Heç-heçələr günü

“Qarabağ” yenə xal itirdi. Misli Premyer Liqasında ardıcıl 13 qələbədən sonra ağdamlılar 2 turdu qolsuz heç-heçə edir. Çempionatda yaranmış fasilədən öncə “Sabah”la sülh bağlanmışdısa, dünən də “Zirə”ni yenmək mümkün olmadı.

Baş məşqçi Qurban Qurbanovun da etiraf etdiyi kimi, “Qarabağ” yaxşı oynamadı. Ona görə də xal itkisi ədalətlidi. Meydanda ruhsuz komanda kimi görünən Ağdam təmsilçisi hətta ciddi qol epizodu da yarada bilmədi. Sanki futbolçular avrokubok mövsümünün yorğunluğunu üzərlərindən atmaq üçün əllərinə düşən istirahət fürsətindən yararlanıb, amma geri qayıtmağı “unudublar”. Meydanda daim qələbəyə can atan dinamik komandadan əsər-əlamət yox idi.

“Qarabağ” növbəti turda “Neftçi”ylə oyuna bu əhvalda çıxsa, derbidə istənilən nəticə qeydə alına bilər. Düzdü, bakılılar da bir gün öncə yaxşı təsir bağışlamadı, lakin yenə də 3 xalı təmin etməyi bacardılar.

“Zirə” rəqibinin durumundan əla faydalandı. Tempi qaldırmayan, daha çox “Qarabağ”ı oynatmamağa hesablanan taktika bəhrəsini verdi. Qəsəbə təmsilçisi bununla da bu mövsüm ilk dəfə özündən yuxarıda olan komandadan xal almağı bacardı.

Turun dünənə təsadüf edən digər matçı da heç-heçə bitdi. Suraxanıdakı oyundan fərqli olaraq, Şamaxıda qapılara qol vuruldu.

Tərlan Əhmədovun gəlişindən bəri daha yaxşı təsir bağışlayan “Kəpəz”, son vaxtlar ən azı özü səviyyəsində olan rəqiblərə uduzmamaqla seçilir. Düzdü, erkən qolla hesabı açan gəncəlilər qələbə qazansaydı, daha rahat olacaqdı, lakin indiki halda səfərdə uduzmamaq da qənimət sayılmalıdı. Xüsusilə ilk yarıda üstün olan qərblilərin fasilədən sonra “dayanması” “Şamaxı”nın ayılması ilə bağlı idi.

Heç-heçə oyunun haqqı idi, ədalətli nəticədi. Autsayderlər hazırda uduzmamaq, bir-birindən uzaqlaşmamaq taktikası seçiblər. Bu səbəbdən bəzən bir xala qane olur, daha çoxu üçün risk etmirlər. Amma elə bu səbəbdən yuxarıdakı rəqiblərlə xal fərqi böyüyür, mövsümün ikinci yarısı üçün ciddi hədəf qalmır. Yəqin ki, qışdan sonra avrokuboklara vəsiqə üçün mübarizə aparanlarla sonuncu olmamaq üçün döyüşənlər arasında xal fərqi həddindən artıq böyük olacaq.

Bu gün “Sumqayıt” – “Qəbələ” oyunu vəziyyətə bir qədər də aydınlıq gətirəcək. Hələ də qələbə qazanmayan meydan sahibləri əsas rəqiblərindən geri qalmamaq üçün tilsimi qırmağa məhkumdu. Lakin qonaqlar da avrokubok mübarizəsindən qopmaq istəmir və ən azı bir xal üçün döyüşəcək. “Sabah”ın liderin məğlubiyyətindən faydalanıb-faydalanmayacağı isə daha çox turnir cədvəliin tən ortasında lövbər salan “Turan Tovuz”un oyuna yanaşmasından asılı olacaq.

AĞA