Elxan Məmmədov gəldi, “Səbail” qarışdı

Mahmud Qurbanov “Səbail”ə təyinat alanda böyük əksəriyyət onun uzağı yanvara kimi işləyəcəyini proqnozlaşdırırdı. Bu gün həmin adamların haqlı olduğu üzə çıxdı – Bayıl təmsilçisi baş məşqçisini istefaya göndərdi.

Bu izdivacın tez yekunlaşacağını düşünələrin bir səbəbi məşqçinin təcrübəsizliyi, Premyer Liqada az işləməsi idisə, əsas məqam “dənizçilər”in rəhbərliyinin “idarəetmə qabiliyyətləri” idi. “Səbail” mövsümün ilk yarısını sonuncu pillədə tamamlayanda Qurbanovla bağlı düşüncələr təsdiqini tapdı. Lakin rəhbərlik də “özünü doğrultdu”. Məşqçiyə dəstəyini bildirən, amma qəfildən onunla yollarını ayıran klubla bağlı fərqli nələrsə demək olmur.

Premyer Liqadakı uğursuzluğa rəğmən, Mahmud bəy son anda qapını möhkəm çırpmağa, qalib kimi yollanmağa nail oldu. “Səbail”i tarixində ilk dəfə ölkə kubokunun yarımfinalına çıxaran, avrokuboklara yaxınlaşdıran məşqçidən danışırıq. Rəhbərlik daha yaxısını bacarmasa, yeni məşqçi finala vəsiqəni təmin etməsə, Mahmud bəyi bir qədər də ucaldacaqlar.

Qurbanovun işlə bağlı problemləri var idi. O, oyunçularla doğru davranmır, klubdaxili ab-havanı gərgin saxlayırdı. Amma yeganə günahkar o deyildi. Komandanı yararsız futbolçularla dolduran onun qılığına girən Ceyhun Sultanov kimi meneceri unutmamalıyıq. Həm məşqçi, həm də menecer kimi klubda çalışan Zaur Ramazanov da öz yerində. Lakin Qurbanov bu şəxslərə güvənməklə yenə öz günah payını artırdı.

Baş məşqçi istefa verəndə adətən məşqçilər korpusu komanda şəklində işdən gedir. Köməkçilərinin ona nə qədər sadiq olduğunu görəcəyik. Qalsalar, fərqli məqsəd üçün “professor”un kölgəsinə yığışanlar dəstəsi olduqlarını isbatlayacaqlar. Yaydakı transfer əməliyyatlarında 45-50 min dollar məbləğində komisyon haqqına kimin imza atdığını qoy klub rəhbərliyi araşdırsın. Gətirilən futbolçularına qiymət verib qışda yenə onlarla çalışmağa davam etsələr, deməli, onların da hansısa maraqları var.

Bəlkə də təsadüfdür, amma “Səbail”də iki gün ərzində hər şeyin dəyişməsndə Elxan Məmmədov izi axtarmaq istəyirsən. AFFA-nın vitse-prezidenti bir neçə gündür Bakıya gəlib. FIFA-da işə başlayanı Azərbaycan futboluna uzaqdan nəzarət edən bu şəxs gələn kimi qəribə qərarlar sıralandı. Hacıyevin yola salınıb Qurbanovun gətirilməsi üçün yaxın münasibətdə olduğu “Səbail” rəbərliyinə “misilsiz” məsləhət verən Məmmədov sanki indi bir səhvini digəri ilə əvəz etməyə çalışır.

Son vaxtlar Milan Obradoviçin “Səbail”ə gətiriləcəyi ilə bağlı xəbərlərin yayılması təsadüf deyil. Elxan bəy onu FİFA-ya aparan serb dostlarının xahişi ilə bu məşqçini U-21 yığmamıza gətirmiş, ən uğursuz nəticələrə rəğmən, onu postunda saxlamış, böyük pulları havaya sovurmuşdu. İndi Elxan bəy yenidən Obradoviçi futbolumuza calaq etməyə çalışır, bəlkə də səfəri bununla bağlıdır. Ümid edirik, “Səbail” rəhbərliyi bu dəfə aldanmayacaq.

FƏRİD