“Məğlubiyyətə layiq deyildik”

“Araz-Naxçıvan”ın yarımmüdafiəçisi Vadim Abdullayevin futbolinfo.az saytına müsahibəsi

– Ölkə çempionatının 24-cü turunda “Zirə”yə böyük hesabla uduzdunuz və bu nəticə gözlənilməz oldu. 0:3 hesablı məğlubiyyətin səbəbini nədə görürsünüz?

– “Zirə” ilə oyunun nəticəsi bizim üçün də gözlənilməz oldu. Ağlımızdan keçməyən hesab qeydə alındı. Çünki biz ancaq qələbəyə köklənmişdik. Oyunun iştirakçısı olmuş biri kimi deyirəm ki, “Zirə” bizə heç bir çətinlik yaratmadı. Oyun tam nəzarətimizdə idi. Nə qədər qol imkanından istifadə edə bilmədik. Bəxtsizlikdən öz qapımıza qol vurduq. Matç bitəndən sonra uduzduğumuz üçün çox məyus olmuşduq. Komanda olaraq meydanı 3 xalla tərk edəcəyimizə inanırdıq. Əfsuslar olsun ki, futbolda belə hallar da baş verir. Qeydə alınan hesab oyuna görə deyildi.

– Adətən oyunlarda sonadək meydanda olursunuz. Budəfəki görüşün fasiləsində əvəzlənməyiniz nə ilə bağlı idi?

– Fasilədə əvəzlənəcəyimi mənim kimi, komanda yoldaşlarım da gözləmirdilər. Çünki ilk 45 dəqiqədə üstünlük tam bizdə idi. “Zirə”nin fasiləyədək təkcə hesabı açdığı epizod var idi, onda da öz qapımıza qol vurmuşduq. Ümumiyyətlə, “Zirə” qapımıza yaxınlaşa bilmirdi. Hücumları biz qururduq, top saxlayırdıq. Fasilədə belə bir dəyişiklik baş verdi, əvəzləndim. Sadəcə, baş məşqçi Azər Bağırovun yeri mənim üçün ayrıdır, özü də bunu yaxşı bilir. Buna görə də əgər qərarları nəticə gətirəcəksə, o qərarlar mənim əleyhimə olsa belə, həmişə ikiəlli razıyam. Təki nəticə versin, komandamızın xeyrinə olsun, “Araz-Naxçıvan” qələbə qazansın. Əfsuslar olsun ki, ikinci hissədə daha 2 top buraxdıq. Həm öz adıma, həm də komanda və baş məşqçimizə görə pis oldum ki, istədiyimiz nəticəni qazana bilmədik. Növbəti oyunlara köklənməliyik. Çempionat elə keçir ki, çıxdığın hər oyun turnir cədvəlindəki mövqeyinə təsir edir.

– Turlar keçdikcə “Araz-Naxçıvan” gerilədi, hazırda 8-ci yerdəsiniz. Bu geriləməni nə ilə izah edərdiniz?

– “Səbail”lə oyunda məğlubiyyətə layiq deyildik, ancaq uduzduq. “Zirə” ilə görüşdə də eyni hal yaşandı. “Sumqayıt”la heç-heçə etdiyimiz oyunda meydanda bir komanda var idi, o da biz idik. Futbol elə bir oyundur ki, üstün oynadığın halda, nəticə qazanmaya da bilərsən. Bu cür xal itkilərindən sonra ruhdan düşürsən, komandada psixoloji çətinlik yaranır. “Araz-Naxçıvan” bu mövsüm “Qarabağ”ı çıxmaq şərtilə, heç bir matçda oyun baxımından rəqiblərinə uduzmayıb. Azər müəllim gözəl kollektiv yaradıb, yaxşı heyətimiz var. “Araz-Naxçıvan” mövsümün gedişində öz oyunu, uğurlu nəticələri ilə hamını təəccübləndirdi. Hazırda 8-ci pillədə olmağımıza gəlincə, hələ heç nə bitməyib. Komandamıza inanıram. Başımızı aşağı salıb növbəti matçlara köklənməliyik. Biz oyun cəhətdən heç kimdən zəif deyilik. Çalışacağıq ki, qarşıdakı turlarda qələbələrimizi sıralayaq və turnir cədvəlində yuxarı pillələrə qalxaq.

– Növbəti oyunda “Sabah”la üz-üzə gələcəksiniz. Bu görüşdən hansı nəticəni gözləyirsiniz?

– “Sabah” çox çətin rəqibdir, keyfiyyətli komanda olduğunu hamı bilir. Son turda “Səbail”ə uduzduqları üçün bizimlə oyuna ayrı motivasiya ilə çıxacaq, qələbə qazanmaq istəyəcəklər. Hər iki komanda qalib gəlməyə çalışacaq. Xallarımız eyni olduğu üçün çox gərgin və maraqlı görüş keçəcək. Matça ciddi hazırlaşıb oyundan 3 xalla ayrılmalıyıq.

– Bir müddət Premyer Liqadan uzaq düşmüşdünüz. “Araz-Naxçıvan”la birlikdə siz də yüksək dəstəyə qayıtdınız. Yenidən Premyer Liqaya uyğunlaşmaq sizə çətin olmadı? Yüksək dəstənin hazırkı səviyyəsi barədə nə deyə bilərsiniz?

– Düzdür, neçə il Premyer Liqadan uzaq düşdüm. Mənə qarşı çox haqsızlıq olub. Azərbaycan futbolunda ən çox haqsızlıq görən 3 futbolçu varsa, biri mənəm. Öz səhvlərim də çox olub. Bəzən emosional qərarlar vermişəm. Heç kimə pisliyim dəyməyib, amma görünən odur ki, bəziləri başqa cür insanlar görmək istəyirlər. “Araz-Naxçıvan” mənim üçün ikinci ailə oldu. Buranın mənim üçün dəyəri başqadır. Bütün oyunlarda var gücümü meydanda qoyuram. Azər Bağırov həyatımda yer alan ən önəmli 3 insandan biridir. Premyer Liqadan uzaq düşən futbolçular olaraq, biz göstərdik ki, heç kimdən zəif deyilik. Allaha şükürlər olsun, bu gün heç kimdən geri qalmırıq. Çox istəyirəm ki, “Araz-Naxçıvan”ın yaxşı nəticələri, yaxşı gələcəyi olsun. 2011/12 mövsümündən Premyer Liqada oynamışam. Həmin vaxtdan yadıma gəlmir ki, bu qədər gərgin, rəqabətli çempionat olsun. İkinci yerdə gedən komanda 8-ci pillədə qərarlaşan komandadan cəmi 5 xal öndədir. Bu mövsüm çempionat çox maraqlı, həyəcanlı keçir. Premyer Liqadan bir müddət uzaq düşsəm də, yüksək dəstəyə uyğunlaşmaq mənim üçün o qədər də çətin olmadı. Çalışdım ki, oyundan-oyuna artırım. Heç vaxt özümü kimdənsə zəif görməmişəm. Bilirdim ki, keyfiyyətim varsa, mənə şans veriləndə mütləq dəyərləndirəcəyəm. “Araz-Naxçıvan”ın Premyer Liqaya yüksəlməsində, burada xallar toplamasında mənim də əziyyətim olubsa, nə xoş mənə. Bəxtsizlikdən itirdiyimiz xallar olmasaydı, bu dəqiqə 2-ci yerdə idik. Futbol cəhətdən “Qarabağ”dan sonra stabil oyun göstərən komandalardan biri də bizik.

ABBAS