Ölkə futbolu
İki seriyadan biri qırılacaq: “Lex” Bakıda daha təhükəli ola bilər
Son illərdə “Qarabağ”ın bəxtinə belə güclü rəqib bu qədər erkən düşməmişdi. Ağdamlılar özünün qazandığı reytinq xalları hesabına daha üst sıralarda qərarlaşdığından, adətən ilkin kvalifikasiya mərhələlərində daha zəif rəqiblərlə üz-üzə gəlirdi. Belədə daha güclü rəqiblərlə oyunlara kimi komanda tam hazır olur, oyunu təkmilləşir və qrup mərhələsinə vəsiqə təmin olunurdu.
“Qarabağ” yenə güclüdü və püşkdəki bəxtsizlik bəhanə deyil. Problem ağdamlıların kifayət qədər yaxşı hazırlaşmaq üçün zamanının olmamasıdı. Yığmanın əsasını “Qarabağ” futbolçuları təşkil etdiyindən, Millətlər Liqasının matçları üzündən çempionun oyunçuları kifayət qədər dincələ bilməyib. Qrafikin sıxlığına görə, baş məşqçi Qurban Qurbanov təlim-məşq toplanışı üçün də istədiyi qədər böyük zaman qazanmayıb.
Poznandakı matç da “Qarabağ”da məhz bu problemi çılpaqlığı ilə göstərdi. Komanda güclüdü, öz oyun dəst-xətti var, futbolçular bacarıqlıdı. Lakin məhz hazırlıq üçün kifayət qədər zaman olmadığından futbolçuların fiziki durumu istənilən səviyyədə deyil. Fasilədən sonra komandada yorğunluq aşkar görünürdü.
Lakin indi bəhanə axtarmaq vaxtı deyil.Ötən bir həftə ərzində yəqin ki, problemləri nisbətən aradan qaldırmaq mümkün olub. Futbolçular arasında anlaşmanın, komanda oyununun da inkişaf etdiyinə ümid edirik. Hər şey yerində olsa, hər nə qədər potensial rəqiblər arasından ən güclüsü bəxtimizə düşsə də, “Lex”i Bakıdan məyus yola salmaq mümkündü. Səfər qolunun nəzərə alınmadığı bir durumda ümumiyyətlə, səfərdəki 0:1 hesablı məğlubiyyətin əvəzini çıxmaq daha realdı.
“Qarabağ”ın gücü bəllidi, evdə daha üstün olacağı da aydındı. Bununla belə, Qurban Qurbanov və yetirmələri arxayınlaşmamalıdı. Yalnız sıravi azarkeş ilk matçda gördüklərinə görə rahat qələbə haqda düşünə bilər. Polşa təmsilçisinin səfərdə daha fərqli oynaması mümkün və realdı. Dünən “Lex”in baş məşqçisi Con van den Brom açıqlamasında bunun siqnallarını verdi.
Polşalılar ev matçında olduğu kimi oyunu müdafiədən qurub əks-hücuma bel bağlamayacaq. Onlar da başa düşür ki, ərazi üstünlüyünü “Qarabağ”a versələr, rəqibin topla daha çox davranmasına göz yumsalar, əvvəl-axır cəzalanacaqlar. Ona görə də Bakıda “Lex”in daha cəsarətli oynamağa çalışacağını deyə bilərik. Bunu bacaracaqlarmı? Bax, o artıq “Qarabağ”dan asılıdı. Rəqibin “Qarabağ”a qarşı açıq futbola üstünlük verməsi intiharı olardı, ancaq öndə pressinq etməklə, “ayağa oynamaqla” ağdamlıları kökdən salmağa cəhd edəcəkləri dəqiqdi.
Bugünkü matçda azarkeşlərin də üzərinə böyük iş düşəcək. Rəqibi təzyiqdə saxlamaqla, “Qarabağ”a layiq olduğu dəstəyi verməklə oyunda dönüş yaratmaq gərəkdi. Bu matçdakı uğursuzluq yekunda ağdamlıların bəlli seriyasının qırılmasına da səbəb ola bilər. Düzdü, “Lex” keçilməsə, “Qarabağ” yenə avrokuboklarda mübarizəni davam etdirəcək, lakin o zaman daha çətin qrafik, daha çətin yol olacaq. Hətta bu mövsüm bir eranın sonunu da görə bilərik. Ona görə də şansları riskə atmamaq üçün azarkeşlərin komandayla bütünləşməsi, yola məhz Çempionlar Liqasında davam etməsi lazımdı.
“Qarabağ” hər nə qədər Polşa klublarıyla uğurlu statistikaya malik olsa da, “Lex”in indiyə qədər qarşılaşdığı bütün Azərbaycan klublarını ələdiyini də unutmamalıyıq. Bizim yox, rəqibin seriyasının qırılması üçün hər xırda nüans diqqətə alınmalı, hər həmləyə cavab verilməlidi. Qurbanovun və futbolçularının çoxillik təcrübəsinə arxayınıq, bununla belə, matç ərzində azarkeşlər də fəal olmalıdı.
“Lex” keçilməsi mümkün olan, lakin qətiyyən yuxarıdan aşağı baxılması məsləhət bilinməyən rəqibdi. “Qarabağ”ın qrupa düşmək seriyası nəvaxtsa bitcək, ümid edək ki, həmin uğursuzluq məhz bu mövsüm olmayacaq. Klub reytinqində irəliləmək üçün bizə xallar lazımdı. Onu təmin etmək üçünsə ən güvəniləsi komanda Ağdam təmsilçisidi.
FƏRİD
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”