Əvəzedicilər
Klubların planlarını pozan Obradoviçin ikili standartı
21 yaşadək futbolçulardan ibarət milli komandamızın baş məşqçisi Milan Obradoviç növbəti dəfə klubların hüququnu pozur. Ötən həftə olduğu kimi, o, FIFA pəncərəsində nəzərdə tutulmayan vaxtda təlim-məşq toplanışı keçirməyi lazım bilib və düşərgəyə 22 futbolçu çağırıb.
Doğrusu, 3 günlük toplanışın serb məşqçiyə nə verəcəyini bilmirik, lakin bundan klubların əziyyət çəkdiyi aydındı. Çünki Premyer Liqada limitə düşən bu futbolçular bərpa məşqlərindən kənar qalıb, üstəlik , istirahət də edə bilməyiblər. Onlar tur bitən kimi milliyə yollanıblar, oradan qayıdan kimi də klublarında hazırlığa cəlb olunacaqlar.
Ötən həftə “Qarabağ” milliyə çağırılan futbolçularından ikisini – İsmayıl İbrahimli ilə Hacıağa Hacılını buraxmamışdı. Görünür, Obradoviçin nazı ilə oturub-duran AFFA rəhbərliyinin təkidindən sonra ağdamlıların da müqaviməti qırılıb və həmin futbolçular hazırda millidədi. Onlara bir gün öncə, yəni sabah tezdən “Qarabağ”a buraxılacaqları vədi verilib. Bu gün ağdamlılarda istirahət güü oduğu üçün məsələni “çürütməyiblər”.
Amma Obradoviçin siyahısına baxdıqda klublara ayrı-seçkilik edildiyi də görünür. “Qarabağ” Nicat Mehbalıyev, Nihad Tamazov, Toral Bayramov, Hacıağa Hacılı, İsmayıl İbrahimli və Musa Qurbanlı kimi bütün limit oyunçularını milliyə göndərib. Eləcə də “Qəbələ”nin əsas heyət üzvlərinin hamısı – Amin Seydiyev, İdris İnqilablı, Rövlan Muradov, Samir Məhərrəmli – düşərgədədi. “Sabah” Şakir Seyidov, Özan Can Kökcü, Rüstəm Samiqullin, Arsen Ağcabəyov və Elçin Mustafayevlə təmsil olunur ki, onlardan üçü son turda start heyətdə oynayıb.
Əvəzində “Neftçi”dən yalnız əvəzedici heyətin üzvləri millidədi. Bunlar Kamran İbrahimov, Nihad Qurbanlı və Turan Vəlizadədi. Halbuki bakılılardan Anton Krivotsyuk və Ömər Buludov da diqqətdən kənar qalmamalıydı. Eyni sözləri heç bir oyunçusuna dəvət gəlməyən “Zirə” və yalnız heyət üzü görməyən üzvü Əkbər Vəliyevlə təmsil olunan “Keşlə” haqda da demək olar. Nicat Süleymanov, Rauf Hüseynli, Rafael Məhərrəmli “qartallar”dan, Orxan Fərəcov, Emin Quliyev və Tural Bayramlı digər paytaxt təmsilçisindən dəvət ala bilərdi. Xüsusilə sonuncu U-21-in əsas heyət üzvlərindən olub.
“Səbail”in Murad Məmmədovla təmsil olunması da maraqlıdı. Milli səviyyəsində kifayət qədər oyunçusu olan, Premyer Liqada meydana çıxan futbolçular hansısa səbəbdən “yaddan çıxarılıb”. Və ya “Sumqayıt”da hər matçda oynayan Elvin Cəfərquliyevin, Süleyman Əhmədovun deyil, son vaxtlar forma geyməyən Səbuhi Abdullazadənin milliyə çağırılması təsadüfi deyil. Yəqin Obradoviçə bəzi komandaların hazırlığına mane olmamaq tapşırığı verilib.
Təbii ki, məşqçi seçiminə qarışmaq doğru deyil. O, milliyə layiq bildiyi futbolçulara diqqət göstərdiyini deyə bilər. Lakin onu da unutmayaq ki, bir həftə əvvəlki siyahı xeyli dəyişib, bəzi oyunçuların 3-4 gün ərzində lazımsız elan edilməsi mümkünsüzdü. Və yığmaya layiq bilinməyənlərin bir neçə komandanı əhatə etməsi çox maraqlıdı.
CAVAD