Ölkə futbolu
“Neftçi”nin Rəvan qələbəsi: “Sabah” Muradına çatmadı
“Neftçi” uzun fasilədən sonra ölkə kubokunda final oynamağa yaxındı. Hələlik yarımfinala vəsiqə təmin edilib, buradakı rəqib isə “Zirə” olacaq. Qəsəbə təmsilçisi yəqin ki, sabah ilk oyunda 4:0 hesabıyla yendikləri “Səbail”i sıradan çıxarıb vəsiqəni rəsmiləşdirəcək.
Yarımfinalda “qartallar”ın rəqibi “Sabah” da ola bilərdi. Murad Musayevin yetirmələri ilk hissədə sərgilədiyi futbolu davam etdirsəydi, bir az da hakimlər insaflı olsaydı, “Neftçi”nin şansı yox idi.
İlk oyundakı heç-heçə (1:1) Masazırda tərəfləri hər şeyə sıfırdan başlamaq məcburiyyətində qoymuşdu. Və “Sabah” dərsə daha yaxşı hazırlaşmışdı. Bunun sayəsində matça diqtə edən meydan sahibləri fasiləyə kimi hesabı açdı. Vurulan qol sürətli əks-hücumda reallaşdı və gözəl alındı.
Samir Abasov fasilədə Gilyerme Patonu Sezar Meza Kolli ilə əvəzlədi, bunun sayəsində topa sahibolmada gerilik nisbətən aradan qaldırıldı. Paraqvaylı yarımmüdafiədə “Neftçi”nin təşəbbüsü ələ alıb hücumda təzyiqi artırmasına kömək etdi. Bunun sayəsində “Sabah”ın müdafiəsindəki problemlər üzə çıxmağa başladı. Fərdi səhvlər 7 dəqiqəyə vəziyyətin dəyişməsiylə nəticələndi.
61-68-ci dəqiqələr aralığında “Neftçi”nin vurduğu 3 qol müdafiəçilərin və dayaq bölgəsi oyunçularının kobud səhvlərinin nəticəsiydi. Və Musayev kritik məqamda komandasını sakitləşdirə, oyunun ritmini tuta, böhran vəziyyətini idarə edə bilmədi. Onun hakimlikdən şikayət etmək üçün əsası var, amma öz səhvini də gizlətməməlidi.
“Neftçi” yarımfinala vəsiqənin taleyini böyük ölçüdə həll etdikdən sonra baş hakimin şousu başladı. Zaman var idi və “Sabah” vəziyyəti düzəldə bilərdi. Lakin meydan sahibləri elə zərbələr aldı ki, özünə gəlməsi mümkün olmadı.
Rəvan Həmzəzadənin qollar vurulduqdan sonra səhnəyə çıxması ilk baxışdan onun nəticəyə təsir etmədiyini düşünmək üçün əsas verir. Çünki “Neftçi”nin bütün qolları rəqib səhvindən sonra reallaşmışdı və layiqli idi. Lakin iş ondadı ki, hesab 1:0 ikən (57-ci dəqiqədə) “Sabah”ın təmiz penaltisi təyin olunsaydı, hadisələrin inkişafı belə axar almazdı. Qapıya gedən zərbə Azər Salahlının qoluna dəyərək geri döndü və hakimin fiti susdu, ardınca qollar sıralandı.
75-ci dəqiqədə başverənlər isə Həmzəzadənin qərəzli idarəçiliyinin nümunəsi idi. Fərqi azaltmaq üçün irəli atılan “Sabah”ın oyunçusu Aleksey İsayev Eddi İsrafilov tərəfindən “şaqqalandı”. “Neftçi”nin üzvü bu hərəkətə görə meydandan qovulmalı olduğu halda, hakim üzgörənlik edib “sarı”yla kifayətləndi, hakimin dərhal olaya müdaxilə edib “qırmızı” göstərməməsindən qəzəblənən İsayev rəqibin üzərinə şığıyıb onu itələdi. Alekseyin hərəkəti yersiz və “qırmızı”ya layiq idi, lakin bu, hakimin ədalətsizliyi üzündən baş verdi. Eddinin hərəkətindən sonra İsayev ciddi zədələnə, hətta ayağı sına bilərdi. Hakim vaxtında olaya müdaxilə etsə, “Sabah”ın yarımmüdafiəçisi də belə əsəbləşməzdi.
Görünür, Həmzəzadə özü də münaqişə ocağı yaratmaqda maraqlı imiş. Çünki o, olaya qarışan Səlahət Ağayevi də meydandan qovmaqla “Sabah”ın məğlubiyyətini rəsmiləşdirdi. Halbuki qapıçının rəqib müdafiəçiylə mübahisəsi adi epizod idi, futbolda belə itələmələrə hər matçda rast gəlirik. Rəvan isə oda benzin tökməkdə idi, olaylar qızışdı və Murad Musayev də qovulanlar siyahısına düşdü.
Musayev matçdan sonra komandasının, özünün etdiyi səhvlərə toxunmadı, yalnız hakimlikdən danışdı. AFFA-nın hakimlərin bu qədər biabırçı səhvlərindən sonra məşqçini cəzalandıracağına inanmırıq. “Kitaba görə” hakimləri tənqid edənlər cəzalandırılır, eyni qaydanın haqlı olan Musayevə tətbiq edilməsi aranı bir az da qarışdıracaq.
İstənilən halda, avrokuboklara vəsiqələrin müəyyənləşməsi baxımından vəziyyət dəyişdi. “Sabah”ın sıradan çıxması ilə çempionatda ilk 4 yeri tutan komandaların qitə yarışına getmək ehtimalı bir az da artdı. Bundan sonra 4-cü pillənin qiyməti bir qədər də artacaq. “Sabah”ın kubokda əldən verdiyi şansı bərpa etmək üçün Premyer Liqaya köklənməsi şərtdi.
FƏRİD
- Ölkə futbolu2024-04-16 13:19
AFFA-da fırtınaqabağı sakitlik: maliyyə yoxlaması davam edir
- Ölkə futbolu2024-04-17 10:49
12 komandalı çempionat: necə etməli?
- Ölkə futbolu2024-04-17 09:23
Mirzov “Neftçi”dən ayrılır: Premyer Liqadan təklifləri var
- Milli komanda2024-04-17 12:23
Yığmamızın baş məşqçi postuna isveçrəli namizəd