Musa Qurbanlı: “Debüt üçün yaxşı gün deyildi”

“Debüt üçün heç də yaxşı gün deyildi”.

Futbolinfo.az “aftonbladet.se” saytına istinadən xəbər verir ki, bunu İsveçin “Yurqorden” klubunun azərbaycanlı futbolçusu Musa Qurbanlı ölkə çempionatının 16-cı turunda “Elfsborq”la keçirilən oyun barədə danışarkən deyib.

0:4 hesabı ilə məğlub olduqları qarşılaşmanın 57-ci dəqiqəsində meydana daxil olan 21 yaşlı hücumçu daha güclü olacaqlarına inandığını bildirib: “Meydana girəndə azarkeşlərin dəstəyini gördüm, çox xoşbəxt oldum. Belə sevgi görəndə fanatlar üçün mübarizə aparmaq, əlimdən gələni etmək istəyirəm. Əlbəttə ki, nəticə hamımızı üzdü. Debüt matçında qələbə qazanmağı çox istəyirdim. Oyundan əvvəl ayağımda ağrı hiss etmişdim və bunu fizioterapevtə demişdim. Məncə, növbəti matça yüz faiz hazır olacağam. Komanda olaraq daha güclü qayıdacağıq”.

O, “Yurqorden”ə yeni qoşulduğu zaman klubun U-19 komandası ilə məşqə qoşulmasını yanlış addım hesab edib: “İlk həftədə özüm fərdi məşq keçmək istəyirdim. U-19 da həmin yerdə məşq edirdi. Məndən komanda ilə birgə məşq etməyi istəyib-istəmədiyimi soruşdular, razılaşdım. Ancaq bu, plana uyğun deyildi. Yəqin ki, yaxşı fikir olmadı. Bakıdan buraya uzun yol qət etmişdim. Bəlkə də, bir az səbirli davranmalı idim. Növbəti qarşılaşmalara daha yaxşı hazırlaşacağam”.

Qurbanlı “Yurqorden”i seçməsinin səbəbini də izah edib: “Yurqorden”in doğru seçim olduğunu hiss edirdim. Çünki oyun üslubuma uyğun komandadır. İnanıram ki, həm mənim, həm də komandam üçün daha yaxşı olacaq. Komandamın qələbələrinə kömək etməyə çalışacağam”.