Ölkə futbolu
“Neftçi” – Abbasovun istədiyi kimi
Bütün ümidini ölkə kubokuna bağlayan “Neftçi” növbəti zərbəni aldı. Ölkə kubokunun yarımfinal mərhələsinin ilk oyununda Tovuzda məğlub olan bakılılar bir addım geri düşdü.
Doğrudur, 0:1 hələ heç nə demək deyil, evdə revanş almaq üçün imkan olacaq. Amma reallıq ilk dueldə reallaşan nəticədir. “Neftçi” belə oynamağa davam etsə, mövsümü titulla başa vurmaq arzusu puça çıxacaq. Hətta “Turan Tovuz”u keçmək mümkün olsa da, həlledici qarşılaşmda üz-üzə gələcəkləri ehtimal olunan “Qəbələ” bu qədər səhv edən komandanı bağışlamaz.
Tovuzdakı matçın bütün ssenarisini Ayxan Abbasov cızmışdı. Meydan sahiblərinin baş məşqçisinin göstərişlərinə əməl edən yetirmələri oyuna diqtə edirdi. Onlar çoxlu qol vəziyyətləri yaratmaları ilə seçilmədilər, amma intizamlı oyunla “Neftçi”ni qəlibə saldılar, oradan çıxmasına imkan vermədilər. Kəsəsi, oyunun bütün axarını “Turan Tovuz” müəyyənləşdirdi, bakılılar da sifariş edilən musiqiyə uyğun “rəqs etdi”.
Heyəti daha zəngin olan “Neftçi” titul həsrətinə son qoymaq üçün bu qarşılaşmaya daha böyük motivasiya ilə çıxmalı, cütün taleyini hətta ilk görüşdə həll etməliydi. “Turan Tovuz”un son dövrlər enişdə olması da buna şərait yaradırdı. Amma Abbasov kubok oyunlarında usta olduğunu bir daha isbatladı. Laurentsiu Regekampf əlində daha səviyyəli ifaçılar olmasına baxmayaraq, tovuzluların müdafiəsini yarmaq üçün heç nə edə bilmədi.
Ağılla müdafiə olunan qərblilərin əks-hücumda qol vurmağa çalışacağı bəlli idi. Bunu rumın məşqçi hamıdan yaxşı bilməliydi. Yəqin ki, bilirdi də, lakin qarşısını almaq üçün heç nə etməyi bacarmadı. Beləcə “Turan Tovuz” oyunda yaradılan nadir hücumlardan birini uğurla tamamlayaraq cütdə nisbi üstünlük qazandı.
Doğrudur, “Neftçi” 1/4 finalda da ilk oyunda uduzmuş, evdə isə “Zirə”dən artıqlaması ilə əvəz çıxmışdı. Eyni ssenari yenə yaşana bilər, hər halda, Bakıda belə şans olacaq. Amma dəqiq olan odur ki, “Neftçi”də ciddi islahatlar lazımdı. Bu məşqçiylə, bu oyunçularla avrokuboklarda komandanı yalnız məyusluq gözləyir.
FƏRİD
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?