Ölkə futbolu
Medalçılara uduzmayan “Zirə” və “Kəpəz”: biri lider, digəri autsayder
Döyüşü yox, müharibəni udmaq lazımdır. Düzgün strategiya seçirsənsə, uğur qaçılmazdır. Yox, yalnız bir neçə matça köklənib digərlərində məğlub olursansa, yekunda sevinə bilməzsən. Medalçılara uduzmayan “Zirə” və “Səbail” digər rəqiblərlə görüşlərdə də normal xal qazandığı üçün ilk “üçlük”dədir, “Kəpəz” isə…
“Zirə”nin mövsümə “Qarabağ” üzərində qələbə ilə başlaması bu komandadanın iddalarına təkan olmuşdu. Qəsəbə təmsilçisi bundan ruhlanaraq xalları toplamaqda davam etdi və liderə çevrildi. “Sabah” və “Neftçi” ilə oyunlardan da 4 xal götürən “qartallar” zirvədə möhkəmləndi.
Amma bu gün bir daha aydın olur ki, “Zirə” hələ çempionluq mübarizəsinə hazır deyil, hətta avrokuboklara düşmək üçün də xeyli əziyyət çəkməl olacaq. Komanda intizamlı futbol oynayır, müdafiədə etibarlıdır. Lakin hücumda işlər qaydasında getmədisə, xal itkiləri qaçılmazdır. Və indi “Zirə” məğlub etdiyi “Qarabağ”la eyni xala malikdir, “Səbail”in də nəfəsini kürəyində hiss edir.
Uğurun açarı əsas rəqiblərinə uduzmamaqla yanaşı digər komandalarla görüşlərdə də qələbə qazanmaqdadır. Ortabablarla, autsayderlərlə oyunlarda büdrəmək olmaz. “Zirə” isə “Qəbələ” və “Araz-Naxçıvan”a yenilməklə böyük fürsəti əldən verdi. Səfərdə oynadığını nəzərə alsaq, həmin matçlarda heç-heçə etmək belə qazanc idi.
“Zirə” hələ də zirvədədir. Amma indi rəqiblərini böyük xal fərqi ilə qabaqlamır. “Araz-Naxçıvan”la oyun komandanın xüsusilə ön xəttdəki qüsurlarını çılpaqlığı ilə üzə çıxartdı. Qəsəbə təmsilçisi bundan sonra xal fərqinin verdiyi rahatlıqa oynamayacaq, yuxarı pillələrdə qalmaq üçün hər tur döyüşməli olacaq. Hamının eniş vaxtları olacaq, “Zirə” bunu məhz indi yaşayır. Komanda həm də onu anlamalıdır ki, ilk turlarda qazanılan nəticələrdə rəqiblərin hələ tam hazır olmaması rol oynayıb. Bugünkü “Qarabağ”la “Səbail”i məğlub etmək daha çətin olardı.
“Araz-Naxçıvan” “Zirə”dən fərqli qrafik cızır. Muxtar respublika təmsilçisi yüksələn xəttlə irəliləyir. Komandanın hazırlığa gec başlaması, heyətin formalaşdırılmasında yubanması uğursuz starta səbəb olmuşdu. Zamanla problemlər yoluna qoyuldu və naxçıvanlılar indi zirvədən cəmi 3 xal geridədir. Baş məşqçi Azər Bağırovun gördüyü iş qeyd olunmalıdır. Legioner seçimi yaxşıdır, komanda sabitliyə nail olub, lakin daha yüksək yerlərə iddia etmək üçün yerli oyunçu potensialı kifayət qədər deyil.
“Kəpəz” də “Zirə” ilə oxşar problemi yaşayır. Gəncə təmsilçisi də ötən ilin medalçılarına uduzmayıb – evdə “Neftçi” məğlub edilib, səfərdə “Qarabağ” və “Sabah”dan xal alınıb. Amma daha münasib olan bütün digər rəqiblərlə matçlarda məğlubiyyət reallaşıb. Bu gedişlə komanda Premyer Liqanı tərk etməyə əsas namizəd olacaq. Ardıcıl 4 matçda evdə xalsız qalmaq xoş gələcəkdən xəbər vermir. Doğrudur, “Kəpəz” çempionatın ən məhdud büdcəli komandasıdır. Bununla belə, xüsusilə ev oyunlarında daha yaxşı nəticələr qazanılmalıdır.
“Kəpəz” “Qəbələ”yə məğlub olmaqla bu komandanı özündən irəli buraxdı. Meydan sahibləri xüsusilə ilk yarıda daha üstün oynasa da, qolu rəqib vurdu və 3 xalı “cibinə qoydu”. İndi Gəncədə daha çətin dönəm başlayır. Yenə istefa şüarları eşidilir, növbəti xaotik dönəm yaşanır. Halbuki komandanın azarkeşləri ilə bütünləşib rəqibləri çətin vəziyyətə salması lazımdır.
İstənilən halda, maraqlı çempionat izləyirik. Komandaların səviyyəsi bir-birinə çox yaxındır, elə bu üzdən kimsə özündən öndəkindən böyük xal fərqi ilə geri qalmır. Enişlər, yüksəlişlər hamı üçün olacaq, bu müddətdə daha tez toparlananlar qış fasiləsinə öndə gedəcək. Fasilə zamanı kimin necə güclənməsi mövsümün qalan hissəsindəki gedişatı müəyyənləşdirəcək.
FƏRİD