Fernan Kiprə pul üçün getməyib: “Daha yaxşı liqada oynamaq istəyirdim”

Yay fasiləsində “Qəbələ”dən Kiprin “Enosis” klubuna keçən ispaniyalı yarımmüdafiəçi Fernan Lopesin futbolinfo.az saytına müsahibəsi

– Yeni transfer olunduğunuz “Enosis”də işləriniz necə gedir?

– Burada hər şey çox yaxşıdır. Gərgin məşqlər keçirik. Gündən-günə özümü daha yaxşı hiss edirəm. Əla futbolçularımız və yüksək motivasiyada olan kollektivimiz var.

– Deyəsən, qısa müddətdə ora uyğunlaşa bilmisiniz?

– Bəli, adaptasiya dönəmim çox sürətli keçir. Buradakı insanlar ilk gündən özümü evimdəki kimi hiss etdirdilər. Baş məşqçinin münasibəti də mənə həddən artıq güvən verir.

– “Qəbələ”dən ikinci dəfə ayrılmağınıza nə səbəb oldu?

– Oradakı missiyamın bitdiyini hiss etdim. Böyümək və daha yaxşı liqaya getmək istəyirdim. Kiprdən gələn təklif də ürəyimcə oldu.

– Missiyanızın başa çatdığını necə anladınız?

– Dediyim kimi, böyümək üçün ayrılmalı idim. Daha yaxşı liqada oynamaq istəyirdim. Məncə, “Qəbələ”də etməli olduğum hər şeyi reallaşdırdım.

– “Qəbələ”də qalıb Konfrans Liqasında çıxış etmək sizə maraqlı deyildi?

– Üç il əvvəl “Qəbələ” ilə Avropa Liqasında oynamışam. Bu, artıq təcrübə etdiyim bir şey idi. Əlbəttə, çox gözəl təcrübədir, amma avrokubokda 2-4 oyun keçirirsən. Ardından eyni çempionatda ilboyu çıxış etməli olursan.

– “Qəbələ”ni “Enosis”ə dəyişməyinizdə yəqin ki, maliyyənin də rolu oldu?

– Xeyr, çox pul fərqi yox idi. Mənim prioritetim daha yaxşı çempionatda oynamaq idi.

– Kipr çempionatı Azərbaycan Premyer Liqasından güclüdür?

– Məncə, bəli, güclüdür. Bunun üçün UEFA reytinqinə baxmaq kifayətdir.

– “Qəbələ”də komanda yoldaşınız olan Stefan Vukçeviçlə “Enosis”də də bir yerdə çıxış edəcəksiniz. Onun transferində vasitəçiliyiniz oldu?

– Bəli. Onunla söhbətim oldu, buranın çox yaxşı seçim olacağını özünə dedim. Fikrimcə, Stefan burada çox yaxşı oynaya və futbolçu kimi inkişaf edə bilər.

– “Qəbələ”dəki ikinci dönəminizi özünüz üçün necə dəyərləndirərdiniz?

– Əla mövsüm keçirdiyimizi düşünürəm. “Qəbələ”də bundan əvvəlki son iki mövsüm o qədər də yaxşı alınmamışdı. Çətin an idi. Amma əsl kollektiv olduğumuzu göstərdik. “Qəbələ” bu oyunu ilə avrokuboklara vəsiqə qazanmağa layiq idi.

– Azərbaycanda olduğunuz müddətdə burada hansısa başqa klubdan təklif almışdınız?

– Bunu dəqiq bilmirəm. Xüsusən də, bu yay liqanı tərk etmək istəyirdim. Bildiyim qədərilə “Qarabağ” və “Neftçi” mənimlə maraqlanmırdı. Mən özüm diqqətimi başqa liqalara yönəltmişdim.

– “Neftçi” Konfrans Liqasının II təsnifat mərhələsində Kiprin “Aris” klubu ilə qarşılaşacaq. Bu cütlük barədə nə deyə bilərsiniz?

– Balanslı oyunlar olacağını düşünürəm. Hər iki komanda öz liqasının ən yaxşılarından biridir. “Aris”in heç bir matçına baxmadığım üçün onlar haqda çox şey deyə bilmərəm.

– Kiprdə sizdən Azərbaycan futbolu, “Neftçi” haqda soruşurlar?

– Bəli, soruşurlar. Elə “Qarabağ”ın “Lex”lə (5:1) Bakıdakı oyununa baxanda Azərbaycan futbolu barədə danışdıq. Söhbət görüşün son dəqiqələrində açıldığından, dialoqumuz qısa çəkdi. Mərkəz müdafiəçimiz Pavel Dreksa vaxtilə “Neftçi”də oynadığı üçün Azərbaycan futbolundan xəbəri var.

ŞAHSUVAR