Ölkə futbolu
Klublara “yaşıl işıq”: avrokubok iştirakçılarına məşq üçün icazə veriləcək
AFFA klubların avrokuboklara və yeni mövsümə hazırlaşması üçün razılıq alıb. Koronavirus pandemiyası üzündən sərtləşdirilmiş karantin rejimi iyulun 20-dək uzadılsa da, açıq havada idman tədbirlərinin təşkilinə qadağa qoyulsa da, Nazirlər Kabineti vacib istisnaya xeyir-dua verib.
Avqustun əvvəlində qitə yarışlarında yeni mövsüm start götürəcək. Məsul sınağa hazırlaşmaq üçün tezliklə məşqlərə start verilməlidi. Lakin Nazirlər Kabineti yanında Operativ Qərargahın dünənki qərarlarından sonra bu, mümkünsüzə çevrilib. Nə ölkədən çıxmaq, nə də burada qalaraq hazırlaşmaq olur. Ona görə də klublara, xüsusən də avrokubokdakı təmsilçilərimizə xüsusi istisnaların şamil edilməsi vacibdi.
Bütün bunları nəzərə alan AFFA Nazirlər Kabineti ilə danışıqlar aparmağı lazım bilib. Vəziyyət izah olunduqdan sonra şifahi razılıq alınıb. Yəqin ki, tezliklə icazə qərarı rəsmiləşəcək.
Lakin “Qarabağ”, “Neftçi”, “Keşlə” və “Sumqayıt”ın ölkə xaricinə çıxacağı dəqiq deyil. Güman ki, klubların Bakıdan kənarda, bölgələrdə hazırlaşması tövsiyə olunacaq. Bu baxımdan hamı gözünü Qəbələyə dikib. Eyniadlı klubun əla infrastrukura malik olması, Qəbələdə saysız otellərin mövcudluğu təmsilçilərimizin hamısının burada toplaşmasına imkan verir.
Əslində, ölkə xaricinə çıxmaqdansa, bütün imkanlara malik Qəbələdə bir araya gəlmək daha məqsədəuyğundu. 4 komanda sınaqçı-rəqib baxımından əziyyət çəkməyəcək, hətta öz aralarında mini-turnir təşkil etmək mümkün olacaq. Bəlkə də ölkə xaricindəki hazırlığın yerini tam verməyəcək, lakin fors-major halında ən yaxşısı elə budur. Mövcud vəziyyət üzündən Türkiyədə, Avstriyada da klub sayı çox olmayacaq və istənilən sayda yoxlama matçının təşkili inandırıcı görünmür.
Klubların digər problemi heyətə yeni oyunçu qata bilməmələridi. Əcnəbilərin gəlişi həm viza məsələləri üzündən, həm də aviareyslərin olmamasına görə mümkünsüzdü. Xüsusi güzəştə ehtiyac var və AFFA Nazirlər Kabineti ilə həm də bu məsələnn həlli üçün danışıqlar aparır.