konsetrasiyamız itir və məğlub oluruq. Bunu aradan qaldırmaq lazımdır.
– Düşünmürsən ki, bu məğlubiyyət sizə böyük təhlükə yaratdı?
– Təhlükə bütün mövsümü bizimlə olub. Ona görə də tək bu oyuna görə təhlükədə olduğumuzu deyə bilmərəm. Əvvəllər daha çox xallar yığıb indi bu vəziyyətdən danışmamalı idik. Özümüz düşdüyümüz vəziyyətdən çıxmağın yolun tapmalıyıq.
– Mövsüm sona yaxınlaşır və artıq liqada qalmaq uğrunda gərgin mübarizə gedir. Bu, sizə motivasiya verir, yoxsa həyəcanlandırır?
– Əlbəttə, bu gün “Sumqayıt”ın liqada qalmaq uğrunda mübarizə aparmasını istəməzdik. Daha rahat yerdə qərarlaşmaqla rahat oynaya bilərdik. Amma bu mövsüm belə keçdi. Futboldur, bizim üçün mübarizə motivasiyadır. İstəyirik ki, liqada qalaq və növbəti mövsüm sübut edək ki, bizim bu vəziyyətimiz təsadüf idi.
– Premyer Liqada yerinizi qoruya biləcəksiz?
– Mən komandama inanıram və bunu bacaracağıq.
– Geriyə baxanda mövsümü özünüz üçün pis dəyərləndirirsən?
– Əlbəttə, “Sumqayıt”a yaraşmayan bir mövsüm keçirdirik. Amma futboldur və klubların bu cür halları olur. Gələn mövsüm “Sumqayıt” daha yaxşı yerlər üçün mübarizə aparacaq.
CAVAD