İnqilabi qərar – stadionun ortasında təcavüz?

Ayxan Abbasovun etirazı haqlıdı. “Sabah” – “Sumqayıt” oyunundakı epizodla bağlı hakimlər haqqında səsləndirdiyi fikirlər də yerindədi. Klub rəhbərliyi kimi sussa, gözdən düşəcəkdi, lakin növbəti dəfə göstərdi ki, yersiz qadağalar onun haqqı deməyinə əngəl deyil, doğrunu dilə gətirir.

Əsasnaməyə görə, AFFA İntizam Komitəsi onu cəzalandırmalıdı. Çünki haqlı etirazları boğmaq üçün hansısa “ağılsız qalstuklu” Əsasnaməyə hakimlərdən danışmağı qadağan edən bənd salıb. Buna riayət etməyən cərimələnir. “Sumqayıt”ın baş məşqçisinin dedikləri isə diskvalifikasiya üçün zəmin yaradır.

SİTAT: “Oyun haqda danışılası nəsə yoxdur. Komanda bir həftə ərzində oyuna hazırlaşır, gecə-gündüz əziyyət çəkir. İlk dəqiqələrdə qırmızı vərəqə verilməsi, komandanın oyununu pozur. “Qırmızı” müəmmalı idi. Biz bu gün “qırmızı”ya baxırıq, təkrarlarda da verilib. Murad hakimə etiraz edə bilər, amma başqa heç nə etmədi. Baş hakim İnqilab “Sumqayıt”ın uduzmağı üçün hər şeyi etdi. Yəqin indi sevinir. İnsanların haqqına belə girmək olmaz. Futbolçularım vuruşdular. Məşqçilik çətin sənətdi. Bu gün işimə nifrət etdim. Niyə hakimin səhvini deyə bilmirik? Nə üçün? Bəs, biz necə inkişaf edəcəyik? İnqilab çıxsın desin ki, qərar tam düzgündür. Xal heç nədir. Danışmırıq, gəlir belə olur. 10-15-ci dəqiqədə belə “qırmızı” vermirlər. Hakim oyuna nəzarət etməlidir. Onlar baxmırlar xarici matçlara? Belə hakimlər getsin özlərinə sənət tapsın. Hakim 10-cu dəqiqədə sonra oyunu bitirdi”.

Bəhs edilən epizod 12-ci dəqiqədə yaşandı. Baş hakim İnqilab Məmmədov mübahisəli qərara etiraz edən “Sumqayıt”ın yarımmüdafiəçisi Murad Xaçayevi birbaşa qırmızı vərəqə ilə meydandan qovdu.

Doğrusu, öncə futbolçunun hakimi təhqir etdiyi şübhəsi var idi və belə olsaydı, İnqilab haqlı sayılacaqdı. Amma matçdan sonra bəlli oldu ki, Xaçayev qeyri-etik ifadə işlətməyib, onun adi etirazı meydandan qovulmasıyla nəticələnib. Hakimlərin vərəqənin səbəbini protokolda “təcavüzkar hərəkət” kimi göstərməsi nöqtə oldu.

Həmin anın videogörüntülərinə baxmaqla nəinki qırmızı, hətta sarı vərəqənin ağır qərar olduğunu müəyyənləşdirə bilərik. Oyunçuların hakim qərarından narazı olaraq bu şəkildə etiraz etməsi sıradan olaydı. Hər matçda onlarla belə nümunə tapmaq olar. İnqilaba əl qaldırılmayıb, zorlanma (“təcavüz”ün sinonimi) cəhdi olmayıb, niyə belə qərar verilsin ki? Bunun adı qərəzdi – birbaşa “Sumqayıt”a, məşqçisinə, futbolçularına qarşı qərəz. Hakim səviyyəsi/səviyyəsizliyi üzündən haqlı olaraq oyunlara təyinat almayan İnqilab bu matça ya tapşırıqla göndərilmişdi, ya da hirsini tökməyə adam axtarırdı ki, gündəmə düşsün.

AFFA-nın yeni qərarına görə, hakimlər oyunlardakı epizodarla bağlı şərh verməlidi. Bu epizod VAR protokoluna daxildi, İnqilab da danışmağa məcburdu. Zəhmət olmasa, izah etsin, üstünə getdiyi futbolçunun əlləri havada ikən ona yüngülcə toxunmasına kəsdiyi cəzaya izahat versin. Buna görə hətta sarı vərəqə vermək lazım deyilkən “qırmızı”ya ehtiyac duymasının bir açıqlaması olmalıdı. Protokoldakı qeyddən anlaşılır ki, oyunçu hakimi təhqir etməyib, mübahisəli epizodla bağlı etiraz belə qiymətləndirilməməlidi.

Doğrusu, bu vərəqəylə bağlı yazmaq niyyətimiz yox idi. “Sumqayıt” rəhbərliyi səsini içinə salıbsa, klub prezidenti Riad Rəfiyevin başı AFFA-dakı şərikləri ilə pul bölməyə qarışıbsa, niyə onların əvəzində biz danışaq ki? Ağası Elxan Məmmədovun əmrlərinə müntəzir olan menecer-prezidentin klubuna qarşı qərəzi qabartmaq mətbuatın borcu deyil. Klub açıqlama versə, etiraz etsə, başqa məsələ, amma hamısı öz kreslosunu düşünərkən şəxsən bizim olayı görməzdən gəlməyə tam haqqımız çatır.

Amma yox, sumqayıtlı azarkeşlərin narazılığını görməzdən gələ bilməzdik. Bir hakimin özbaşınalığına hansısa Rəfiyevin köləliyinə görə göz yumulmamalıdı. Həm də bu klubda zəhmətiylə, gördüyü işlə ayaqda duran Abbasov var. Həmin Abbasov ki, gözükölgəli prezidentindən fərqli olaraq, haqsızlığa göz yummur, futbolçuların haqqını müdafiə edir.

Ayxan bəy İntizam Komitəsinin növbəti iclasında cəzalanmasa, bunu AFFA-nın üzrxahlığı kimi qəbul edəcəyik. Məlum olacaq ki, hakimin səhvinin fərqindədilər. Yox, baş məşqçi cəzalansa və klubu tərəfindən müdafiə olunmasa…

…Abbasov istefa versə, yaxşıdı. Onsuz da “Sumqayıt” Ayxan bəyin əsəridi, ona tarixinin ən yaxşı günlərini yaşadıb və bu gün Rəfiyevin bu məşqçiyə ehtiyacı var. Haqlı olduğu belə zamanda Riad bəy klubu qoruya bilmirsə, başıdik getmək məsləhətdi.

FƏRİD