Digər
Mikayıl Cabbarovun ayaq səsləri
Gənclər və idman naziri Fərid Qayıbovun reallaşdırdığı “strateji xətt”də növbəti addım atıldı. “Hər məmura bir federasiya” ideyası reallaşır. Rövnəq Abdullayevin cüdodan uzaqlaşdırılıb yalnız AFFA-da saxlanmasıyla başlayan proses davam edir. Yəqin ki, növbə Kəmaləddin Heydərova da çatacaq.
Hələliksə Mikayıl Cabbarovun vəzifələri azaldılır. Nazir dünən qılıncoynatma federasiyası ilə vidalaşdı, amma bu idman növünü onun əlindən tam ala bilmədilər. Çünki qurumun yeni rəhbəri məhz Mikayıl bəyin idmandakı sağ əli, qohumu Balakişi Qasımov oldu. İstənilən halda, Cabbarov hazırda yalnız badminton federasiyasında prezidentdi və “hər məmura bir federasiya” planına uyğun addımlar atılır.
Amma iş ondadı ki, ölkəmizdə ənənələri olmayan badminton Cabbarov kimi nüfuzlu nazir üçün “xırda” idman növüdü. Onun tezliklə buranı da başqasına güzəştə gedəcəyi/tapşıracağı deyilir. Mikayıl bəyin adı aylardı futbolla yanaşı çəkilir, alınsa, AFFA-ya gələcək, yox, futbol qurumundakılar mübarizədən qalib ayrılsa, güləş federasiyasına “iqtisadiyyat günəşi” doğacaq.
Aparılan təbliğata, Balakişi Qasımovun rəhbərlik etdiyi İctimai televiziyanın dəst-xəttinə baxsaq, heç nəyi proqnozlaşdırmaq olmur. Rövnəq Abdullayev – Elşad Nəsirov – Elxan Məmədov triosu ilə qiyabi güləşmə davam edir, amma Cabbarov güləşməkdənsə futbol oynamağı daha çox xoşlayır. Ona görə də “hər məmura bir federasiya” tamaşasında rollar tam bölüşdürülənə kimi gözləmək lazımdı. Ssenarini Qayıbov yazsa da, “aktyor seçimi” yalnız ondan asılı deyil.
Bütün bu təyinatlar öz yerində, prosesin gedişində bir-birini tutmayan detallar da var. Hansısa məmuru hansısa federasiyaya təyin etməklə ölkə idmanı böhrandan çıxmayacaq. Uğurlu fəaliyyət üçün ciddi maliyyə dəstəyi lazımdı. Məsələn, bizə cüdo federasiyasının necə maliyyələşdiriləcəyi maraqlıdı. Bu quruma rəhbərlik edən nəqliyyat və rəqəmsal texnologiyalar naziri lazım olan vəsaiti necə təmin edəcək? Və ya dövlətin əlinə baxan İTV-nin baş direktoru qılıncoynatmada inkişafı hansı maliyyə ilə təmin edəcək? Rövnəq Abdullayev SOCAR-ına arxayındı, bəs, yeni prezidentlər nəyə ümid edir?
Yəqin ki, bütün təyinatlar rəsmiləşəndən sonra bu suallara cavab veriləcək. Ya müxtəlif şirkətlər ayrı-ayrı federasiyalara təhkim ediləcək, ya da hansısa fond yaradılacaq və hamı oradan öz payını götürəcək. Başqa cür mümkün deyil, çünki cüdo federasiyasının yeni rəhbəri bəlkə də uşqalıqda bir-iki il bu idman növüylə məşğul olub, axı, Qasımov qılıncı ən yaxşı halda muzeydə görə bilər…
Təbii ki, ən çox maraq doğuran AFFA-nın taleyidi. Ən böyük vəsait məhz bu sahəyə lazımdı. Ona görə də Cabbarovun badmintonla da vidalaşdıqdan sonra hansı idman növünə təhkim edilməsi çox şeyə aydınlıq gətirəcək – ya futbol üçün güləşəcək, ya da güləşin sirrlərini daha dərindən öyrənməli olacaq.
İstənilən halda, dünənki dəyiş-düyüş təsadüfi deyildi, idman xəritəmizin yenidən cızılması, səlahiyyətlərin sərhəddinin “delimitasiya-demarkasiya işləri” üçün növbəti addım atıldı…
FƏRİD
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”