“Komanda optimal formasından uzaqdır” – Qurban Qurbanov

“Qarabağ”ın baş məşqçisi Qurban Qurbanov UEFA Çempionlar Liqasının I təsnifat mərhələsində Cəbəllütariq klubu “Linkoln”la keçiriləcək cavab oyunu öncəsi mətbuat konfransı keçirib.

Futbolinfo.az saytı xəbər verir ki, 51 yaşlı mütəxəssis komandasının sabah Bakı Olimpiya Stadionunda keçirəcəyi qarşılaşmaya ciddi hazırlaşdığını söyləyib.

Qurbanov səfərdə qazanılan 2:1 hesablı qələbənin cütün taleyini müəyyənləşdirmədiyini düşünür: “İlk oyun heç də asan olmadı. Komandamız optimal formasından uzaqdır. Deməzdim ki, istədiyimiz dinamikanı meydanda göstərə bilirik. Amma ümumən oyuna ciddi yanaşırıq. Meydanda yaxşı müdafiə olunan rəqiblə mübarizə olacaq. Yaxşı nəticə qazanmaq istəyirik”.

Baş məşqçi Juninyo və Patrik Andradenin hazır olmadıqlarını etiraf edib: “Onların hazırlığı bizi qane edəcək səviyyədə deyil. Məşqlərdə səylə çalışırlar. Juninyonun ən azı sonradan meydana çıxıb-çıxmayacağına sabah qərar verəcəyik”.

Qurbanov qarşılaşmanın Bakı Olimpiya Stadionuna salınmasının onlar üçün ciddi problem olmadığını vurğulayıb: “Bakı bizimdir, hər yeri doğmadır. Əlbəttə ki, azarkeşlərin rahatlığını da düşünmək istərdik. Oyunlarımızın çoxunu Tofiq Bəhramov adına Respublika Stadionunda keçiririk. Azarkeşlər üçün də ora gəlmək bəlkə rahat olar. Amma Bakı Olimpiya Stadionunda da maraqlı oyunlarımız olur. İnanmıram ki, buna görə hansısa çətinliklə üzləşək”.

Baş məşqçi yeni transferlərin olub-olmayacağı ilə bağlı sualı da cavablandırıb: “Düşünmürəm ki, ciddi dəyişiklik gözlənilir. Futbolçularımdan çox razıyam. Yaxşı kollektiv formalaşıb, hamısı çox istəklidir. Əlavə 1-2 oyunçu götürə bilərik. Olmasa belə, əlimizdəki heyət bizi qane edir”.

FƏRİD