Ölkə kuboku
“Penalti və qırmızı vərəqə planımızı pozdu” – Diniyev
“Finala çıxması münasibətilə “Qəbələ”ni təbrik edirəm. “Neftçi” və “Qəbələ”nin ifasında yaxşı final görüşü arzulayıram”.
Futbolinfo.az xəbər verir ki, bunu “Səbail”in baş məşqçisi Şahin Diniyev Azərbaycan Kubokunun yarımfinal mərhələsində “Qəbələ” ilə keçirilən cavab oyunu barədə danışarkən deyib.
Paytaxt təmsilçisi ilk görüşdəki (2:3) kimi, cavab matçında da evdə minimal hesabla (0:1) məğlub olaraq, mübarizəni dayandırıb.
Qarşılaşmanın ardından təşkil edilən mətbuat konfransında Diniyev əsl kubok görüşünə şahidlik etdiklərini bildirib: “Emosiya, istək, xarakter, bir sözlə hər şey var idi. Birinci hissədə biz daha dominant, üstün futbol göstərdik. Üç qol vəziyyətimiz oldu, istifadə edə bilmədik, rəqibin ilk yarıda heç bir şansı olmadı. 46-cı dəqiqədə verilən qırmızı vərəqə bütün planlarımızı pozdu. Bir neçə oyundur rotasiya edirik. “Qəbələ” ilə yarımfinal mərhələsinin ilk qarşılaşmasında əsas heyətin 9 üzvü yox idisə, bu gün 6 nəfər iştirak etmirdi. Gücümüzü üç gündən bir oynamağa saxlamalıyıq. 60-65-ci dəqiqəyə qədər mübarizəni davam etdirib, ondan sonra hücumameyilli oyunçuları meydana buraxmağı düşünürdük. “Qəbələ”nin hələ “Sumqayıt”la matçında hiss olunurdu ki, son dəqiqələrdə yorulurlar. Alınmadı, 46-cı dəqiqədəki penalti və qırmızı vərəqə planımızı pozdu”.
Çalışdırıcı üç oyunçusunun qırmızı vərəqə almasına da münasibət bildirib. O, yalnız Adil Nağıyevin aldığı son qırmızı vərəqə epizoduna görə, oyunçusundan narazı qalıb: “Komandamız hətta meydanda 9 nəfərlə qaldığı zaman da irəli atılırdı. Futbolçularımız əsl xarakter göstərdilər. Komandanın uduzmağı sevməməsi xarakter formalaşdırıb. Yalnız Adil Nağıyevin aldığı qırmızı vərəqə yersiz, lazımsız idi. Belə təcrübəli oyunçunun bu cür qırmızı vərəqə alması lazımsızdı. Bu hərəkətini heç bəyənmədim, narazılığımı özünə də bildirdim. Digər qırmızı vərəqələr oyun epizodundan oldu”.
O, son saniyələrdə hakimə etiraza görə meydandan qovulan müdafiəçi Adil Nağıyevlə bağlı hər hansı tədbir görülməyəcəyini vurğulayıb: “Ona həm komandanın içində, həm də ayrılıqda sözümü dedim. Bu gün nəyinsə yerinə nəsə qoymaq üçün gecdi, o qatar gedib. Düşünürəm ki, Adil də anladı, daha həmin səhvlər olmayacaq”.
Diniyev baş hakim Əliyar Ağayevin idarəçiliyindən da tam razı görünmürdü: “Hakimin gözündən qaçan kiçik foullar var idi. Onlar sonda fəlakətə gətirib çıxardı. Bizim lehimizə cərimə təyin etmədikdən sonra qapımıza hücum oldu, həm penalti, həm qırmızı vərəqə ilə nəticələndi. Ümumilikdə hakimlik yaxşı səviyyədə idi. Çətin oyun idi”.
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?