Ölkə futbolu
“Kəpəz”in BAŞ problemi
Bu dəfə baş məşqçi getdi, Yaşar Vahbzadə “qurban” seçildi. Bəs, uğursuzluq davam etsə, necə olacaq? Axı, nəticələr dəyişmirsə, çözüm tapmaq üçün mütləq başqa nələrsə dəyişməlidi. Məşqçi ilk hədəf idi, növbətisi…
***
Doğrusu, Vahabzadəni heç vaxt bəyənməmişəm. Yaxşı müdafiəçi olub, oyunçu səviyyəsi bir yana, xarakteri ilə də seçilib. Lakin məşqçi kimi daim tənqid hədəfim olub. Layiq olmadığı halda illərlə iş başında olub, az qala bütün yığma komandalarda işləyib və ən uğursuz nəticələr imza atıb. Bununla belə, AFFA-nın sevimli kadrlarından biri kimi daim irəli çəkilib.
Onun Gəncəyə göndərilməsi də təsadüf deyildi, AFFA maliyyə ayırdığı klubu öz adamına tapşırmışdı. Hətta komandanın ən pis nəticələrə imza atdığı, azarkeşlərin daim istefasını istədiyi bir zamanda belə assosiasiya ona arxa durdu, qorudu. Divizionda bu, mümkün idi, Premyer Liqa isə fərqli səviyyədi, söz-söhbət çoxalınca təzyiqə dözə bilmədilər.
Gəncəli azarkeşləri əsas qıcıqlandıran məqam məhz bu idi. Onlar “Kəpəz”in əl komandası olmasını, tapşırıqla idarə edilməsini qəbul etmirdilər. Yekun bəllidi – Vahabzadə yola salındı.
Amma Yaşar bəy “Kəpəz”in yeganə problemi deyildi. Zamanla azarkeşlər də bunu anlayacaq. Gəncədə futbol adına yolunda getməyən o qədər işlər var ki, onların yanında məşqçi amili ən sonuncudu. Bəli, Vahabzadə heyət seçimində, komandanın komplektləşdirilməsində səhvlərə yol verib. Eyni vaxtda Premyer Liqaya gələn “Turan Tovuz”la müqayisə “Kəpəz”ə qiymət vermək üçün kifayətdi. Demək olar, eyni imkanlara malik Qərb komandaları bu gün fərqli durumdadısa, deməli, Yaşar bəy də 4 turdan sonra komandasının xalsız qalmasında günahkardır.
Bütün bunlara baxmayaraq, Vahabzadənin bəhanəsi var və haqlıdı. Komanda 3 oyunu Bakıda – “Zirə”, “Neftçi” və “Səbail”ə, daha birini Qəbələdə yerli komandaya uduzub. Hamısı büdcəsinə görə “Kəpəz”dən qat-qat üstün, illərdi oturuşmuş heyəti, hər cür şəraiti olan komandalardı. Ona görə Yaşar bəyi nəticələrə görə qınayanlar ədalətsiz davranmış sayılmalıdı.
Klubun əsas problemi rəhbərlikdədi. Məşqçini azarkeşlərdən qoruya bilməyən səriştəsiz idarəçilər, komandanın didərgin həyatı yaşamasına da məsuliyyət daşıyır. Uzun müddətdi kluba rəhbərlik edən İlqar Nadiri bacarıqsız olduğunu etiraf etməyə bilər, amma biz ki kor deyilik. Bir ildən çoxdu Gəncə təmsilçisinin Premyer Liqaya gələcəyi müzakirə olunur, hazırlıq görülürdü, amma şəhərdə Premyer Liqanın tələblərinin qarşılanması üçün heç nə edilməyib.
“Kəpəz”in necə lisenziya almasının özü mübahisə mövzusudu və araşdırma tələb edir. Lisenziyalaşdırmanın əsas tələblərindən biri infrastrukturla bağlıdı. Görəsən, klubun stadionu azarkeş qəbul edə bilməyəcəyi halda necə “+” alıb? Saxtkarlıqmı? Səhlənkarlıqmı? İndi bunun cəzasını “Kəpəz” və Vahabzadə çəkməlidimi?
