Nizamnaməni pozan Elxan Məmmədov – vəzifədə qalmaq üçün minnətçi gətirir

İl sona yaxınlaşdıqca Azərbaycan futbolunda islahat gözləyənlərin səbri də azalır. AFFA-nın hazırkı hakimiyyəti, xüsusilə Rövnəq Abdullayev – Elxan Məmmədov dueti o qədər bərbad işləyib ki, onları əvəzləyəcək istənilən şəxs üçün əl çalmağa hazırdırlar. Çünki indikilərdən daha pis işləmək mümkün deyil.

Hazırda AFFA-da söz sahibi olmaq istəyən müxtəlif adamlar var. Heç kim iddiasını bəyan etmir, daha çox pərdə arxasında çalışır. Lakin kiçik müşahidə ilə tərəfləri görmək mümkündür. Ən azı kimlərin fəal təbliğat apardığını görürük.

Konkret iki klubun – “Zirə” və “Sabah”ın himayədarlarının belə bir şansdan imtina etməyəcəyi dəqiqdir. Lakin daha çox AGİN və hazırkı AFFA rəhbərliyi canfəşanlıq edir. Bu 4 qrupun bəzilərinin bir-biri ilə koalisiyaya getmək, digərini məğub etmək üçün birləşməsi də mümkündür.

Kartlar açılır və indi bəlli olur k, Nazim Süleymanov Həmkarlar İttifaqını yaradıb AFFA-ya qarşı çıxarkən kimdən dəstək alırmış. Onun AGİN-in balansında açılan “Ulduz” Futbol məktəbinin təsisçisi olmaq sıradan fakt deyil. Peşəkar Futbol Liqasının prezidenti Elxan Səmədov hazırda bu qrupun önə veriləcək digər əsas simasıdır. Kuluarlarda başverənlərdən, rəhbər şəxslərin şəxsi münasibətlərindən xəbərdar olduğumuz üçün buna əminik.

Rövnəq Abdullayev də postunda qalmaq istəyir. O, hətta getsə də, yerinə ötən illərin qüsurlarını gizlədəcək əvəzedicisinin gəlməsinin marağındadır. 15 ildən çoxdur onunla şərkli çalışan Elxan Məmmədovun irəli verilməsi ehtimalı çoxdur. Hazırda FIFA-da çalışan bu şəxsin əl-ayağa düşməsi, təbliğat kampanyasına başlaması təsadüf deyil.

Məmmədov artıq ilk addımları atıb. Bir sıra adamlarla görüşlər keçirən, mütəmadi zəngləşən Məmmədov səs hüququ olan hər kəsə nələrsə vəd edir. Məsələn, yaxınlarda o, “Kəpəz” rəhbərliyindən dəstək istəyib, əvəzində neçənci yeri tutmasından asılı olmayaraq, komandanı Premyer Liqada saxlayacağını bildirib. “Səbail” və “Sumqayıt” rəhbərliyi zatən buyruq quludur, Elxan bəy orta mövqedə olanlardan səs istəyir.

Elxan Məmmədovun müqavilə ilə çalışdığı FIFA-dakı vəzifəsinin müddəti martda başa çatacaq. Seçkilərin də ilin ilk ayı ərzində baş tutmalı olduğunu nəzərə alsaq, Elxan bəyin canfəşanlığının səbəbi bəllidir.

Məmmədovun qayıtmasını kimsə istəyirmi? Qətiyyən! Hətta bu gün sorğu keçirsək, Azərbaycan futbolunun bəlalarının əsas səbəbkarı kimi məhz onun adı 100 faizli nəticə ilə birinci olar. Amma onun qədər günahkar olan himayədarları futbol ictimaiyyətinə, azarkeşlərə meydan oxumağa davam edir və böyük bir futbol təsərrüfatına nəzarəti itirməmək, qazanmağa davam etmək üçün hər şeyə hazırdır. Ona görə də hazırda məhz Məmmədovun namizədliyi, hətta prezident seçilməsi üçün bütün səviyyələrdə iş görürlər.

Elxan bəyin FIFA-ya getdiyi üçün boşaltmalı olduğu icraçı vitse-prezident postu bugünədək nə ləğv edilib, nə də ora yeni təyinat olub. Bu da səbəbsiz deyil. Məmmədov prezident seçilməyəcəyi təqdirdə söz sahibi olmaq üçün prezident səlahiyyətlərini özündə birləşdirən həmin vəzifəyə oturmaq niyyətindədir. Onun hazırda AFFA-da vitse-prezidentlərdən biri kimi qalması da bu məqsədə qulluq edir.

Himayədarları bu şəxs üçün xüsusi kampaniya hazırlayır. Əldə etdiyimiz bilgiyə görə, dekabrın ilk həftəsi FIFA-nın ən yüksək səviyyəli rəsmilərindən biri Azərbaycana səfər edəcək. Hər hansı səbəb yoxdur, səbəbi heçdən yaradıb ad qoyacaqlar. Əsas niyyət isə həmin şəxsi dövlət rəhbərliyi ilə görüşdürmək, Məmmədovu tərifləmək, seçkisi/təyinatı üçün zəmin hazırlamaqdır.

Halbuki Məmmədovun nəinki namizəd olması, indiyədək İcraiyyə Komitəsində, o cümlədən vitse-prezident postunda qalması qanunsuzdur. AFFA-nın Nizamnaməsinə görə İcraiyyə Komitəsinin il ərzində 4 iclasında işrirak etməyən üzvlər oradan uzaqlaşdırılmalıdır. Elxan bəy bu həddi doldurub. O, martın 7-də Hesabat Konfransından sonrakı, həmçinn 13 aprel, 16 iyun və 16 avqust iclaslarında iştirak etməyib. Ümumiyyətlə, 2022-ci ilin aprelindəki iclasdan bəri onu İK iclasında görən olmayıb. “Üzrlü, yoxsa üzrsüz” oyunu oynamağa dəyməz, sağlamlığı yerindədir, FIFA-da iş başındadır və üzvü olduğu İcraiyyə Komitəsinin iclaslarına ən azı onlayn qatılmalıdır. Vəzifəsi imkan vermirsə, istefa verib getməlidir, bu əngəl deyilsə, iclaslara qatılmadığı üçün qovulmalıdır.

Bu faktlar digər namizədlər, iddialılar üçün önəmlidir. Əks halda, Məmmədovun himayədarları yenə hamını kabinetlərdə məğlub edib qalib gələcək, Azərbaycanda futbolun izi-tozu da qalmayacaq.

FƏRİD