Görəsən, “Kəpəz”in icraçı direktoru bu müddət ərzində şəhər stadionunun təmir edilməsi ilə bağlı bir dəfə mətbuata danışıb və ya cavabdeh orqanlar qarşısında məsələ qaldırıbmı? Azacıq səriştəsi olsaydı, “Kəpəz”in evində oynamamasının hansı fəsadlara səbəb olacağını əvvəldən hesablamalıydı. Bakıda, Qəbələdə sürünməklə “futbolu bölgələrə qaytarırıq” devizi üst-üstə düşmür axı…
Komandanın bugünkü nəticələri birbaşa rəhbərliyin günahıdı. Evdə oynamayan, azarkeşi ilə bütünləşməyən, rəqibə səfər əziyyəti verməyən komanda məğlubiyyətləri sıralamağa məhkumdu. Bu vəziyyətdə gəncəlilər hər oyuna 0:1 geridə başlayır.
“Tarixi-Nadiri” bütöv oxumuş adamam, amma İlqar Nadirinin “bacarıqlarını” təcəssüm etməyə söz tapmıram. Kluba kimin sayəsində rəhbər qolyulduğu bilinməyən bu futbola yad adam adi idarəçilik qabiliyyətinə də malik deyil. Təsəvvür edin, “Kəpəz” ev oyunlarını Bakıda keçirir və məhz “Qəbələ”ylə oyun ərəfəsində bu şəhərdə məskən salacağını elan edir. Ağlı başında olan adam ən azı daha bir tur səbr edər, məhz bu rəqiblə matçdan sonra onun evinə qaçqın kimi gedərdi. Əksini etmək “xal VERMƏYƏ gəlmişik” deməkdi. Buna Vahabzadə neyləsin?
“Kəpəz”in başqa bir problemi camiyə ola bilməməsidi. Klubun ətrafında o qədər adam fırlanır ki… Azarkeşlər bir şərt diqtə edir, AGİN birini, AFFA birini, veteranlar birini. Bəlkə də hamı (xüsusilə azarkeşlər) “Kəpəz”in uğurunu istəyir, amma klub udanda hamınındı, uduzanda heç kimin. Çox adamın məsləhət, ağıl verdiyi yerdə öz yolunu çaşır və mayallaq aşırsan – “Kəpəz” kimi.
Gəncəli veteranlara hörmətimiz sonsuzdu, futbolumuz üçün xidmətləri olub. Amma hamısı bu gün öz məqsədləri üçün danışır, tarixi klub ətrafında saf niyyətlə birləşmirlər. Yad adam saydıqları Vahabzadəylə bağlı mövqelərində bəlkə də haqlıdılar, amma Yunis Hüseynov, Mahmud Qurbanov baş məşqçi işləyəndə də eyni olublar, hamısını xüsusi imtiyazlar düşündürüb. “Ölkənin ikinci böyük şəhərinin niyə özünə yaraşan stadionu yoxdur” sualını aktuallaşdırmaqdansa, bu barədə məsələ qaldırmaqdansa, cavabdehlərdən hərəkət tələb etməkdənsə, cılız oyunlarla məşğul olublar, bir-birinin ayağının altını qazıblar. İndi kənara çəkiliblər və onların qazdığı quyuya “Kəpəz” düşüb.
İndi “Kəpəz”ə yeni məşqçi axtarılır. Çox güman, Şahin Diniyev 3-cü dəfə bu posta əyləşəcək. Amma o, sehrbaz deyil, heç vaxt bu qədər problem içində olan, qaçqın “Kəpəz”ə rəhbərlik etməyib. Bəlkə də bir neçə oyunda uğur qazanmaq olar, lakin Gəncə futbolunu layiq olduğu yerə gətirmək onun imkanları xaricindədi. “Kəpəz” baş məşqçidən öncə BAŞını, səriştəli rəhbərliyini tapmalıdı. İlqar Nadiri futbolumuzda nadir sayılmayan səriştəsiz rəhbərlərdən biridi, onun xaraktersizliyi komandanın ruhuna hopub.
***
Növbəti turun afişası çox maraqlıdı: dünənədək qaçqın sayılan Ağdam klubu bugünün qaçqını olan Gəncə təmsilçisini Qəbələdə qəbul edir.
VÜSAL MAHMUDOV
P.S.: “Kəpəz”in kuratorunun (maraqlı vəzifədi – red.) AFFA İcraiyyə Komitəsinin üzvü, Regional Futbol Federasiyalarının rəhbəri İsgəndər Cavadov olduğunu da xüsusi vurğulayaq. Klubda əksər təyinatlar məhz onun istəyi ilə reallaşır, problemlər üzə çıxanda isə bu adam yada belə düşmür.
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?